الماتى وبلىسىندا پوليسيا ءبىر تابىن سيىردىڭ ۋلانۋى تۋرالى قىلمىستىق ءىس قوزعادى، ءىس بويىنشا 52 جاستاعى اۋىل تۇرعىنى كۇدىكتى بولىپ وتىر دەپ حابارلايدى «قامشى» اقپاراتتىق اگەنتتىگى Sputnik قازاقستان اگەنتتىگىنە سىلتەمە جاساي وتىرىپ.

7 ءساۋىر كۇنى پانفيلوۆ اۋدانى پوليسەيلەرىنە قوڭىرولەڭ اۋىلى تۇرعىنى حابارلاسىپ، مالدىڭ جاپپاي قىرىلعاندىعى تۋرالى جەتكىزدى. اۋىل تۇرعىنى ارىزىندا كورسەتكەندەي، ەكى اپتا ىشىندە بەلگىسىز سەبەپتەردەن 12 سيىرى ولگەن.

ءىرى قارا مالىنىڭ جاپپاي قىرىلۋىنا ەر ادام تۋىسقان ايەلدى ايىپتادى، ونىڭ ايتۋىنشا، ايەل ادام تابىندى بەلگىسىز زاتپەن ۋلاپتى-مىس. ءىستىڭ ءمان-جايىن انىقتاۋ بارىسىندا بەلگىلى بولعانداي، ءوزارا مۇلىك ءبولىسۋ كەزىندە ارىز بەرۋشى مەن كۇدىكتىنىڭ اراسىندا كيكىلجىڭ تۋىنداپ، ءتىپتى ۇزاق ۋاقىت بويى سوتتاسقان كورىنەدى.

دەگەنمەن، اۋداندىق پوليسياعا تۇسكەن ءوتىنىش بويىنشا تەرگەۋ باستالدى. ءتيىستى ساراپتامالار تاعايىندالىپ، سونىڭ ناتيجەسى بويىنشا پروسەستىك شەشىم شىعارىلادى. اۋىل تۇرعىنى ماتەريالدىق شىعىنىن 2،5 ميلليون تەڭگە شاماسىندا دەپ ەسەپتەپ وتىر.