ءساۋىردىڭ 10-ى كۇنى الماتىداعى ستۋدەنتتەر سارايىندا قاجىمۇرات شەشەنقۇل ۇلىنىڭ «تۋعان ەل» اتتى شىعارماشىلىق كەش ءوتتى دەپ حابارلايدى Qamshy.kz.

كەشتى قاجىمۇرات شەشەنقۇل ۇلى ءانسامبلدىڭ سۇيەمەلدەۋىندە اندەرىمەن باستادى. كەشتىڭ وزگەشەلىگى سول ءار ءنومىر بىر-بىرىمەن بايلانىسىپ، ساحنالىق قويىلىمدارمەن ارلەندى. التايدىڭ، تارباعاتايدىڭ، ىلەنىڭ اۋەندەرى الماتى اسپانىندا شىرقاپ، ونەرگە شولىركەپ قالعان تىڭدارمان قاۋىمنىڭ ساعىنىشىن باستى.

قاجىمۇرات كەشىنە قازاقستاننىڭ كوپتەگەن ونەر جۇلدىزدارى ارنايى قوناق بولىپ، ءانشىنى ونەر كەشىمەن قۇتتىقتادى. اتاپ ايتقاندا روزا ءالقوجا، ماقسات بازارباي، ايقىن تولەپبەرگەن سياقتى انشىلەر شەشەنقۇلۇلىمەن دۋەت قۇرىپ ءان شىرقاسا، اقجول مەيىربەكوۆ، ۇشقىن جامالبەك سياقتى ونەر جۇلدىزدارى اننەن شاشۋ شاشتى.

كەشتى بەلگىلى تەلەجۋرناليستەر امان تاسىعان مەن ەرقانات كوپجاسار جۇرگىزدى. كەشتىڭ سەنارييىن قايرات قۇلمۇحامەد جازعان.  باتىس پەن شىعىسپەن ەسەڭگىرەپ كەتكەندەي بولعان ەستراداعا جاڭا لەپ اكەلگەن قاجىمۇرات شەشەنقۇل ۇلى جۇڭگو قازاقتارى اراسىندا حالىققا تانىلعان. ول 7 جىل بۇرىن اتاجۇرتقا قونىس اۋدارعان. سونداي-اق جۇرت قاجىمۇراتتى «قارا جورعانى» ءتىرىلتىپ، قازاق ساحناسىنا اكەلگەن ازامات رەتىندە دە تانيدى. «تۋعان ەل» كونسەرتىندە دە «قارا جورعا» ءبيىنىڭ تاريحى ايتىلىپ، وزگەشە ساحنالىق قويىلىممەن جۇرت نازارىنا ۇسىنىلدى.

كەشتە جۇرتقا كەڭىنەن تانىلعان «قارا جورعا» عانا ەمەس، قاجىمۇراتتىڭ «ماقپالجان»، «بۇلدىرگەن قىز»، «سەنى عانا» سياقتى جاستار جاتقا ايتىپ اندەرى دە ورىندالدى. قاجىمۇرات شەشەنقۇل ۇلى ءانشى عانا ەمەس جۇزدەن استام ءاننىڭ مۋزىكاسىن جازعان. كەش بارىسىندا ءوزى جازعان بىرنەشە ءان دە ورىندالدى. قاجىمقۇراتتىڭ روزا القوجامەن دۋەتىندە ەرجانات بايقابايدىڭ سوزىنە جازىلعان «ماڭگىلىك ساعىنىش» اتتى ءانى، ماقسات بازاربايەۆپەن ورىنداعان ايتىسكەر اقىن، تەلەجۇرگىزۋشى قاليحان قابدىراسول ۇلىنىڭ ءانى "ءاپپاعىم"  كورەرمەننىڭ ايرىقشا القاۋىنا بولەندى. 

كەش سوڭىندا ارنايى جايىلعان داستارحاندا تالعار اۋدانىنىڭ دەپۋتاتى ءابدىعاني ءبازىلحان كەش يەسىنە الماتى وبلىسى كاسىپوداقتارىنىڭ ارنايى العىس حاتىن تاپسىردى. سونداي-اق، «ەلباسى كۋرستاستارى» قورىنىڭ كەڭەسشىسى، ونەر جاناشىرى مۇحامبەتكارىم(تورعاي) ەلەۋباي انشىگە مىنگىزگەن اتىن ەرلان تولەۋباي تابىس ەتتى.

ايتا كەتسەك، بۇل كەش ءانشى ءوزىنىڭ ساحنادا جۇرگەن 15 جىلىندا العاش رەت كولەمدى كونسەرتى. اتاجۇرتقا ورالعاننان كەيىن ول ەركىن شىعارماشىلىق جۇمىسپەن اينالىسىپ كەلەدى. بىلتىر مونعوليادا بايان-ولگەيدە 1500 ادامدىق زالدا ەكى رەت كونسەرت قويعان. قوبدا ايماعىندا، بۇلعىندا، ەڭ سوڭىندا ۇلانباتىردا 2500 ادامدىق زالدا كونسەرت بەردى. سونداي-اق وتكەن جىلى ەۋروپادا گاسترولدىك ساپاردا، گەرمانيادا، كەلن قالاسىندا بولىپ، «قارا جورعا» ءانىن شىرقاپ كەلدى. وعان قوسا بىرنەشە فيلمدە ءىشىنارا رولدەر الىپ، اكتەرلىك جاعىنان دا ءوز قىرىن كورسەتتى. اتاپ ايتقاندا "حابار" ارناسىنداعى "تاعدىر تارتىسى" تەلەحيكاياسىنا ءتۇستى.

ەرلان تولەۋباي