قازاقستان مۇسىلماندارى ءدىني باسقارماسى مەشىتتە تۋعان كۇنىن وتكىزگەن قاراقات ءابىلديناعا قاتىستى جاۋاپ بەردى، دەپ حابارلايدى "قامشى" قمدب باسپا ءسوز قىزمەتىنە سىلتەمە جاساپ.

- جۋىردا ءانشى قاراقات ءابىلدينا تاراپىنان «ازىرەت سۇلتان» مەشىتىنىڭ تومەنگى قاباتىندا ورنالاسقان مەيرامحانادا قىز-كەلىنشەكتەرمەن سىرلاسۋ كەشىن وتكىزۋ تۋرالى ءوتىنىش ءتۇستى. نەبارى 30-دان استام ايەل جاماعاتى جينالعان كەزدەسۋدە قۇران وقىلدى، ۋاعىز-ناسيحات ايتىلدى، سالت-داستۇرگە ساي جورالعىلار ورىندالىپ، عيبراتتى تولعاۋ-تەرمەلەر شىرقالدى.

الايدا جيىن سوڭىندا تۋعان كۇندى اتاپ ءوتىپ، شارانى ءانشىنىڭ ەسترادالىق انىمەن قورىتىندىلاۋ تۋرالى كەلىسىم بولماعان. ويتكەنى، مۇنداي ءۇردىس – مەشىت ادەبى مەن تارتىبىنە قايشى. بۇل ماسەلە ۇيىمداستىرۋشىلارعا تۇسىندىرىلۋدە.

ايتا كەتەر نارسە، مەشىتتىڭ تومەنگى قاباتىنداعى مەيرامحانادا ءدىن مەن داستۇرگە ساي رۋحاني كەشتەر مەن ىزگىلىكتى ءىس-شارالار، قۇدايى استار، ءتىلاشار، بالاعا ات قويۋ، تۇساۋكەسەر سىندى ۇلتتىق مەرەكەلىك راسىمدەر ۇيىمداستىرىلىپ تۇرادى.

ءبىر ايتا كەتەرلىگى، مۇنداي يگىلىكتى باسقوسۋلاردىڭ داۋىسى مەن دىبىسى نەگىزگى قۇلشىلىق زالىنا ەستىلمەيدى، - دەلىنگەن حابارلامادا.