ۋكراينانىڭ قاۋىپسىزدىك قىزمەتى (ۋقق) كييەۆ قالاسىندا ادام اعزاسىن ساتۋشىلاردى قۇرىقتادى دەپ حابارلايدى «قامشى» اقپاراتتىق اگەنتتىگى ۋقق باسپا ءسوز قىزمەتىنە سىلتەمە جاساي وتىرىپ.

«ۋكراينانىڭ قاۋىپسىزدىك قىزمەتى كييەۆ قالاسىنىڭ پروسەسسۋالدى سوتىمەن بىرىگە وتىرىپ، ادام اعزاسىن ساتۋمەن اينالىساتىن حالىقارالىق قىلمىستىق توپ مۇشەلەرىن تۇتقىندادى»، - دەلىنگەن مالىمدەمەدە.

قۇقىق قورعاۋشىلاردىڭ مالىمەتىنشە، ۋكرايندىق جانە وزگە دە ەلدەردىڭ ازاماتتارى ەلدەگى جاعدايى تومەن وتباسىلاردى تاۋىپ، ولاردىڭ مۇشەلەرىنە ءوز اعزالارىن ساتۋ تۋرالى ۇسىنىس تاستاعان. ءوز ىستەرىن جاسىرۋ ماقساتىندا ولار حالىقارالىق دەنساۋلىق ءتۋريزمى باعىتىندا جۇمىس جاسايتىن كوممەرسيالىق ۇيىم اشقان. ولاردى شەتەل اسىرىپ، وتا جاساتۋ ماقساتى كوزدەلگەن. جىلىنا 4-5 ۋكرايندىق شەتەلگە شىعىپ وتىرعان.

اعزاعا تاپسىرىس بەرۋشىلەردەن سەكسەن مىڭ مەن ءجۇز مىڭ اقش دوللارى كولەمىندە اقشا الىپ، ونىڭ تەك ون بەس مىڭىن اعزاسىن بەرۋشىلەرگە ۇستاتقان.

قىلمىستىق توپتىڭ تەك التى مۇشەسى عانا ۇستالعان. ەندى ولار 8-15 جىل كولەمىندە باس بوستاندىعىنان ايىرىلادى.

قىلمىستىق ىسكە بايلانىستى تەرگەۋ ءالى دە جالعاسۋدا.