يتاليا ەلىنىڭ بالونيا قالاسىندا جۇرت تاڭ قالارلىقتاي وقيعا بولدى. اناسى ءوزىنىڭ 14 جاستاعى قىزى حيدجاب كيۋدەن باس تارتقانى ءۇشىن شاشىن تاقىرلاپ الىپ تاستادى دەپ حابارلايدى "قامشى" اقپاراتتىق اگەنتتىگى Baq.kz-كە سىلتەمە جاساپ. ونى بايقاعان مەكتەپ باسشىلىعى قۇقىق قورعاۋ ورگاندارىنا حابارلاعان. 14 جاسار قىزدىڭ جانە ونىڭ سىڭلىلەرىنىڭ ماسەلەسىمەن الەۋمەتتىك قىزمەتكەرلەر اينالىسۋدا. وسى مالىمەتكە سۇيەنسەك اناسى باسقا قىزدارىن دا حيدجاب كيۋگە ماجبۇرلەگەن بولۋى ابدەن مۇمكىن.

قىزدىڭ وتباسى بىرنەشە جىل بۇرىن بانگلادەشتەن بولونيا ىرگەسىندەگى ەلدى مەكەنگە قونىس اۋدارعان ەكەن. كورشىلەرى ەرلى-زايىپتىلاردىڭ تەرىس ارەكەتىن بايقاماعان. پوليسيانىڭ نازارىنا دا ەش ىلىكپەگەن كورىنەدى. كەيىنىرەك انىقتالعانداي، اكەسى مەن اناسى بالالارىنا كۇش كورسەتپەگەن، ءبىراق پسيحولوگيالىق قىسىم جاساعان.قىزدارىنا ۇيدەن اتا-اناسىنسىز شىعۋعا، كوشەدە حيدجابسىز جۇرۋگە نەمەسە وزىمەن قاتارلاس ۇلدارمەن سويلەسۋگە تىيىم سالعان. ايتىلعانداردى ورىنداماسا، قاتاڭ جازالايمىز دەپ قورقىتقان.

مۇسىلماندار قاۋىمىنىڭ ۇيلەستىرۋشىسى ياسسين لافرامنىڭ ايتۋىنشا، بالاعا كۇشتەپ حيدجاب كيگىزۋ يسلام دىنىنە قايشى. ءار ادام ونى جۇرەك قالاۋىمەن جاساۋى كەرەك.

الەۋمەتتىك قىزمەت قىزداردى اتا-اناسىنان الىپ قويدى. بالالاردىڭ تاعدىرىن ەندى سوت شەشەدى.