قاراعاندى وبلىسىنا قاراستى قارقارالى اۋدانىنداعى نۇركەن ءابدىروۆ اۋىلىنىڭ اعايىندى جىگىتتەرى قوپا وزەنىنە باتىپ كەتكەنى تۋرالى اقپارات شىققان بولاتىن. جىلقى ىزدەپ شىققان ەكى جىگىتتىڭ ءبىرى سۋعا كەتكەن، ونى قۇتقارامىن دەپ جانتالاسقان اعاسى دا اعىسقا قارسى كەلە الماعان. ال ءۇشىنشى جىگىت وزەننىڭ ارعى بەتىنەن وتە الماي قالعان بولاتىن. وقيعا ورنىنا جەدەل جەتكەن قۇتقارۋشىلار ونى تاڭعى 04:00 شاماسىندا اۋىلعا قايتاردى،-دەپ حابارلايدى "قاسىم-اقپارات" پورتالى.

قارقارالى اۋدانىنىڭ اكىمى حالەل ماقسۇتوۆتىڭ ايتۋىنشا، سۋعا كەتكەن ازاماتتار قاۋىپسىزدىك ەرەجەسىن ورەسكەل بۇزعان. قايعىلى وقيعا بولاردان بۇرىن ولارعا اۋىلدىڭ ۋچاسكەلىك پوليسيا قىزمەتكەرى جولىعىپ، سۋ تاسقىنى ءقاۋپى ءتونىپ تۇرعانىنا بايلانىستى مال ىزدەۋگە شىعۋعا بولمايتىندىعىن جەتكىزگەن. اعايىندى جىگىتتەر ونىڭ ايتقانىمەن كەلىسەدى. الايدا پوليسيا قىزمەتكەرى سىرت اينالعاندا اتقا ءمىنىپ، جىلقى ىزدەۋگە كەتكەن. وزدەرىنىڭ جەرگىلىكتى جەردىڭ جاعدايىن جاقسى بىلەتىندىگىنە تىم سەنىمدى بولعان ازاماتتار قاۋىپ-قاتەر تۋرالى ەسكەرتۋلەردى ەلەۋسىز قالدىرادى.

قۇتقارۋشىلاردىڭ كومەگىمەن اۋىلعا جەتكىزىلگەن ازامات سۇڭعات كوپبالين ءوزىنىڭ ءقاۋىپسىز جەرگە شىعارىلۋى مەن اعايىندى جىگىتتەردىڭ ءولىمى تۋرالى تولىق بايانداپ بەردى.

«دارحان مەن ونىڭ اعاسى سايران ءدال مەنىڭ كوز الدىمدا سۋعا كەتتى. ءبىز تاڭەرتەڭگىلىك دارحان ەكەۋمىز جىلقى ىزدەۋگە شىققان بولاتىنبىز. ول كەزدە سۋدىڭ دەڭگەيى ايتارلىقتاي بيىك بولعان جوق. ال ءبىز اۋىلعا قايتىپ كەلە جاتقاندا سۋ كوتەرىلىپ كەتتى. كەي جەرلەردە ونىڭ دەڭگەيى 2-2،5 مەترگە دەيىن جەتتى. ءبىز ءوز بەتىمىزبەن وزەننەن وتە الماسىمىزدى تۇسىندىك تە اۋىلدان كومەك شاقىردىق. دارحاننىڭ اعاسى سايران مەن تاعى بىرنەشە اۋىلداس جىگىتتەر بىزگە كومەكتەسۋگە كەلدى. ولار ءوز كۇشتەرىمەن جاعاعا شىعارۋعا تىرىستى. سۋعا ءبىرىنشى بولىپ سايران تۇسكەن بولاتىن. قاتتى اعىس ونى اعىزىپ اكەتتى، ارتىنان ءىنىسىن قۇتقارامىن دەپ اعاسى دا سۋعا كەتتى. وسىدان سوڭ سۋعا تۇسۋگە جىگىتتەردىڭ ەشبىرىنىڭ جۇرەگى داۋالامادى. سوندىقتان قالادان كەلەتىن كومەكتى كۇتۋگە تۋرا كەلدى»، – دەيدى سۇڭعات.

قۇتقارۋشىلاردىڭ ايتۋىنشا، قازا تاپقان جىگىتتەردىڭ ۇلكەنىنىڭ جاسى 44-تە، كىشىسى 36 جاستا ەكەن. دارحاننىڭ سوڭىندا ءۇش بالاسى ال سايراننىڭ ەكى بالاسى قالىپتى. ولاردىڭ دەنەسى ءالى تابىلعان جوق. ءقازىر ىزدەستىرۋ-قۇتقارۋ شارالارى جالعاسۋدا.