"اق جول" پارتياسى فراكسياسىنىڭ دەپۋتاتتارى "حالىق قاھارمانى" اتاعى يەگەلەرىنە ۇكىمەت قاۋلىسىمەن مارتەبە بەرىپ، استانا جانە الماتى قالالارىندا، وبلىس ورتالىقتارىندا حالىق قاھارماندارى اللەياسىن اشۋدى جانە ەلدى مەكەندەردەگى الەۋمەتتىك وبەكتىلەر مەن كوشەلەرگە ولاردىڭ ەسىمىن بەرۋدى ۇسىندى، دەپ حابارلايدى "قامشى" اقپاراتتىق اگەنتتىگى  Sputnik پورتالىنا سىلتەمە جاساپ.

"حالىق قاھارمانى اتالعان باتىرلارىمىزدىڭ قوعامدا الىپ وتىرعان ورنى مەن ناسيحاتتالۋى، ولارعا كورسەتىلگەن سىي-قۇرمەت كوپتەگەن سۇراق تۋعىزۋدا. باتىرلارىمىز جانقيار ەرلىكتى جەڭىلدىك يا بولماسا وتەماقى الۋ ءۇشىن جاساعان جوق. ءتىپتى ارامىزدا جۇرگەن از عانا قاھارمانداردىڭ وزدەرى بۇل تۋرالى اڭگىمەنى قوزعاعاندى نامىس كورەدى. باتىرلىق پەن قاراپايىمدىلىق قاتار جۇرەتىنى بەلگىلى"، — دەدى بۇگىن ءماجىلىستىڭ جالپى وتىرىسىندا ۇكىمەت باسشىسىنا دەپۋتاتتىق ساۋال جولداعان بەرىك دۇيسەنبينوۆ.
دەپۋتاتتىڭ ايتۋىنشا، ولاردىڭ ەرلىگىن ۇرپاققا پاش ەتىپ، لايىقتى باعاسىن بەرۋ ءبىزدىڭ ەلدىگىمىزگە سىن. جاس ۇرپاققا يدەيا بولاتىن وتان قورعاۋ، پاتريوتيزم دەگەن قاسيەتتى ۇعىمداردى پاش ەتەتىن وسى قاھارماندارىمىز ەكەنى انىق. "مەكتەپ تۇلەكتەرىنىڭ تەست سۇراقتارىنا ءبىر كۇندىك شوۋ بيزنەس وكىلدەرىنىڭ اتتارىنىڭ ورنىنا، سوعىستا كوزسىز ەرلىك كورسەتىپ، بەيبىت كۇندە ەڭ باستى قۇندىلىق ادام ومىرىنە اراشا ءتۇسىپ، جانىن شۇبەرەككە تۇيگەن ەرلەردىڭ ەسىمى نەگە تۇرماسقا؟! ولار جايىندا وقۋلىقتاردا مۇلدەم ايتىلمايدى دەۋگە بولادى. حالىق قاھارمانى اتاعى ءتيىستى الەۋمەتتىك ستاتۋسپەن بەكىتىلمەگەن. ال كورشى مەملەكەتتە رەسەي باتىرى اتاعىنا يە بولعان قانداسىمىز سەرىك سۇلتانعابييەۆتىڭ ەرلىگىنە ەڭ جوعارى مەملەكەتتىك دەڭگەيدە قۇرمەت كورسەتىلىپ جاتقانىن ءوز كوزىمىزبەن كورىپ وتىرمىز. مىسالى، باسقا دا الەۋمەتتىك كومەكتەردەن تىس، ولار 75 مىڭ رۋبل اي سايىن جاردەماقى الادى. جاراقاتتارىنا قاراماستان ەرلىكتىڭ سيمۆولى رەتىندە اسكەر قاتارىندا قالدىرىلىپ، اسكەري بولىمگە كوماندير بولىپ تاعايىندالدى"، — دەيدى دۇيسەنبينوۆ.
دەپۋتات اتاپ وتكەندەي، رەسەيدە ونداي باتىرلاردىڭ سانى 1،5 مىڭنان استام بولسا دا، ولارعا بولىنەتىن قارجىنى ەشكىم بيۋدجەتكە ارتىق جۇك دەپ سانامايدى. ال ءبىزدىڭ بەيبىت ەلدە سوعىس قاھارماندارىنىڭ سانى ساۋساقپەن سانارلىق بولسا دا، ولارعا مەملەكەت كورسەتەتىن شىعىنداردى بيۋدجەتكە قىمبات تۇسەدى دەپ قورقىپ وتىرمىز.
"زاڭنامادا بەلگىلەنگەن حالىق قاھارمانىنا بەرىلەتىن جەڭىلدىكتەردىڭ ىشىندە جيىرما شارشى مەتر قوسىمشا باسپانا مەن تەگىن ءقابىر تاسىن عانا اتاپ وتۋگە بولادى. وسىعان وراي "اق جول" فراكسياسى كەلەسى شارالاردى جۇزەگە اسىرۋ كەرەك دەپ سانايدى. بىرىنشىدەن، "حالىق قاھارمانى" اتاعى يەگەلەرىنە ۇكىمەت قاۋلىسىمەن مارتەبە بەرۋ. ەكىنشىدەن، استانا جانە الماتى قالالارىندا، وبلىس ورتالىقتارىندا حالىق قاھارماندارى اللەياسىن اشۋ جانە ەلدى مەكەندەردەگى الەۋمەتتىك وبەكتىلەر مەن كوشەلەرگە ولاردىڭ اتتارىن بەرۋ. باتىرلاردىڭ ءومىربايانى، ەرلىك جولدارىن جيناق قىلىپ شىعارىپ، مەكتەپ باعدارلاماسىنا ەنگىزۋ"، — دەپ ءتۇيدى ءسوزىن دەپۋتات.