جان الۋدىڭ باسى – اجالدىڭ كەلۋى. اجال كەلسە، جان الىنادى. ادام بالاسى ءۇشىن مۇنان قۇتىلۋدىڭ ەشقانداي ايلا-شاراسى جوق. ول وسى ساتتە جان تاپسىرۋعا ءماجبۇر بولادى. بۇل تۋرالى قۇدىرەت يەسى: «ول قۇلدارىنان ۇستەم. سەندەرگە ساقتاۋشى (پەرىشتەلەردى) جىبەرەدى. بىرەۋلەرىڭە ءولىم كەلسە، ەلشىلەرىمىز (ياعني، پەرىشتەلەرىمىز) ونىڭ جانىن الادى جانە ەش كەمشىلىك جىبەرمەيدى»، – دەگەن. ال ەندى، ادام جانى (رۋح) قالاي الىنادى؟ بۇل كورىنىستى، ودان كەيىن دە بولاتىن احۋالداردى جانە ءقابىر جاعدايى مەن رۋحتىڭ اسپانعا كوتەرىلۋىن سيپاتتاعان حاديستەر كوپ. ءمۇمىننىڭ جان تاپسىرۋى بارا يبن ازيبتان (اللا وعان رازى بولسىن) ريۋايات ەتىلگەن حاديستە پايعامبارىمىز (س.ا.س.): «راسىندا، ءمۇمىن پەندە دۇنيەدەن اتتانىپ، اقىرەتكە بارارىندا وعان كوكتەن جۇزدەرى اپپاق كۇن سياقتى پەرىشتەلەر تۇسەدى. ولاردا جانناتتىڭ كەبىندەرىنەن ءبىر كەبىن جانە جانناتتىڭ ءيىسسۋلارىنان ءبىر ءيىسسۋ بولادى. (پەرىشتەلەر كەلىپ) ونىڭ كوز الدىندا وتىرادى. سوسىن ءولىم پەرىشتەسى كەلەدى دە، ونىڭ باس جاعىنا وتىرىپ: «ەي، قوش كورىلگەن ءناپسى! اللانىڭ كەشىرىمى مەن رازىلىعىنا قاراي شىق!» – دەيدى. رۋح ىدىس ەرنەۋىنەن اققان ءبىر تامشى سۋداي اعىپ شىعادى. ءسويتىپ، (پەرىشتە) ونى الادى»، – دەگەن. ءمۇمىن ادامنىڭ جانى وسىنداي كورىنىستە الىنادى. البەتتە، ولار ءۇشىن جان تاپسىرۋ جەڭىلىرەك. پەرىشتەلەر ءمۇمىندى كوڭىلى سايابىر تاۋىپ قورىقپاس ءۇشىن ءولىم الدىندا سۇيىنشىلەيدى. بۇل جايىندا قۇران كارىمدە: «راسىندا: «راببىمىز اللا!» – دەپ، سوسىن تۋرا بولعاندار؛ ولارعا پەرىشتەلەر تۇسەدى دە: «قورىقپاڭدار دا قايعىرماڭدار! سەندەرگە ۋادە ەتىلگەن جاننات ارقىلى قۋانىشقا بولەنىڭدەر. ءبىز دۇنيە تىرشىلىگىندە دە، اقىرەتتە دە دوستارىڭبىز. سەندەرگە وندا (جانناتتا) كوڭىلدەرىڭ كوكسەگەن نارسەلەر بار. سونداي-اق سەندەرگە تىلەگەن نارسەلەرىڭ بار. (بۇل) اسا كەشىرىمدى، وتە مەيىرىمدى (اللا) تارابىنان ءبىر سىيلىق»، – دەيدى»، – دەپ باياندالادى. عۇلامالار «بۇل اياتتار پەرىشتەلەردىڭ ءولىم الدىندا ءمۇمىندى سۇيىنشىلەيتىندىگىن بايانداي كەلگەن» دەيدى. كاپىردىڭ ءجانتاسىلىم ەتۋى كاپىر مەن زالىم ادامنىڭ ءجانتاسىلىم ەتۋى اسا اۋىر جاعدايدا وتەدى. بۇل جايىندا پايعامبارىمىز (س.ا.