كۇنى كەشە ەلباسىمىز نۇرسۇلتان ءابىش ۇلىنىڭ «بولاشاققا باعدار: رۋحاني جاڭعىرۋ» ماقالاسى جاريالانعان بولاتىن. سوعان بايلانىستى «قامشىنىڭ» حات قورجىنىنا اەسي ساراپشىسى سەرىك بەيسەمبايەۆتىڭ ساراپتاماسى كەلىپ ءتۇستى. وقىرمان نازارىنا ۇسىنامىز.

 «پرەزيدەنتتىڭ «بولاشاققا باعدار: رۋحاني جاڭعىرۋ» ماقالاسى بيلىكتىڭ جاڭا يدەولوگيالىق پلاتفورما قالىپتاستىرۋعا بەت الۋىنىڭ نىشانى. بۇل پلاتفورمانىڭ نەگىزىندە جاڭا زامان اعىمىنا سايكەس وزگەرۋگە دايىن بولۋ يدەياسىنىڭ جاتۋى وتە قۇپتارلىق نارسە. بىزدە كوپ ۋاقىت بويى دامىعان ەلدەردىڭ قاتارىنا كىرۋ تەك ەكونوميكالىق دامۋ مەن جاڭا تەحنولوگيالار ارقىلى جۇزەگە اسادى دەگەن شولاق تۇسىنىك بولدى. ياعني، ءبىز باي بولساق جانە سمارتفوندى پايدالانساق الدىڭعى قاتارلى ەلگە اينالامىز دەگەن سياقتى. الايدا، دامۋدىڭ ەڭ ءبىرىنشى العىشارتى – بۇل مادەنيەت پەن قۇندىلىقتاردىڭ وزگەرۋى. جاڭاشا ويلاۋ بولماسا، دامۋ دا بولمايتىندىعى ءبىزدىڭ جانە اينالامىزداعى كورشىلەرىمىزدىڭ تاجىريبەسى كورسەتىپ وتىر.

قازاق قوعامىندا سوڭعى 10-15 جىلدار ىشىندە كۇردەلى وزگەرىستەر ورىن الدى. ءال-اۋقاتتىڭ ارتۋى جانە قالا حالقىنىڭ كوبەيۋى جاڭاشا ويلايتىن الەۋمەتتىك توپتىڭ پايدا بولۋىنا الىپ كەلدى. ءدال وسى توپ ءۇشىن پرەزيدەنتتىڭ ماقالاسىندا ايتىلعان پراگماتيزم، باسەكەگە قابىلەت، اشىقتىق سەكىلدى قۇندىلىقتار ماڭىزدى بولىپ تابىلادى. بۇلار كوبىنەسە جاقسى ءبىلىم العان، بىرنەشە ءتىل بىلەتىن، ءوز ءداستۇرى مەن قاتار زاماناۋي ءومىر سالتىن ۇستاناتىن جاڭا قازاقتار بۋىنى. جانە ءبىر ەرەكشەلىك – بۇلار ەلدەگى قوعامدىق-ساياسي ومىرگە ىقپال ەتۋگە مۇددەلى بەلسەندى توپ. بيلىكتىڭ جاڭا يدەولوگيانى دامىتۋى ارقىلى ءدال وسى توپقا سۇيەنۋىنە مۇمكىندىگى بار.

قازىرگى جاھاندىق وزگەرىستەر كەزەڭىندە ءار مەملەكەت وزىندىك ۇستانىمىن قالىپتاستىرۋ ۇستىندە. بۇل وزگەرىستەرگە ۇركە قاراپ، يزولياسيا ارقىلى ءوزىمىزدىڭ بىرەگەيلىگىمىزدى ساقتاپ قالامىز دەگەن سەكىلدى يدەيالار – بۇل بۇكىل ەلدى ارتقا سۇيرەيتىن وتە ءقاۋىپتى ميف. قازاقستانداعى جوعارعى بيلىك، ماقالاعا سۇيەنسەك، پروگرەسس پەن اشىقتىق جولىن تاڭداپ وتىر. ءبىراق، ەندىگى ماسەلە - ماقالادا ايتىلقان يدەيالاردىڭ ساياسي شىنايىلىققا اينالۋى»

سەرىك بەيسەمبايەۆ، اەسي ساراپشىسى