لوندوندا 12 ساۋىردە جۇزدەگەن ادام رەسەي ەلشىلىگى الدىنا جينالىپ، شەشەنستاندا "گەيلەردى ازاپتاپ، ءولتىرۋ" وقيعالارىنا قارسىلىق تانىتتى، دەپ جازادى ازاتتىق.

 بۇعان دەيىن رەسەيلىك ب ا ق پەن قۇقىق قورعاۋ ۇيىمدارى شەشەنستاندا گوموسەكسۋاليستەرگە قارسى ناۋقان باستالعانىن جانە گەيلەردى "كونسەنتراسيالىق لاگەرلەرگە" قاماپ جاتقانىن حابارلاعان. كەيبىر اقپاراتتارعا قاراعاندا، بۇل لاگەرلەردە ءجۇز شاقتى ادام ۇستالىپ وتىر، كەم دەگەندە ءۇش ادام قازا تاپقان.

لوندوندا لگبت (لەسبي، گەي، بيسەكسۋال، ترانسگەندەر) قاۋىمداستىعىن بەينەلەيتىن تۋ ۇستاعان دەمونسترانتتار "لاگەرلەردى جابىڭدار" دەپ ۇرانداتىپ، اكسيا وتكىزگەن ورىنعا قىزعىلت گۇلدەر قويدى. اكسيا جانىنان ءوتىپ بارا جاتقان كولىكتەر ولاردى قولدايتىنىن ءبىلدىرىپ، سيگنال بەردى. "بىزبەن بىردەي قۇقىقتارى جوق ادامداردى قورعاعانىمىز ءجون" دەدى نارازىلىقتى ۇيىمداستىرۋشى ستيۆ تەفلور Reuters اگەنتتىگىنە. شەشەنستاندا جىنىستىق ازشىلىق وكىلدەرىنە قارسى قۋعىن-سۇرگىندى تەكسەرۋدى سۇراعان ونلاين-پەتيسياعا 70 مىڭعا تارتا ادام قول قويعان.

شەشەنستانداعى جىنىستىق ازشىلىق وكىلدەرى مەن وعان كۇدىكتىلەردى جاپپاي قۋعىنداۋ كامپانياسىنىڭ باستالعانى جايلى 1 ساۋىردە رەسەيلىك "نوۆايا گازەتا" حابارلاعان. باسىلىمنىڭ اقپاراتىنا قاراعاندا، شەشەنستان بيلىگى گوموسەكسۋاليستەردى "تازالاپ" جاتىر. شەشەنستان ىشكى ىستەر مينيسترلىگى بۇل اقپاراتتى "ءبىرىنشى ءساۋىر كۇنگى ءازىل" دەپ اتادى. ال شەشەنستاننىڭ كرەمل قولدايتىن باسشىسى رامزان قادىروۆ ءوزى باسقاراتىن رەسپۋبليكادا "گوموسەكسۋاليستەر جوعىن" مالىمدەگەن.