مەنىڭ جولىم – كەشەگى بابام جولى، وپىرىپ كەتكەن كوپىرىن زامان قولى. اراندارعا جەم بولدى حالقىم مەنىڭ، بوراندارعا تاپ بولدى دالام دولى!
مەنىڭ جولىم – ۇزاق جول، جەڭىس جولى، بار باعىتى باقىتقا تەگىس تولى. كەلە جاتقان جەرىنەن شىڭعا تارتىپ، بۇرىپ كەتتى بىرەۋلەر ەڭىسكە ونى!
مەنىڭ جولىم – سارا جول، ارمان جولى، تيمەي ءجۇرىپ شابىس پەن زاردان قولى – باستاپ كەلىپ بابالار ءبىر بەلەسكە، تابىستاعان تاعى ءبىر تارلانعا ونى...
اتاجۇرتتان وزگەنى جەرسىنبەگەن، بوتا بوزداپ، اتالار ەڭكىلدەگەن. مەنىڭ جولىم ۇلى جول، بىلە-بىلسەڭ، «قازاق تۇگەل شەتتەگى كەلسىن!» دەگەن!
ارالاسام ەلدەرمەن تىم ىرىكتەپ، جەتەلەيدى الدىعا ءبىر ءۇمىت تەك. بۇگىن ماعان كوپ، بىلەم، ءتىس باسۋلى، بۇگىن ماعان ءتۇيۋلى جۇدىرىق كوپ.
ساڭعىپ ۇشسا، شىدايىن قۇس باسىمنان، اداسپايدى قاشاندا مىقتى اقىلدان. شىعارعاندار جۇمىستان شىعارا بەرسىن، قالسام، قالا تۇرايىن تۇستاسىمنان!
جەردىڭ دۇشپان ەجەلدەن يەنىنە ءوش، اعىلادى ەرەڭ-اق تۇيەلى كوش! كۇن كەشەمىز جابىقپاي، جالتاقتاماي، ەشكىمگە دە جاتپايسىز سۇيەنىپ ەش.
باسقالاردان شىعادى داۋسىڭ دا وكتەم، باستايسىڭ ءبىر سەزىنە نارقىڭدى ەپپەن. دۇنيەگە قارايسىڭ باسقا كوزبەن، باسىلىپ قالعان سەرپىلىپ، حالقىم، كوپتەن...
قازاق دەگەن قاسقايىپ تۇرسا قالقان، باقىت ءانىن اتپاي ما شىرقاپ ءار تاڭ! ەلىم سوندا، كورەسىڭ، بوركىن اتىپ، ءبىر جىرىما اتايدى ءبىر سامارحان!
09.09.2014 استانا
