(تۇنگى اڭگىمە)
ءيا، ءانى، ءمىنى دەپ جۇرگەندە ەل دە جاتىپ قالىپتى. قۇراندا ايتىلعانداي ءتۇن دە ادامدار ءۇشىن عاجاپ نارسە. ادام بولعان سوڭ ءبارى دە ۇيىقتايدى. ۇيقىنىڭ ءوزى ءبىر نىعمەت. كەيبىر جىلدار بويى ۇيىقتامايتىندار بولادى. ال ول - دەرت. ءھام تۇندە اللاعا قۇلشىلىق قىلۋ ءۇشىن ۇيىقتمايتىندار بولادى. ءيا، ءتۇن پەندەنى اللاعا كۇندىزدەن قاراعاندا قۇلشىلىق ارقىلى تەز جاقىنداتاتىن ماڭىزدى سەپ بولاتىن نارسە. ايتكەنمەن اللانىڭ اۋليە قۇلدارى دا ۇيىقتايدى. دۇنيە سولاي جاراتىلعان. ءال-قيسسا:
حازىرەتى رابيعا بىردە ءتۇن بويى قۇلشىلىق ەتىپ تاڭ اتقاندا ۇيقىعا كەتەدى. وسىنى اڭدىعان ءبىر ۇرى كەلىپ ۇيىنە تۇسەدى. ول ونىڭ ۇيىندەگى قاتتالىپ جينالعان كيىمىن الىپ ەسىكتەن شىعىپ كەتپەك بولدى. ءبىراق قانشا ىزدەسە دە ەسىكتى تابا المايدى. اقىرى بولماعان سوڭ كيىمىن جەرگە قويعاندا ەسىكتى تابا كەتەدى. ول وسىنى ءۇش مارتە قايتالايدى. ءبىر كەزدە ءۇيدىڭ ءبىر بۇرىشىنان: كيىمدى قوي دا ۇيدەن شىعىپ كەت. قۇل ۇيىقتاعانمەن ونىڭ يەسى ۇيىقتامايدى» - دەگەن داۋىس ەستىلەدى.
ءيا، ۇيىقتامايتىن بىرەۋ بار. ول - حاق تاعالا. ويتكەنى ۇيىقتاۋ، قالعۋ، مۇلگۋ، وتىرۋ، كوتەرىلۋ، ءتۇسۋ، تۋۋ- تۋىلۋ جاراتىلعانعا ءتان نارسە. اللا تاعالا جاراتىلىسقا ۇقسامايدى. جاراتىلىس اتاۋلىدان پاك، سول جاراتىلىستىڭ يەسى - قۇداي تاعالا قاشان دا ءوزىنىڭ سۇيىكتى قۇلدارىنا سۇيەۋ، تىرەك، دوس بولماق. ءيا، دوس ىزدەگەنگە شىنايى دوس - اللا عانا بولماق. ال ول قۇلىنا دوس بولسا كۇللى دۇنيە سول قۇلىنا دوس بولىپ قۇراق ۇشپاق. انشەيىندە بىرەۋ باسشى، پاتشامەن دوس بولسا ەلدىڭ ءبارى سوعان جىلى شىراي تانىتىپ، جاقىن بولۋعا تىرىسپايتىن با ەدى؟!. ءۋاس-سالام.
مۇحيتدين يسا ۇلى. (Facebook-تەگى پاراقشاسىنان)
