ورتالىق كوممۋنيكاسيالار قىزمەتىندە قوستاناي وبلىسىنىڭ اكىمى ارحيمەد مۇحامبەتوۆتىڭ قاتىسۋىمەن مەملەكەت باسشىسىنىڭ قازاقستان حالقىنا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى اياسىندا قوستاناي وبلىسىنىڭ الەۋمەتتىك-ەكونوميكالىق دامۋى مەن 2017 جىلعا قويىلعان مىندەتتەرى تاقىرىبىندا بريفينگ ءوتتى دەپ حابارلايدى "قامشى" اقپاراتتىق اگەنتتىگى.
ءوڭىر باسشىسى ءوز بايانداماسىندا وبلىستىڭ بۇگىنگى حال-اقۋالىنا توقتالىپ، دامۋ بارىسىنان اقپار بەردى.
«ەلباسى جولداۋىن جۇزەگە اسىرۋ ماقساتىندا، قوستاناي وبلىسىندا بەلسەندى جۇمىس جۇرگىزىلىپ، الدىمىزعا قويىلعان تاپسىرمالاردى ىسكە اسىرۋعا باعىتتالعان ءىس-شارالار كەشەنى ورىندالۋدا. 2016 جىلدىڭ قورىتىندىسى بويىنشا وبلىس ەكونوميكاسىنىڭ ۇدەمەلى دامۋ سەرپىنى، بىزدە مەملەكەت باسشىسى العا قويعان بارلىق مىندەتتەردى ءىس جۇزىندە ويداعىداي ورىنداۋ ءۇشىن جەتكىلىكتى نەگىز قالاندى دەپ ايتۋعا مۇمكىندىك بەرەدى. ماسەلەن، ونەركاسىپتە (ناقتى كولەم يندەكسى -100،3%)، اۋىل شارۋاشىلىعىندا (ناقتى كولەم يندەكسى – 102،3%)، بولشەك ساۋدادا (ناقتى كولەم يندەكسى - 101،7%) وڭ ناتيجەلەر بايقالادى. نەگىزگى كاپيتالعا سالىنعان ينۆەستيسيالار 6%-عا ۇلعايتىلدى. 2017 جىلدىڭ باسىنان بەرى وڭ سەرپىن ساقتالۋدا. ونەركاسىپتە ناقتى كولەم يندەكسى 104،3% قۇرايدى (103،5 ملرد. تەڭگە)، بولشەك ساۋدادا 101،6% (34،2 ملرد. تەڭگە). وبلىس ەكونوميكاسىنا شامامەن 15 ملرد. تەڭگە ينۆەستيسيا تارتىلدى (ناقتى كولەم يندەكسى – 93،2%) – دەدى وبلىس باسشىسى.
سونىمەن قاتار ول، بۇگىنگى تاڭدا وزەكتى بولى وتىرعان سۋ باسۋ ءقاۋپىن الدىن الۋ جۇمىستارىنا قاتىستى اتقارىلىپ جاتقان شارالاردى دا تىلگە تيەك ەتتى.
«ءبىزدىڭ وبلىستا وزەندەر مەن سۋ قويمالارى كوپ بولعاندىقتان سۋ باسۋ ءقاۋپى بار ايماقتاردىڭ قاتارىنا كىرىپ وتىر. ءبىزدىڭ وڭىردە بۇنداي جاعداي 2013 جىلى بولعان. ءبىزدىڭ جۇمىلا جۇمىس جاساۋىمىزدىڭ ارقاسىندا ول قيىندىقتى دا ەڭسەردىك. بيىل دا سول قارقىنىمىزدان تايماي، ءقاۋىپتىڭ الدىن-الۋ ءۇشىن قاجەتتى تەحنيكالاردى دايىنداۋ ۇستىندەمىز» دەدى ول.
قوستاناي وبلىسىندا بيىل تاعى 3 زاۋىت پايدالانۋعا بەرىلەدى
زاۋىتتار تولىق ىسكە قوسىلعاندا، وندا تۇراقتى 306 جۇمىس ورنى اشىلماق. كاسىپورىنداردىڭ جالپى ينۆەستيسيالىق قۇنى 16 ملرد. تەڭگەنى قۇرايدى. بۇل تۋرالى ورتالىق كوممۋنيكاسيالار قىزمەتىندە وتكەن بريفينگ بارىسىندا قوستاناي وبلىسىنىڭ اكىمى ارحيمەد مۇحامبەتوۆ ءمالىم ەتتى.
سپيكەردىڭ ايتۋىنشا، سوڭعى جىلدارى قوستاناي وبلىسىندا جاڭا ءونىم تۇرلەرىن: اۋىلشارۋاشىلىق تەحنيكاسى مەن كومباينداردى، جۇك جانە جەڭىل اۆتوموبيلدەرىن، بولات يلەمىن جانە كۇنباعىس مايىن شىعارۋ جولعا قويىلعان.
سونداي-اق، وبلىستا ەكسپورتقا باعدارلانعان ءبىرقاتار كاسىپورىنداردى ىسكە قوسۋ جوسپارلانعان. ولاردىڭ قاتارىندا ماقسارى مايىن وندىرەتىن زاۋىت جانە مايەكستراكسيالىق زاۋىت بار. زاۋىت جۇمىسىن تولىققاندى قامتاماسىز ەتۋ ءۇشىن قوستاناي قالاسىندا، تاران جانە فەدوروۆ اۋداندارىندا 3 ەليەۆاتوردىڭ قۇرىلىسى قولعا الىنباق. مۇنىڭ سىرتىندا، قوستانايلىق اۋىل شارۋاشىلىعى تاۋارلارىن وندىرۋشىلەردە كاسىپورىن ءۇشىن شيكىزات بولىپ تابىلاتىن كۇنباعىس تۇقىمىن وسىرۋگە مۇددەلىلىك پايدا بولادى.
وبلىس اكىمىنىڭ ايتۋىنشا، قوستاناي وبلىسى وڭىرگە ينۆەستيسيالار تارتۋ جونىنەن جۇيەلى جۇمىس جۇرگىزۋدە. ماسەلەڭ، وتكەن جىلى وبلىس بويىنشا سىرتقى ينۆەستيسيالار كولەمى 11،1 ملرد. تەڭگە قۇراعان بولاتىن، ال بۇل كورسەتكىش 2015 جىلعىدان 11% ارتىق.
الەۋەتتى سىرتقى ينۆەستورلاردى تارتۋ ماقساتىندا، بۇگىندە ديپلوماتيالىق كورپۋس ءۇشىن قوستاناي وبلىسىنىڭ ينۆەستيسيالىق الەۋەتىنىڭ تانىستىرىلىمى بەلسەندى جۇرگىزىلۋدە.
«اعىمداعى جىلى ينۆەستيسيالار تارتۋ جونىندەگى ۇلتتىق ستراتەگيا ازىرلەنەتىنى بەلگىلى. وسىعان وراي، قوستاناي وبلىسىندا ينۆەستيسيالار تارتۋدىڭ ناقتى تەتىكتەرى پىسىقتالىپ، باسىم سالالارى مەن نىسانالى قارجى كوزدەرى ايقىندالاتىن بولادى»، - دەدى وبلىس اكىمى.
ايتا كەتەيىك، وبلىستا وتاندىق جانە شەتەلدىك الەۋەتتى ينۆەستورلارعا تانىستىرىلىم جاساۋ ماقساتىندا ينۆەستيسيانى تالاپ ەتەتىن بوس، توقتاپ تۇرعان وبەكتىلەردىڭ، جەر ۋچاسكەلەرى مەن جوبالاردىڭ تىزبەسى جاسالعان.
