استانا قالاسىن اباتتاندىرۋ، كوگالداندىرۋ جانە سانيتارلىق تازالاۋ بويىنشا جۇمىستاردى ۋاقىتىلى ۇيلەستىرۋ ماقساتىندا 2017 جىلدىڭ 15 ساۋىرىنەن 15 مامىرىنا دەيىنگى كەزەڭدە ەكولوگيالىق ايلىق وتكىزىلەدى، دەپ حابارلايدى قامشى اقپاراتتىق اگەنتتىگى astana.gov.kz-كە سىلتەمە جاساي وتىرىپ.
ونىڭ شەڭبەرىندە 29 ءساۋىر مەن 13 مامىر كۇندەرى ەلوردادا «ءبىز تازا قالا ءۇشىن!» جالپىقالالىق سەنبىلىكتەردى وتكىزۋ جوسپارلانعان. سونداي-اق، ەلوردا اكىمىنىڭ تاپسىرماسى بويىنشا ەكولوگيالىق ايلىقتى جانە جالپىقالالىق سەنبىلىكتى وتكىزۋ بويىنشا شتاب قۇرىلىپ، ونىڭ قۇرامىنا قالا اكىمىنىڭ ورىنباسارلارى جانە قالالىق باسقارمالار مەن قىزمەتتەردىڭ باسشىلارى ەندى.
ەكولوگيالىق ايلىق وتەتىن كەزەڭدە ءبىلىم مەن دەنساۋلىق ساقتاۋ مەكەمەلەرىنە بەكىتىلگەن اۋماقتاردى جۇيەلى تۇردە تازارتۋ، كوگالداندىرۋ ۇيىمداستىرىلادى. سونداي-اق، سۋ نىساندارىنىڭ مۇناي ونىمدەرىمەن، تۇرمىستىق جانە وندىرىستىك قالدىقتارمەن لاستانۋىن بولدىرماۋ ماقساتىندا اتالعان نىسانداردى تۇراقتى باقىلاۋعا الۋ كوزدەلگەن.
ەكولوگيالىق ايلىق بارىسىندا جەكە تۇرعىن ءۇي ورامدارىندا تۇرمىستىق قالدىقتاردى ورتالىقتاندىرىلعان جيناۋ جۇمىستارى قامتاماسىز ەتىلەدى، قوعامدىق كولىكتىڭ سانيتارلىق جاعدايى تەكسەرىلەدى.
اۋداندار اكىمدەرىنىڭ اپپاراتتارى، قالالىق باسقارمالار، كوممۋنالدىق كاسىپورىندار بۇل جۇمىستارعا 100 مىڭنان اسا ادامدى، 4 452 مەملەكەتتىك مەكەمەنى تارتۋدى جوسپارلاپ وتىر. ەكولوگيالىق ايلىققا قاتىساتىن مەكەمەلەردىڭ اراسىندا كاسىپورىندار، دەنساۋلىق ساقتاۋ نىساندارى، ورتا مەكتەپتەر، جوو، قۇرىلىس ۇيىمدارى، شاعىن جانە ورتا بيزنەس نىساندارى بار. سونىمەن بىرگە، 425 دانا ارنايى تەحنيكا مەن 15 مىڭنان اسا قۇرال پايدالانىلادى. سەنبىلىك بارىسىندا قالانىڭ اۋماعىن سانيتارلىق تازارتۋ، اعاش كوشەتتەرىن وتىرعىزۋ، اۋلالاردى جانە ورامىشىلىك اۋماقتاردى اباتتاندىرۋ، شاعىن ارحيتەكتۋرالىق فورمالاردى ورناتۋ، تروتۋارلاردى كەڭەيتۋ جوسپارلانعان.
سونداي-اق، قالانىڭ بارلىق اۋداندارىندا زاڭسىز قوقىس ورىندارى جويىلىپ، قوسىمشا جارىقتاندىرۋ تىرەكتەرى ورناتىلادى، كوشەلەر اباتتاندىرىلىپ، اسفالت جابىنى جاڭارتىلادى.
جالپى، قالا بويىنشا 6750 اعاش وتىرعىزۋ جوسپارلانعان، سونىڭ 1750ء-ى ءىرى كولەمدى كوشەتتەر بولسا، اشىق تامىرلى 5000 وسىمدىك وتىرعىزىلادى.
بۇعان قوسا، ەسىل، اقبۇلاق، سارىبۇلاق وزەندەرىنىڭ ارنالارىن سانيتارلىق تازارتۋ جوسپارلانعان، اتالعان جۇمىستارعا جوعارى وقۋ ورىندارىنىڭ ستۋدەنتتەرى مەن اسكەري بولىمشەلەردىڭ اسكەري قىزمەتكەرلەرى تارتىلادى.
قالا بيلىگى قالالىق جانە رەسپۋبليكالىق ۇيىمداردىڭ قاتىسۋىمەن اعاش وتىرعىزۋ شارالارىنا، قالاعا قوسىلعان ەلدى مەكەندەردىڭ اۋماعىن سانيتارلىق تازارتۋعا ەرەكشە نازار اۋدارادى.
اتاپ ايتقاندا، «الماتى» اۋدانىندا ميچۋرينو تۇرعىن الابىندا - 200 اعاش، ترياتلون پاركىندە - 100، جەلەزنودوروجنىي تۇرعىن الابىندا 200 اعاش وتىرعىزىلادى، 2500 كوشەتتى كاسىپكەرلەرگە تاراتۋ جوسپارلانعان.
ەسىل اۋدانىندا «قازترانسويل» كومپانياسى ۇلى دالا كوشەسىندە تۇران داڭعىلىنان باستاپ ماڭگىلىك ەل داڭعىلىنا دەيىن 1000 اعاش وتىرعىزۋدى كوزدەپ وتىر، ال «وپەراتور روپ» كومپانياسى عاشىقتار باعىندا 150 اعاش، اراي باعىندا 50 كوشەت وتىرعىزباق. شىعىس يلينكا جانە تەلمان كەنتتەرى دە قامتىلادى. سارىبۇلاق بۇلاعى جاعاسىنىڭ بويىمەن 250 اعاش وتىرعىزىلادى. سارىارقا اۋدانىندا كوگالداندىرۋ جۇمىستارىمەن كوكتال-1، كوكتال-2، ءوندىرىس تۇرعىن الاپتارى دا قامتىلادى.
