قازاقستاندا كەزەكتى كوكەك انا ۇستالدى. جىگىتى ۇيلەنۋدەن باس تارتقان ايەل تۋعان ءسابيىن 60 مىڭ تەڭگەگە ايىرباستاپ جىبەرگەن.

اقتوبەلىك جاننا اقالاسوۆا جاڭا تۋعان بالاسىن پەرزەنتحانادان شىعا سالا الدىن-الا كەلىسىم بەرگەن ادامعا ۇستاتىپ جىبەرگەن. ال دينا دوساقوۆا ۇزاق جىلدار بويى ءسابي سۇيە الماي جۇرگەن ۇلى مەن كەلىنىنە بالانى الىپ بەرگەن، دەپ حابارلايدى قازاقپارات ءتىلشىسى.

اقتوبەدەگى يۋۆەنالدى سوتتا بالاسىن بوگدە ادامعا بەرىپ جىبەرگەن جاننا اقالاسوۆاعا قاتىستى سوت وتىرىسى باستالدى. ول قىلمىستىق كودەكستىڭ «كامەلەتكە تولماعاندار ساۋداسى» بابى بويىنشا ايىپتالىپ جاتىر. ءىس ماتەريالدارىنا سۇيەنسەك، 32 جاستاعى جاننا اقالاسوۆا بۇرىن تۇرمىس قۇرماعان. ەكى بالاسى بار. ءبىرىنشىسىن 2009 جىلى دۇنيەگە اكەلگەن. ونى سابيلەر ۇيىنە تاپسىرعان. ال ەكىنشى ۇلىن 2017 جىلدىڭ قاڭتار ايىندا بوساندى.

«ايىپتاۋ قورىتىندىسىمەن تانىستىم، ءبىراق جارتىلاي مويىندايمىن. مەن بالانى ساتۋ تۋرالى ويلاعان ەمەسپىن. اسلان ەسىمدى جىگىتپەن كەزدەسىپ ءجۇرىپ، جۇكتى بولىپ قالدىم. ءوزىم قوعامدىق كولىكتى كوندۋكتور بولىپ جۇمىس ىستەيمىن، پاتەر جالداپ تۇرامىن. ۇيلەنۋدەن باس تارتقان سوڭ جۇكتى ەكەنىمدى پاتەر يەسىنە ايتپادىم. ولار مەنىڭ جاعدايىمدى پەرزەنتحاناعا كەتىپ بارا جاتقاندا ءبىلدى. سول كەزدە جەكە كۋالىگىم كەپىلدە جاتتى. سونى الۋ ءۇشىن، ەرتەڭگى كۇنىمدى ويلاپ، تانىسىم داناگۇل وتەشوۆاعا حابار بەردىم. بالا جەتىمدەر ۇيىنە تۇسپەسىن، تولىق وتباسىنا ەر جەتىپ، باقىتتى بولسىن دەگەن نيەتپەن باسقا ادامدارعا بەرگىم كەلدى. كەلىسىپ، نوتاريۋس ارقىلى «باس تارتامىن» دەپ قولحات جازدىم. كەيىن ولار ماعان كومەك رەتىندە 60 مىڭ تەڭگە بەردى. اقشانى داناگۇل وتەشوۆا ەكەۋمىز ءبولىپ الدىق»، - دەدى ايىپتالۋشى جاننا اقالاسوۆا. ايىپتالۋشى ءقازىر پاتەر جالداپ جاتقان ۇيىنە قايتا ورالىپ، جاعدايدى بايانداعان سوڭ پاتەر يەسى قاتەلىك جاساعانىن، بالانى قايتا الۋى كەرەك ەكەنىن ايتادى. سول كەزدە اقالاسوۆا جەرلەسى ءارى ەسكى تانىسى وتەشوۆاعا حابارلاسىپ، «بالامدى قايتارىپ الامىن» دەگەن ءوتىنىشىن ايتقان. كەلىسىم بولماعان سوڭ اقالاسوۆا پوليسياعا شاعىمداندى.

ال ايىپتاۋ قورىتىندىسىن وقىعان پروكۋرور نۇرلان ءساندىباي ايىپتالۋشى ج.اقالاسوۆا، د.وتەشوۆا، د.دوساقوۆانىڭ الدىن-الا ءوزارا كەلىسكەنىن ايتىپ وتىر. «جاننا اقالاسوۆا 2017 جىلدىڭ 16 قاڭتارى كۇنى بوساندى. پەرزەنتحانادا جاتقان كەزدە ول دينا دوساقوۆادان حات الىپ تۇرعان. ول پەرزەنتحانادان 18 قاڭتار كۇنى شىعىپ، سول جەرگە كەلىپ تۇرعان د.دوساقوۆاعا بالانى ۇستاتادى. كەشكىلىك اقالاسوۆاعا بالادان باس تارتۋ تۋرالى قولحات بەرىپ، اقشانى الدى»،- دەدى پروكۋرور.  

سوت وتىرىسىنا ايىپتالۋشىلاردىڭ بارلىعى قاتىستى. بالاسى مەن كەلىنىن ويلاعان دينا دوساقوۆانىڭ ايتۋىنشا، جاس انا مەن ولاردى تانىستىرعان داناگۇل وتەشوۆانىڭ اراسىندا اقشا تۋرالى كەلىسىم مۇلدە بولماعانىن جەتكىزدى. ولار اناعا العىس رەتىندە قولىندا بار 60 مىڭ تەڭگەنى بەرگەن.

«مەنىڭ جاسىم ۇلكەن، مۇنداي قيىندىققا تاپ بولامىن دەگەن جوقپىن. قازاقتىڭ ءبىر بالاسى جەتىم وسپەسىن دەگەن نيەتپەن، بالانى الىپ، باۋىرىمىزعا باسامىز دەپ شەشىم شىعاردىق»، -  دەدى د.دوساقوۆا. ايتا كەتەيىك، ءۇش ايلىق ءسابي ءقازىر «ءۇمىت» سابيلەر ۇيىندە. قالالىق ءبىلىم ءبولىمىنىڭ باس مامانى راۋان شۇكىروۆانىڭ ايتۋىنشا، بالانىڭ دەنساۋلىعى جاقسى، دارىگەرلەر سابيدەن ەش كىنارات تاپپاعان.

ايتا كەتەيىك، بالا ساتتى دەگەن كۇدىككە ىلىگىپ، جاساعان ىستەرى ءۇشىن وكىنگەن ايىپتالۋشىلاردىڭ كىناسى تولىق دالەلدەنسە، ولاردىڭ مۇلكى تاركىلەنىپ، 7 جىلدان 10 جىلعا دەيىن باس بوستاندىقتارىنان ايىرىلۋى مۇمكىن.