يندونەزيا بيلىگى ەل استاناسىن دجاكارتادان باسقا قالاعا كوشىرمەك. بۇل تۋرالى reactor.inform.kz جەرگىلىكتى باق-قا سىلتەمە جاساپ حابارلايدى.

بۇل ماسەلە كوپتەن بەرى تالقىعا سالىنعان بولاتىن. ءبىراق بيلىك ناقتى ءىستى ەندى عانا قولعا الىپ وتىر.

استاناعا لايىق-اۋ دەگەن بىرنەشە قالالار قاراستىرىلۋدا. سونىڭ ءبىرى ورتالىق كاليمانتان پروۆينسياسىندا ورنالاسقان پالانكاراايا قالاسى. نازارعا ىلىككەن قالالاردىڭ ءبارى دجاكارتا قالاسى ورنالاسقان ياۆا ارالىنان تىس جەردە. ناقتى شەشىم جىل سوڭىنا دەيىن قابىلدانباق.

ەل استاناسىن اۋىستىرۋ ماسەلەسىن 1945-1967 جىلدارى پرەزيدەنت بولعان سۋكارنو دا كوتەرگەن.

استانانى اۋىستىرۋعا ەڭ باستى سەبەپ حالىقتىڭ كوپتىگى بولىپ وتىر. قالاداعى كەپتەلىستەن كولىك جۇرگىسىز. ياۆا ارالى يندونەزيا اۋماعىنىڭ 7% قۇرايدى. ال مۇندا ەلدەگى 245 ملن حالىقتىڭ 60% تۇرادى.

ەكىنشى ءبىر سەبەپ دجاكارتانىڭ جاعالاۋدا ورنالاسۋى. ماۋسىمدىق جاۋىن-شاشىن كەزىندە سۋ تاسقىنىنان زارداپ شەگەدى. سونداي-اق قازىرگى استانا سەيسميكالىق ءقاۋپى جوعارى جەردە تۇر.