ۇستىمىزدەگى جىلدىڭ 22 ناۋرىزىندا «قامشى» اقپاراتتىق اگەنتتىگىنىڭ بەتىندە «ماڭعىستاۋ وبلىسىندا ءىرى شەنەۋنىك ۇرىلارمەن سىبايلاس بولعان» دەگەن اتاۋمەن ماقالا جاريالانعان.
«قامشى» ەركىن وي-پىكىر الاڭى بولعاندىقتان رەداكسيا پوشتاسىنا حات جولداپ، ماسەلە كوتەرەتىندەر از ەمەس. ماتەريالدى جىبەرۋشىلەر سايت پوشتاسىنا اقپارىن ءانونيمدى تۇردە جىبەرگەن. سونداي-اق ماتەريالدا ناقتى اۆتور كورسەتىلمەگەن. كەلگەن حاتتىڭ ەلباسى ن.نازاربايەۆ، ق ر باس پروكۋرورى ج.اسانوۆ، ق ر پرەمەر-مينيسترى ب.ساعىنتايەۆتىڭ، قاسىموۆ پەن ءماسىموۆتىڭ، ماڭعىستاۋ وبلىسىنىڭ جاڭا تاعايىندالعان اكىمى، ت.س.س. قۇزىرەتتى بيلىك باسىنداعىلاردىڭ بارلىعىنىڭ نازارىنا جازىلعاندىعى جۋرناليستكە ماتەريالدى جاريالاۋعا نەگىز بولعان.
الايدا، ماتەريالدا اتى اتالعان شەنەۋنىك ماڭعىستاۋ وبلىستىق ءىىد اكب جول ءجۇرىسىن باقىلاۋ بولىمشەسىنىڭ باستىعى ەركىن دەگەنيازوۆ "قامشى" اقپاراتتىق اگەنتتىگىنىڭ مەنشىك يەسى «Qamshy Media» ج ش س ۇستىنەن شاعىم ءتۇسىردى. وسىعان بايلانىستى بۇگىن، 7 ساۋىردە الماتى قالالىق مەدەۋ اۋداندىق سوتتا دەگەنيازوۆتىڭ شاعىمىن قاراعان سوت وتىرىسى ءوتتى.
سوت شەشىمىنە ساي، «Qamshy Media» ج ش س پوليسيا پودپولكوۆنيگى ەركىن ەدىلۇلىنان ونى قارالايتىن نەگىزسىز ماتەريالدى جاريالاعانى ءۇشىن رەسمي تۇردە كەشىرىم سۇرايدى.
ءارى ەركىن ەدىل ۇلىنىڭ تالاپكەر رەتىندە سوتتا سۇراعان تومەندەگى شارتتارىنىڭ ورىندالعانىن حابارلايدى.
- «ماڭعىستاۋ وبلىسىندا ءىرى شەنەۋنىك ۇرىلارمەن سىبايلاس بولعان» اتتى ماتەريال سايت بەتىنەن الىنىپ تاستالدى.
- ماتەريالدى ءانونيمدى جىبەرۋشىنىڭ مالىمەتى تالاپكەرگە بەرىلدى.
تۇسىندىرە كەتەتىن بولساق، داۋعا وزەك بولعان ماتەريال سايت پوشتاسىنا ناۋرىز مەرەكەسى كۇنى كەلىپ، كەزەكشى جۋرناليست تاراپىنان بايقاۋسىزدا جاريالانىپ كەتكەن. ماتەريال جاريالانا سالا قوعامدا ءدۇمپۋ تۋعىزدى. ءانونيمدى اقپاردى جاريالاعان سايت ۇجىمى دەگەنيازوۆتىڭ قىزمەتتىك بەدەلىنە نۇقسان كەلتىرۋدى كوزدەمەگەن. الايدا، قۇزىرلى ورىندارعا باعىتتالعان ماتەريال ىشىندە پوليسيا پودپولكوۆنيگى دەگەنيازوۆتى ايىپتاۋ بەلگىلەرى بار. ماتەريالدى جازىلۋشىلار ونى "ۇرىلارمەن سىبايلاس" دەپ دالەلسىز قارالاعان. سوندىقتان دا سوتقا جۇگىنگەن تالاپكەر دەگەنيازوۆتىڭ تالاپ-ارىزى بويىنشا «قامشى» اقپاراتتىق اگەنتتى سوت شەشىمىنە كەلىسىپ، سوت الدىندا قاتەلىگىن مويىنداپ تالاپكەردىڭ تالابىن ورىندادى.
«قامشى» اقپاراتتىق اگەنتتىنىڭ باس رەداكتورى
جازيرا بايدالى
