«ايقىن» گازەتى مۇشەل جاسىنا وراي «13 جىلدىققا – ون ءۇش شارا» اتتى باستاما كوتەرگەن بولاتىن. باسىلىم ۇجىمى بۇل جولى جاس جۋرناليستەرمەن ادەتتەگىدەن وزگەشە جاعدايدا، داستارحان باسىندا ديدارلاستى. سونداي-اق، ايقىندىقتار تاراپىنان ءتورت ستۋدەنتكە ءبىر رەتتىك شاكىرتاقى تاعايىندالدى.

ءال-فارابي اتىنداعى قازۇۋ-دىڭ جۋرناليستيكا فاكۋلتەتىنە ات باسىن تىرەگەن «ايقىن» گازەتىنىڭ نۇرتورە ءجۇسىپ باستاعان ۇجىمى كەزدەسۋدى قازاقى ناقىشتا وتكىزدى. ۇلتتىق كيىم كيىپ قانا قويماي، ۇلتتىق تاعامداردان ءدام تاتىردى. بۇرىن ەسىمدەرىن گازەت بەتىنەن، ماقالا سوڭىنان عانا كورىپ جۇرگەن جۋرناليستەرمەن جۇزبە-جۇز جولىققان ستۋدەنتتەر ەرەكشە اسەر الدى.

ساعاتبەك مەدەۋبەك ۇلى، جۋرناليستيكا فاكۋلتەتىنىڭ دەكانى:

– «قازاق مۇشەل جاسىنا ۇلان-اسىر توي جاسايدى. وسى ءاتا-داستۇردى جاڭعىرتىپ جۇرگەن «ايقىن» گازەتىنىڭ ۇجىمىنا العىس ايتقىمىز كەلەدى. ەلىمىزدەگى قازاق تىلىندە جارىق كورەتىن رەسپۋبليكالىق باسىلىمداردىڭ كوشىن باستايتىن گازەتتەردىڭ بىرەگەيى دەسەك، ارتىق ەمەس. ويتكەنى مۇندا قىزمەت ەتەتىن جۋرناليستەر باسىم كوپشىلىگى قازاقستانعا بەلگىلى تىلشىلەر. اپتاسىنا ءتورت مارتە گازەت شىعارۋ – وڭاي شارۋا ەمەس. قيىندىعى مەن قىزىعى قاتار جۇرەتىن قايناعان ورتا دەپ وسىنى ايتسا كەرەك. ءبىزدىڭ ستۋدەنتتەرمەن تىلدەسىپ، اقىل-كەڭەستەرىڭىزدى ءجيى ايتىپ وتىرساڭىزدار ەكەن. وسى ادەمى ءۇردىستى ەندى ەلىمىزدىڭ وزگە دە ب ا ق وكىلدەرى ءىزىن سۋىتپاي، جالعاسا جاقسى بولار ەدى. بيىلعى مەرەيتويلارىمەن قۇتتىقتاي وتىرىپ، ۇجىمعا شىعارماشىلىق تابىس تىلەگىمىز كەلەدى. «ايقىندى» الىپ، ايقىندالايىق!

جۋرناليستيكاعا دەگەن تالابى زور ءتورت ستۋدەنتكە ءبىر رەتتىك شاكىرتاقى تاعايىندالدى. ونىڭ ءبىرىن گازەتىمىزدىڭ قىزمەتكەرى ايدانا نۇرمۇحان اناسىنىڭ قۇرمەتىنە ءوز اتىنان تابىس ەتتى.

نۇرتورە ءجۇسىپ، «ايقىن» گازەتىنىڭ باس رەداكتورى:

–قارا شاڭىراق – قازۇۋ-دىڭ جۋرفاگى كوپشىلىگىمىزگە ىستىق. ويتكەنى ۇجىمداعى جۋرناليستەردىڭ باسىم بولىگى وسى وقۋ ورداسىنان ءتالىم العان. مەن دە وسى جەردىڭ تۇلەگىمىن ءارى ءبىر جىلدارى وقىتۋشىلىق قىزمەتتە بولعان ەدىم. جاس جۋرناليستەردى دايىندايتىن بىردەن-بىر ورىن ەكەنىن جىلدار بويى دالەلدەپ كەلەدى. «13 جىلدىققا – ون ءۇش شارا» اياسىندا بۇل جەردى ۇمىت قالدىرۋعا بولمايدى. جىلى قابىلداپ، قوناق رەتىندە كۇتىپ العان فاكۋلتەت ۇجىمىنا العىس ايتقىمىز كەلەدى. ەلىمىزگە بەلگىلى جۋرناليستەردى تاربيەلەپ، وقۋ ورنىنىڭ بەدەلى ارتا بەرسىن.

ەستەرىڭىزگە سالا كەتسەك، وسىعان دەيىن گازەت ۇجىمى جۋرناليستەر اراسىندا شاحماتتان Aikyn Media Open ءتۋرنيرىن وتكىزىپ، الماتىداعى قازاقستان ينجەنەرلىك-تەحنولوگيالىق ۋنيۆەرسيتەتى ستۋدەنتتەرىمەن كەزدەسكەن بولاتىن. ايقىندىقتاردىڭ ءتورتىنشى شاراسى الداعى ۋاقىتتا بەلگىلى بولادى.   

جادىرا اققايىر