ناۋرىزدىڭ باسىندا ناۆالنىيدىڭ باستاۋىمەن جەمقورلىققا قارسى كۇرەس قورى رەسەي پرەمەر-مينيسترى دميتريي مەدۆەديەۆتكە قاتىستى تەرگەۋ جۇرگىزىپ، ناتيجەسىندە پرەمەر-مينيسترگە ايىپتى دەپ تاۋىپ، رەسەيدىڭ بىرنەشە قالاسىندا جەمقورلىققا قارسى اكسيا وتكەن. بۇل جايىندا «قامشى» اقپاراتتىق اگەنتتىگى جازعان بولاتىن.

الايدا، رەسەيدىڭ مەملەكەتتىك دۋماسى قوردىڭ تەرگەۋ مالىمەتتەرىن تەكسەرۋدەن باس تارتتى. ءتيىستى شەشىم پارلامەنتتىڭ تومەنگى پالاتاسىنىڭ پلەنارلى وتىرىسىندا قابىلداندى، دەپ حابارلايدى «ينتەرفاكس».

رەسەي كوممۋنيستىك پارتياسىنىڭ مۇشەلەرى، دەپۋتاتتار نيكولاي كولومەيسيەۆ، سەرگەي رەشۋلسكيي جانە يۋريي سينەلششيكوۆ پرەمەر-مينيسترگە قاتىستى تەرگەۋدىڭ مالىمەتتەرىن تەكسەرۋدى ۇسىنعان ەدى. الايدا مەملەكەتتىك دۋما بۇل باستامانى قۇپتامادى.

قاۋىپسىزدىك جانە جەمقورلىققا قارسى ءىس-قيمىل كوميتەتىنىڭ باسشىسى ۆاسيليي پيسكاريەۆتىڭ ايتۋىنشا، ول «جەمقورلىقپەن كۇرەس قورىنان تۇسەتىن مۇنداي ماتەريالداردىڭ تالايىن كورگەن».

«وسىعان دەيىن قور جۇرگىزگەن تەرگەۋلەردىڭ ەشقايسىسى اقيقاتپەن سايكەس كەلگەن ەمەس. سوڭعى تەرگەۋ دە سولاي. ال ولاردىڭ بىزگە ۇنەمى ناسيحاتتاپ، دارىپتەپ جۇرەتىن جەمقورلىققا قارسى كۇرەسىنە تىپتەن قاتىسى جوق»، - دەپ اتاپ ءوتتى ول.

ال، 4 ءساۋىر كۇنى دميتريي مەدۆەديەۆتىڭ ءوزى ناۆالنىيدىڭ جۇرگىزگەن تەرگەۋ جۇمىستارىن بارىپ تۇرعان «بىلجىراق»، «قۇر قاعاز» دەپ پىكىرىن بىلدىرگەن.