وقو اكىمى: ەلباسى قازاقستاندىقتاردى ەسكى ادەتتەر مەن ەرەجەلەردەن باس تارتۋعا شاقىردى. بۇل تۋرالى وڭتۇستىك قازاقستان وبلىسىنىڭ اكىمى ج.تۇيمەبايەۆ ارداگەرلەر قوزعالىسىنىڭ 30 جىلدىعىنا وراي ۇيىمداستىرىلعان مەرەكەلىك شارادا ايتتى، دەپ حابارلايدى «قامشى» اقپاراتتىق اگەنتتىگى وقو اكىمىنىڭ باسپا ءسوز قىزمەتىنە سىلتەمە جاساي وتىرىپ.

شارا بارىسىندا ايماق باسشىسى ق ر پرەزيدەنتى نۇرسۇلتان ءابىش ۇلى نازاربايەۆتىڭ «بولاشاققا باعىت: رۋحاني جاڭعىرۋ» ماقالاسى تۋرالى ءسوز قوزعاپ، ونداعى يدەيالاردىڭ ماڭگىلىك ەل مۇراتىنا جەتۋدەگى ناقتى، ايقىن قادامدارى ەكەنىن ايشىقتادى.

«پرەزيدەنت ماقالانىڭ كىرىسپە بولىمىندە قازاقستاندىقتارعا وسى جىلدىڭ باسىندا مەملەكەتتىڭ ءۇشىنشى جاڭعىرۋىنىڭ باستالعانىن ەسكە سالدى. جاڭعىرۋدىڭ ماقساتى - قازاقستاننىڭ العاشقى 30 دامىعان مەملەكەتتەردىڭ قاتارىنا كىرۋى. ەلباسىنىڭ ايتۋىنشا، اتالعان ماقساتقا قول جەتكىزۋ ءۇشىن جەكە ادامداردىڭ عانا ەمەس، بۇكىل ەلدىڭ باسەكەلەستىككە قابىلەتتىلىگىن ارتتىرۋ قاجەت. ول قازاقستاندىقتاردى ەسكى ادەتتەر مەن ەرەجەلەردەن باس تارتىپ، پراگماتيك بولۋعا شاقىرادى. سەبەبى، بۇل وزگەرىس مەملەكەتتىڭ مودەرنيزاسياسىنا ۇلكەن ۇلەس قوسادى»،-دەدى اكىم.

ارداگەرلەر كەڭەسىنىڭ قۇرىلعانىنا 30 جىل تولۋ مەرەكەسىنە وراي ۇيىمداستىرىلعان شارانىڭ العاشقى باستاماسى ەكەنىن ايتقان وبلىس اكىمى باسقوسۋعا وڭىرىمىزگە ەڭبەگى سىڭگەن، رەسپۋبليكاعا بەلگىلى، ءار سالادا ۇزاق جىلدار بويى قىزمەت ەتكەن ارداگەرلەر كەلىپ وتىرعانىن اتاپ ءوتتى. سونىمەن بىرگە، بۇگىنگى ەلباسىنىڭ وي تولعانىسىن ابىز اقساقالداردىڭ اراسىندا تالقىلاپ، ونى كەلەشەك ۇرپاققا ۇعىندىرۋدا قازىنالى قاريالارعا ارتىلار جۇكتىڭ باسىم ەكەنىن جەتكىزدى.

«حالىقتى تولعاندىرىپ جۇرگەن ماسەلەلەرىنىڭ بارلىعى وسى كولەمدى ماقالادا ورىن تاپقان. سىزدەردىڭ ومىردەن العان ۇلكەن تاجىريبەلەرىڭىزدى ەسكەرە وتىرىپ، مەملەكەت باسشىسىنىڭ وسىناۋ رۋحاني جاڭعىرۋ تۋرالى ماقالاسىن باسشىلىققا الۋ ارقىلى قوعامعا جەتۋىن قولعا الساڭىزدار دەگەن تىلەگىم بار. وبلىسىمىزدىڭ ەكونوميكاسىن، مادەنيەتى مەن ءبىلىمىن ارمەن قاراي دامىتۋدا وسى ماقالا قاجەتتى باعىت-باعدار بەرەتىن بولادى»،-دەدى ج.تۇيمەبايەۆ.