بۇعان دەيىن قازاقستانعا كوشىپ كەلە جاتىپ، «مايقاپشاعاي» شەكارا بەكەتىنەن وتەر كەزدە بار اقشاسىنان ايىرىلعان ءماۋىتحان گۇلجاننىڭ باسىنداعى قيىن جاعداي تۋرالى جازعانبىز.
بۇگىن زايسان اۋداندىق سوتىندا «مايقاپشاعاي» كەدەندىك بەكەتىندە 49 990 دوللارىنان ايىرىلىپ قالعان قانداسىمىز، گۇلجان ءماۋىتحاننىڭ ءىسى قايتا قارالدى دەپ حابارلايدى "قامشى" اقپاراتتىق اگەنتتىگى. سوت شەشىمىنە ساي، گۇلجان ءماۋىتحاننىڭ اقشاسى قايتارىلاتىن بولدى. بۇل تۋرالى قانداسىمىز گۇلجان ءماۋىتحاننىڭ باسىنداعى ماسەلەسىن العاشقىلاردىڭ ءبىرى بولىپ جازعان ۇلاربەك دالەي ۇلى ءوزىنىڭ Facebook پاراقشاسىنا قۋانا حابارلادى.
ايتا كەتەيىك، تاريحي وتانىنا كوشىپ كەلە جاتقاندا بار جيعانىنان ايىرىلىپ قالعان قانداسىمىزدىڭ قيىن جاعدايى تۋرالى ب ا ق پەن قوسا قوعام قايراتكەرلەرى، ەلگە تانىمال زاڭگەرلەر ءۇن قوسىپ، ءوز الاڭداۋشىلىقتارىن بىلدىرگەن. ولار - زاڭگەر ابزال قۇسپان، قوعام قايراتكەرى مۇحتار تايجان، ساياساتتانۋشى ەرلان سايروۆ.
