كەڭەس وداعىنىڭ باتىرى مانشۇك مامەتوۆانىڭ 95 جىلدىعىنا وراي 22 ءساۋىر كۇنى ورالدان رەسەيدىڭ نيەۆەل جانە نوۆوسوكولنيكي قالالارىنا ءىV حالىقارالىق اۆتوجورىق باستاۋ الماق، دەپ حابارلايدى قازاقپارات.

ورالداعى مانشۇك مامەتوۆا مەموريالدىق مۋزەيىنىڭ ديرەكتورى سۆەتلانا بەكتەنوۆانىڭ ءمالىم ەتكەنىندەي، اتالعان جورىققا ءوڭىر جاستارى دا قاتىسپاق. وسى ورايدا ورال اقپاراتتىق تەحنولوگيالار كوللەدجىمەن كەلىسىم جاسالىپ، جاستارعا اسكەري-پاتريوتتىق تاربيە بەرۋ باعىتىندا ءىس-شارالار جوسپارلانعان بولاتىن. كوللەدجدە جۇمىس جاسايتىن «ىزدەۋ» ۇيىرمەسىنە بەلسەنە قاتىساتىن ستۋدەنتتەر پەداگوگتارىمەن بىرگە اتالعان جورىققا شىقپاق.

جىل سايىن جەڭىس كۇنىنە ەكى اپتا قالعاندا، رەسەيدىڭ پسكوۆ وبلىسىندا ۇلى وتان سوعىسىندا قازا تاپقان بەلگىسىز جاۋىنگەرلەردى انىقتاۋ ماقساتىندا ىزدەستىرۋ جۇمىستارى باستالادى. باتىسقازاقستاندىقتار رەسەيلىك «قالامپىر» توبىمەن بىرگە وسى جۇمىستارعا قاتىساتىن بولادى.

مۋزەيدە وتكەن كەزدەسۋدە سوعىس جانە ەڭبەك ارداگەرلەرى حامزا سافين، اليەۆتينا ميتروحينا، ليديا گۋبانوۆا قازىرگى كەزدە ورال قالاسىندا تۇرعان مانشۇك مامەتوۆانىڭ ەسكەرتكىشىن تۋعان جەرى بوكەي ورداسى اۋدانىنا كوشىرۋ تۋرالى ۇسىنىستى قولدايتىندىقتارىن جەتكىزدى. كەزىندە ۇلتتىق كاسىبي ءمۇسىن ونەرىنىڭ نەگىزىن سالۋشىلاردىڭ ءبىرى، قازاقستان حالىق سۋرەتشىسى حاكىمجان ناۋرىزبايەۆتىڭ قولىنان شىققان ەسكەرتكىش جوندەلگەننەن كەيىن بوكەي ورداسىندا ورىن تەبەدى.

ال ونىڭ ورنىنا قازاقتىڭ ءۇش باتىر قىزى مانشۇك مامەتوۆا، ءاليا مولداعۇلوۆا جانە حيۋاز دوسپانوۆاعا ارنالعان كومپوزيسيا قويىلماقشى. بۇل ەسكەرتكىشتى بيىلعى جەڭىس كۇنىنە وراي اشۋ كوزدەلۋدە. ايتا كەتەيىك، مانشۇك مامەتوۆانىڭ 95 جىلدىعىنا وراي باسقا دا شارالار جوسپارلانۋدا.