شەكارادا 50 مىڭ دوللارىنان ايرىلعان جالعىزباستى ايەلدىڭ ىسىنە قاتىستى العاشقى سوت ۇكىمى شىقتى. قىتايداعى ءۇيىن ساتىپ، قازاقستاننان باسپانا الامىن دەپ كەلە جاتقاندا "كونترابانداشى" اتانعان گۇلجان ءماۋىتحانعا 9 900 دوللارى عانا قايتارىلاتىن بولدى دەپ حابارلايدى "قامشى" اقپاراتتىق اگەنتتىگى 31.kz-كە سىلتەمە جاساپ.

الايدا، شىعىس قازاقستان وبلىسى زايسان اۋداندىق سوتى جالعىزباستى ايەلدى 234-باپ بويىنشا ايىپتى دەپ تانىعان. سونداي-اق، 68 مىڭ تەڭگە ايىپپۇل سالىپتى. ال، قالعان 40 مىڭ دوللار ازىرگە مەملەكەتكە كىرىس بولىپ بەكىتىلگەن. 

ايتا كەتەيىك، قانداسىمىزدىڭ باسىنداعى قيىن جاعداي "قامشى" اقپاراتتىق اگەنتتىگىنىڭ نازارىنان تىس قالماعان. بۇعان دەيىن گۇلجان ءماۋىتحاننىڭ اقشاسى قايتارىلاتىنىن قۋانا حابارلاعانبىز. بەلگىلى بولعانداي، سوت تەك 9 900 دوللارىن عانا قايتارىپ بەرۋ تۋرالى شەشىم شىعارىپتى. الايدا ءوز اقشاسىن تولىقتاي قايتارۋ ءۇشىن گۇلجان ءماۋىتحان ەندى جوعارى ينستانسيالارعا جۇگىنبەكشى ەكەن. ءىس وڭ شەشىمىن تابادى دەپ سەنەمىز. الداعى ۋاقىتتا دا قانداسىمىز گۇلجان ءماۋىتحانعا قاتىستى  اقپاراتتى وقىرمانعا حابارلاپ وتىرامىز.