اقوردادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا ماسدار عىلىم جانە تەحنولوگيالار ينستيتۋتىنىڭ (ءباا) رەكتورى بەحجات ءال-يۋسۋف حانىممەن كەزدەستى دەپ حابارلايدى "قامشى" اقپاراتتىق اگەنتتىگى.
كەزدەسۋ بارىسىندا مەملەكەتتىك حاتشى گ. ءابدىقالىقوۆا قازاقستان بىرىككەن اراب امىرلىكتەرىن تاياۋ شىعىستاعى ءوزىنىڭ جەتەكشى سەرىكتەسى رەتىندە قاراستىراتىنىن جانە ءوزارا قارىم-قاتىناستى دامىتۋعا باسىم ءمان بەرەتىنىن اتاپ ءوتتى.
مەملەكەتتىك حاتشى 2017 جىلدىڭ قازان ايىندا ەكى ەل اراسىنداعى ديپلوماتيالىق قاتىناستاردىڭ ورناعانىنا 25 جىل تولاتىنىن ايتتى. وسى كەزەڭ ىشىندە بىرلەسىپ اتقارعان جۇمىستىڭ وراسان زور تاجىريبەسى جيناقتالىپ، ءارتۇرلى سالالاردا تابىستارعا قول جەتكىزىلدى.
سونداي-اق، كەزدەسۋ بارىسىندا تاراپتار ق ر مەن ءباا اراسىندا عىلىمي جانە ءبىلىم بەرۋ ىنتىماقتاستىقتى كەڭەيتۋ، ونىڭ ىشىندە: بىرلەسكەن كونفەرەنسيالار، ترەنينگتەر، سەمينارلار - اراب وڭىرىندەگى ايەلدەر ىستەرى جانە تەحنولوگيالار ورتالىعىمەن (CWTAR) بىرگە ءىس-شارالار ۇيىمداستىرۋ ماسەلەلەرىن تالقىلادى.
قازاقستان ءباا-نىڭ جاڭارتىلاتىن قۋات كوزدەرى بويىنشا ساياساتىنا نيەتتەستىك بىلدىرەدى جانە تولىق قولدايدى. امىرلىكتەردىڭ «تازا» ەنەرگيانى ىلگەرىلەتۋ ارقىلى ەكونوميكالىق دامۋعا ىقپال ەتۋ تاجىريبەسى وڭ ۇلگى بولادى. قازاقستان تاياۋداعى ونجىلدىقتا ءوزىنىڭ يندۋستريالدىق ساياساتىنىڭ باستى قۇرامداسى سانالىپ وتىرعان «جاسىل» ەكونوميكانى ەنگىزۋدىڭ بەلسەندى جاقتاۋشىسى بولىپ تابىلادى.
مەملەكەتتىك حاتشى «ەكسپو-2017» حالىقارالىق مامانداندىرىلعان كورمە شەڭبەرىندە اعىمداعى جىلدىڭ 31 تامىز - 1 قىركۇيەك ارالىعىندا «ايەلدەر بولاشاق ەنەرگياسىن قولدايدى» حالىقارالىق فورۋمى وتكىزىلەتىنى تۋرالى حابارلادى. فورۋمدا بالامالى ەنەرگەتيكا جانە «جاسىل» ەكونوميكا سالاسىنداعى يننوۆاسيالىق يدەيالاردى ىلگەرىلەتۋدە ايەلدەردىڭ ءرولى مەن ۇلەسى تالقىلانادى.
گۇلشارا ءابدىقالىقوۆا دوكتور بەحجات ءال-يۋسۋفتى فورۋمعا قاتىسۋعا شاقىردى جانە ماسدار ينستيتۋتىنىڭ جوعارى تەحنولوگيالىق ءبىلىم بەرۋ مەكەمەلەرىنىڭ ءبىرى رەتىندە «جاسىل» تەحنولوگيالاردى ىلگەرىلەتۋ ءۇشىن زور ۇلەس قوساتىنىنا سەنىم ءبىلدىردى.
ق ر مەملەكەتتىك حاتشىسى گ. ءابدىقالىقوۆا كەزدەسۋ سوڭىندا ءابۋ-دابيدىڭ مۇراگەر حانزاداسى شەيح مۇحاممەد بەن زەيد ءال-ناحاياننىڭ ءبىز كورمەنىڭ اشىلۋ سالتاناتىنا، ءباا ۆيسە-پرەزيدەنتى، پرەمەر-مينيسترى، دۋباي امىرلىگىنىڭ ءامىرشىسى شەيح مۇحاممەد بين راشيد ءال ماكتۋمنىڭ ءباا ۇلتتىق پاۆيلونىنىڭ اشىلۋىنا قاتىسادى دەپ كۇتىپ وتىرمىز، - دەدى.
