بۇگىن ءال-فارابي اتىنداعى قازاق ۇلتتىق ۋنيۆەرسيتەتى بيولوگيا جانە بيوتەحنولوگيا فاكۋلتەتىندە قازاقستاندىق بيولوگ عالىم، بيولوگيا عىلىمدارىنىڭ دوكتورى، پروفەسسور، قازۇعا-نىڭ اكادەميگى ماييا حاجەتدين قىزى شىعايەۆا اتىنداعى ءدارىسحاناسىنىڭ اشىلۋ سالتاناتى ءوتتى. اشىلۋ سالتاناتىنا ماييا حاجەتدينقىزىن ءبىر مينۋت ۇنسىزدىكتە ەسكە الۋمەن باستالدى.

اشىلۋ سالتاناتى ءىV حالىقارالىق فارابي وقۋلارى اياسىندا ءوتىپ جاتقان، ماييا حاجەتدين قىزىنىڭ رۋحىنا ارنالعان «بيوتەحنولوگيا، ەكولوگيا جانە فيزيكو-حيميالىق بيولوگيانىڭ وزەكتى ماسەلەلەرى» اتتى حالىقارالىق عىلىمي-پراكتيكالىق كونفەرەنسياعا قاتىسۋشى وتاندىق جانە شەتەلدىك عالىمدارمەن بىرگە مارقۇم ماييا حاجەتدين قىزىنىڭ ارىپتەستەرى، شاكىرتتەرى جانە وتباسى مۇشەلەرى، سونىمەن قاتار، ستۋدەنتتەر مەن جاس عالىمدار قاتىستى.

اشىلۋ سالتاناتىندا ءسوز العان فاكۋلتەت دەكانى ب.ع.د.، پروفەسسور بولاتحان قازىحان ۇلى ماييا حاجەتدين قىزىنىڭ تەك قانا وتاندىق بيولوگيا عىلىمدارىنا عانا ەمەس، الەمدىك ءبىلىم مەن عىلىم سالاسىنا قوسقان ۇلەستەرى مەن سىڭىرگەن ەرەن ەڭبەگىن اتاپ ءوتتى. 

ماييا حاجەتدين قىزىنىڭ شاكىرتى، ح. دوسمۇحامەدوۆ اتىنداعى امۋ پروفەسسورى ساعىندىقوۆا سوفيا زۋلحارناي قىزى قازىرگى قازاقستاننىڭ رەسەيدەگى وكىلەتتى ەلشىسى يمانعالي تاسماعامبەتوۆتىڭ باستاماسىمەن جارىق كورگەن، راشيلي مۋرساليۆانىڭ «اتىراۋ ارۋلارى»  كىتابىنا مايا حاجەتدين قىزىنىڭ ەنگىزىلگەندىگى تۋرالى جانە «تەكتىدەن تەكتى تۋادى، تەكتىلىك تۇقىم قۋادى» دەگەندەي ماييا حاجەتدين قىزىنىڭ بوكەي ورداسىنىڭ حان-سۇلتاندارى توعىم، جاڭگىر، نۇرالى، شىعاي جانە اتاقتى داۋلەسكەر كۇيشى داۋلەتكەرەي شىعاي ۇلىنىڭ ۇرپاعى ەكەندىگىنە توقتالدى.سونىمەن قاتار،ول كىسىنىڭ قۇرمەتىنە ميكروبيولوگيا سالاسى بويىنشا ۇزدىك وقىعان ستۋدەنتتەرگە  «ماييا حاجەتدين قىزى» اتىنداعى ستيپەنديا تاعايىنداۋ تۋرالى باستاما كوتەرىپ، العاشقى 100مىڭ تەڭگە ستيپەنديانى فاكۋلتەتىمىزگە ۇسىندى.

ب.ع.د.، قازۇعا-نىڭ كوررەسپوندەنت مۇشەسى بيسەمبايەۆ امانگەلدى قۋانباي ۇلى، قولدا باردى ساقتاپ قالۋدىڭ ءوزى قيىن بولعان 90-جىلدارداعى وتپەلى كەزەڭدە،  قازىرگى ءوزى باسشىلىق ەتەتىن بيولوگيا جانە بيوتەحنولوگيا ماسەلەلەرى عىلىمي-زەرتتەۋ ينستيتۋتىن پروفەسورلار ماييا حاجەتدين قىزى، بەرسىمبايەۆ راحمەتقاجى ەسكەندىر ۇلى جانە تولەۋحانوۆ سۇلتان تولەۋحان ۇلىنىڭ ىرگە تاسىن قالاۋعا سىڭىرگەن ەڭبەتەرىن ەسكە الا وتىرىپ، قازاقستاندا ماييا حاجەتدين قىزى مەن ميكروبيولوگيا عىلىمىن اجىراماس ەگىز ۇعىم رەتىندە قاراستىردى.

ايتا كەتەيىك، ماييا حاجەتدين قىزى ۇستىمىزدەگى جىلدىڭ اقپان ايىندا 91 جاسىندا ومىردەن وزعان بولاتىن.

ەل اراسىندا ايتىلعان اقپاراتقا سايكەس،  ماييا حاجەتدينقىزىن ءازىلحان نۇرشايقوۆ «ماحاببات قىزىق مول جىلدار» رومانىنداعى مەڭتاي بەينەسى رەتىندە العان ەكەن.

ءال-فارابي اتىنداعى قازۇۋ 3- كۋرس ستۋدەنتى ارافات دەربەس ۇلى

اعا وقىتۋشى الىبەك ىدىرىس ۇلى