س.): «راسىندا، كاپىر پەندە دۇنيەدەن كەتىپ، اقىرەتكە بارارىندا وعان كوكتەن جۇزدەرى قارا ءتۇستى، دورەكى، قاتىگەز پەرىشتەلەر تۇسەدى. ولارمەن بىرگە توزاقتان «ماسۋح» بولادى. (پەرىشتەلەر) ونىڭ كوز الدىنا كەلىپ وتىرادى. ودان سوڭ ءولىم پەرىشتەسى كەلەدى دە، ونىڭ باس جاعىنا وتىرىپ: «ەي، سۇمپايى ءناپسى! اللانىڭ اشۋ-ىزاسىنا قاراي شىق!» – دەيدى. سول ساتتە ونىڭ رۋحى دەنەسىنەن (اعزا-اعزاسىنا) ءبولىنىپ تاراپ كەتەدى. (ءولىم پەرىشتەسى) ونى سۋلى ءجۇننىڭ اراسىنان تىكەنەكتى بۇتاق سۋىرعانداي ەتىپ سۋىرادى. ونىمەن بىرگە قان تامىرلارى مەن جۇيكە تالشىقتارى بىرت-بىرت ۇزىلەدى»، – دەگەن. دەگەنمەن بۇل جاعدايلاردى جانى شىعىپ جاتقان ادامنىڭ قاسىنداعىلار بايقامايدى. اللا تاعالا بۇل ءساتتى قۇراندا سيپاتتاپ: «جان جۇتقىنشاققا كەلگەن كەزدە سول ۋاقىتتا سەندەر قاراپ تۇراسىڭدار. نەگىزىندە، ول (ءولىپ بارا جاتقانعا) ءبىز جاقىنىراقپىز. ءبىراق سەندەر كورمەيسىڭدەر»، – دەگەن. اياتتا باياندالعانداي، ءبىز ءۇشىن بۇل جاعداي كومەس. ەگەر ادام بالاسى بۇل جايتتى كوزىمەن كورسە نە سەزىنسە، ونىڭ ومىرگە دەگەن قۇلشىنىسى مۇلدەم جوعالار ەدى. اللا تاعالا: «جوق! ولاي ەمەس! جان القىمعا كەلگەن كەزدە (سوندا): «كىم دەم سالادى؟» – دەلىنەدى. ول، شىن مانىندە، ايىرىلۋ ەكەنىن سەزەدى. بالتىرى بالتىرىنا ايقاسادى. ول كۇنى راببى جاققا ايدالادى»، – دەگەن. سونداي-اق ءبادىر شايقاسىندا ولگەن مۇشرىكتەر جايلى قۇران اياتى كەلگەن. وندا اللا تاعالا: «پەرىشتەلەر، سونداي كاپىرلەردىڭ بەتتەرىنە، ارقالارىنا ۇرىپ: «كۇيدىرەتىن ازاپتى تاتىڭدار!» – دەپ جاندارىن العانىن كورسەڭ! بۇل بۇرىنعى ءوز قولدارىڭمەن ىستەگەندەرىڭنىڭ سالدارىنان. اللا قۇلدارىنا زۇلىمدىق ەتۋشى ەمەس»، – دەپ بايانداعان. يبن كاسير جانە وزگە دە كوپتەگەن عالىمدار بۇل ءسوزدىڭ جالپى كاپىر اتاۋلىعا قاتىستى ەكەنىن ايتقان. اللا تاعالا كاپىرلەردىڭ جاندارىنىڭ قالاي شىعاتىنىن جانە ولاردىڭ ولىممەن ارپالىسۋىن: «اللانى جالعانعا شىعارعان نەمەسە وزىنە ەشبىر ۋاحي ەتىلمەسە دە: «ماعان ۋاحي ەتىلدى»، – دەگەن جانە: «اللا تۇسىرگەن سياقتىنى مەن دە تۇسىرەم»، – دەگەننەن كىم زالىمىراق؟ (مۇحاممەد!) زالىمداردى ءولىم ارپالىسىندا پەرىشتەلەر قولدارىن سوزىپ: «جاندارىڭدى شىعارىڭدار! بۇگىن اللاعا قارسى ورىنسىز سويلەگەندەرىڭ، ونىڭ اياتتارىنا مەنمەنسىگەندەرىڭ سەبەپتى قورلاۋشى ازاپپەن جازالاناسىڭدار»، – دەگەندە ءبىر كورسەڭ!» – دەپ اڭگىمەلەيدى.
"اقىرەت وتكەلدەرى" كىتابىنان
