ۇلىبريتانيالىق ايريس گرەيس حەلمشوۋ 7 جاستاعى سۋرەتشى قىز. 2011 جىلدىڭ جەلتوقسانىندا دارىگەرلەر قىزدا ءاۋتيزمنىڭ بارىن انىقتاعان. ايريس كىشكەنتاي كەزىنەن ادامدارمەن ارالاسۋىن دوعارعان.

ءبىراق، اللا تاعالا ادامعا ءبىر كەمىستىك بەرسە، ونىڭ ورنىن مىندەتتى تۇردە وزگەلەردە جوق ارتىقشىلىقتارمەن تولىقتىرىپ وتىرادى. ءيا، ءتۇرى ۇسقىنسىز بولعان شىعار، ءبىراق تالانتى تاس جارادى. قول-اياعى جوق شىعار، ءبىراق سۇلۋلىعى بارىنەن اسىپ تۇسەدى.

بۇنداي اسىل قاسيەت ايريستەن دە اينالىپ وتپەدى. ءوز ويىن ادامدارعا جەتكىزە الماعانىمەن، كىشكەنتاي ارۋ ىشىندەگىسىن قىلقالاممەن قاعاز بەتىنە تۇسىرەدى ەكەن.

«سۋرەت سالۋمەن اينالىسۋ ءايريستىڭ قارىم-قاتىناس جاساۋىنا كومەكتەسەدى دەپ سەنگەنبىز،- دەيدى قىزدىڭ اناسى ارابەللا كارتەر-دجونسون: ءبىراق، قىزىمىزدىڭ بويىندا اسقان تالانت بار ەكەنىن بىلمەي جۇرگەن ەكەنبىز. قىلقالامدى قولىنا العان بويدا 2 ساعات توقتاۋسىز سۋرەت سالۋعا كىرىسىپ كەتتى. العاشىندا، اۋتيزممەن اۋىراتىنىنا قىنجىلاتىنبىز. الايدا، ءدال وسى اۋرۋ ونى سۋرەت ونەرىمەن تانىستىردى. ول سويلەي الماسا دا، قورشاعان ورتانى بار جانىمەن سەزىنە الادى».

قىزدىڭ كارتينالارى بۇگىنگى تاڭدا ۇلكەن سۇرانىسقا يە. كەيبىر كوللەكسيا جيناۋشىلار ونىڭ كارتيناسىن قوماقتى سوماعا ساتىپ الادى.

ايريس بۇگىندە الەۋمەتتىك جەلى قولدانۋشىلارىن قىزىقتىرىپ وتىرعان بىلىكتى سۋرەتشى. دەرەكتەرگە سۇيەنسەك، ونىڭ سۋرەت سالۋىنا جاقىن دوسى، مىسىعى – تۋلۋ كومەكتەسەدى ەكەن.