استانادا ءدامحانا قىزمەتكەرلەرى كەلۋشىلەرگە ەسىرتكى ساتقان، - دەپ حابارلايدى "قامشى" اقپاراتتىق اگەنتتىگى Tengrinews.kz پورتالىنا سىلتەمە جاساپ.
بۇل جايىندا استانا قالالىق ءىىد باسپا ءسوز قىزمەتى مالىمدەمە جاسادى.
"ەلورداداعى قاۋىپسىزدىك پەن جايلىلىق" جوباسىنىڭ بارىسىندا استانا قالالىق ءىىد ەسىرتكى بيزنەسىمەن كۇرەس باسقارماسىنىڭ قىزمەتكەرلەرى ءدامحانالاردىڭ بىرىنەن ەسىرتكى ساقتاۋ مەن ونى ساتۋ دەرەگىن انىقتادى.
"ءىىد قىزمەتكەرلەرى ساۋىق كەشەنى قىزمەتكەرلەرىنىڭ "ماريحۋانا" ەسىرتكى قۇرالدارىن ساتقانىن انىقتادى. جۇمىس ورنىن تەكسەرۋ بارىسىندا ەسىرتكى زاتتارى تابىلىپ، تاركىلەندى"، - دەدى ءىىد باسپا ءسوز قىزمەتىندەگىلەر.
ۇستالعان ەر ادامدار استانا قالالىق ءىىد ۋاقىتشا ۇستاۋ يزولياتورىنا قامالدى. سوتقا دەيىنگى تەرگەۋ جۇرگىزىلىپ جاتىر. "قازىرگى ۋاقىتتا ويىن-ساۋىق كەشەنى باسشىلىعىن ق ر اكىمشىلىك قۇقىق بۇزۋشىلىق تۋرالى كودەكستىڭ 422-بابى بويىنشا ("ەسىرتكى، پسيحوتروپتىق زاتتار مەن پرەكۋرسورلاردى وتكىزۋدىڭ جانە (نەمەسە) مەديسينالىق ەمەس تۇرعىدان تۇتىنۋدىڭ جولىن كەسۋگە شارالار قولدانباۋ") اكىمشىلىك جاۋاپكەرشىلىككە تارتۋ ماسەلەسى قاراستىرىلىپ جاتىر"، - دەدى استانا قالالىق ءىىد وكىلدەرى.
