تانىمال ءانشى قاجىمۇرات شەشەنقۇل ۇلى ءساۋىردىڭ 10-ىندا ستۋدەنتتەر سارايىندا «تۋعان ەل» اتتى شىعارماشىلىق كەشىن وتكىزەدى دەپ حابارلايدى Qamshy.kz
شىعارماشىلىق كەشىتىڭ ەرەكشەلىگى تۋرالى قامشى اگەنتتىگى ءتىلشىسىنىڭ سۇراعىنا ءانشى:
«ساحنادا جۇرگەنىمە 13 جىل بولدى. بۇل العاشقى كاسىپتىك دەڭگەيدەگى كەشىم بولماق. حالىقتى ستيلدەگى وزگەرمەگەن، ەلىكتەمەگەن اۋەندەر شىرقالادى. باستىسى جۇڭگو قازاقتارىنىڭ قايماعى بۇزىلماعان اۋەندەرى انسامبلمەن ايتىلادى. كونسەرتتە روزا ءالقوجا، ايقىن تولەپبەرگەن، ماقسات بازاربايەۆ، ارۋجان تاستەكەي، اقجول مەيىربەكوۆ، تورەعالي ءتورالى سياقتى سياقتى انشىلەر ونەر كورستىپ، قاراجورعانىڭ ناقتى تاريحى تانىستىرىلىپ، ارنايى قويلىم قويىلادى»، - دەيدى.
ايتا كەتەتىن بولساق، قاجىمۇرات شەشەنقۇل ۇلى جۇڭگو قازاقتارى اراسىنان شىققان تانىمال ءانشى. ول 2000 جىلداردىڭ باسىندا جارىق ەتىپ شىعىپ، بولەك بولمىسىمەن، دارا جولىمەن تىڭدارماندارىنىڭ جۇرەگىنە جول تاپقان.
بىرنەشە جىل بۇرىن اتاجۇرتقا ورالعان ول ەركىن شىعارماشىلىق جۇمىسپەن اينالىسىپ كەلەدى. بىلتىر مونعوليادا بايان-ولگەيدە 1500 ادامدىق زالدا ەكى رەت كونسەرت قويعان. قوبدا ايماعىندا، بۇلعىندا، ەڭ سوڭىندا ۇلانباتىردا 2500 ادامدىق زالدا كونسەرت بەردى. سونداي-اق وتكەن جىلى ەۋروپادا گاسترولدىك ساپاردا، گەرمانيادا، كەلن قالاسىندا بولىپ، «قارا جورعا» ءانىن شىرقاپ كەلدى. وعان قوسا بىرنەشە فيلمدە ءىشىنارا رولدەر الىپ، اكتەرلىك جاعىنان دا ءوز قىرىن كورسەتتى. اتاپ ايتقاندا "حابار" ارناسىنداعى "تاعدىر تارتىسى" تەلەحيكاياسىنا ءتۇستى.
قاجىمۇرات شەشەنقۇلدىڭ «سەنى عانا» اتتى ءانى شىققانىنا ون جىلدان اسسا دا جاستار اراسىندا ءالى تانىمال. ءانشىنىڭ شىعارماشىلىق كەشىنە بارشاڭىزدى شاقىرامىز.
ەرلان تولەۋباي
