فەيسبۋك قولدانۋشىسى قاجىمۇقان عابدوللا ءوز پاراقشاسىندا لاۋازىمدى تۇلعالار نازارىنا حات جازىپ، جۇرتشىلىقتان كومەك سۇرادى، دەپ حابارلايدى قامشى اا. 

مەن قازاق ەلىنىڭ قاتارداعى ءبىر قاراپايىم ازاماتىمىن. كەز كەلگەن پەندەنىڭ باسىنداعى جاعدايلار مەنىڭ باسىمدا دا بار. بىلتىر مەن ومىرلىك قوساعىم، ءۇش بالامنىڭ اناسى قىمبات وتەگەنوۆادان كەنەتتەن ايىرىلىپ قالدىم. ويلاماعان جەردەن قاسىرەت شەگىپ، «دسپ» دياگنوزىمەن اۋىراتىن ءبىر ۇل مەن ءبىر قىزىم جانە ۇلكەن ۇلىم، قىسقاسى، ءۇش بالاممەن قالدىم. قولىمدا جاسى 80-گە جاقىنداعان انام بار...

...دۇيسەنبى كۇنى، ياعني، 17 ساۋىردە تۇسكى ساعات ساعات 12.30-دا مەنىڭ ورال قالاسىنداعى (مۇحيت كوشەسى 64ء-ۇي) جەكە ءۇيىمنىڭ گازىن «قازترانسگاز ايماق» اق باتىس قازاقستان وندىرىستىك بولىمشەسىنىڭ ەسكەنديروۆ دەگەن ءبىر جۇمىسشىسى انام بالالارعا تاماق ءپىسىرىپ جاتىرعان كەزدە (الدىن الا ەش ەسكەرتۋسىز) ايىرىپ كەتىپتى. قاريا انامنىڭ «مەن ءقازىر اقشاڭدى قولما-قول تولەيىڭ» دەگەنىنە دە كونبەي، دورەكى سويلەپ، ءتىپتى، اۋىزىنا كەلگەن بوقتىق سوزدەر ايتىپتى. ەسكەنديروۆ زەينەتاقىسى شايلىعىنا ازەر جەتىپ وتىرعان قارت انامنىڭ جىلاعانىنا قاراماعانىمەن، ءسوز اراسىندا: «قاسىمدا باستىقتارىم بار» دەپ، پارا سۇراعانداي يشارات جاساپتى. قورلانعان انام، شاراسىز كۇيدە قالا بەرگەن...

مەن دەرەۋ «قازترانسگاز ايماق» اق باتىس قازاقتان وندىرىستىك بولىمشەسىنىڭ ورال قالاسىنداعى كەڭسەسىنە باردىم. «قازترانسگاز ايماق» اق باتىس قازاقتان وندىرىستىك بولىمشەسىنىڭ ديرەكتورى ازيمبەك ازيمبايەۆيچ اساروۆ ەڭبەك دەمالىسىندا (وتىرىك-شىنىن ءبىر قۇداي بىلەدى؟!. ق.ع.) ەكەن، مەن «قازترانسگاز ايماق» اق باتىس قازاقستان وندىرىستىك بولىمشەسى ديرەكتورىنىڭ ءبىرىنشى ورىنباسارى اسىلبەك تەميرxانوۆيچ كايبالييەۆكە ارنايى كىرىپ، بار شىندىقتى: ءوزىمنىڭ گاز قىزمەتىنە قارىزىمدى بىلمەي قالعانىمدى، ەشقانداي ەسكەرتۋدىڭ بولماعانىن، ءوز قارىزىمدى تولەۋدەن باس تارتپايتىنىمدى، تەك، اناۋ ورىنسىز ۇستەمەلەنگەن قوماقتى قارجىنى قۇرايتىن «گازدى قايتا قوسۋ» ءۇشىن 10 000 تەڭگە تولەۋ كەرەك دەگەندى الىپ تاستاۋىن سۇراپ، وتباسىلىق جاعدايىمدى دا اشىق ايتتىم. اسىلبەك كايبالييەۆ: «جارايدى، ءبىرىنشى قاباتتا كۇتىڭىز، كومەكتەسەمىز» – دەپ ۋادەسىن بەردى. مەن دە ريزا كوڭىلمەن العىسىمدى ايتتىم...

ءبىراز ۋاقىتتان كەيىن رەناتا دەگەن قىزمەتكەر كەلىپ: «17 880 تەڭگە ناقتى قارىزىڭىزدى تولەڭىز، گازىڭىزدى بۇگىن قوسادى» – دەدى. مەن دەرەۋ سۇراعان اقشاسىن تولەپ، ۇيگە قايتتىم. سويتسەم مەننەن اسىلبەك تەميرحانوۆيچ الداپ قۇتىلعان ەكەن. ارادا كوپ وتپەي الگى رەناتا دەگەن قىزمەتكەر ماعان قايتارا حابارلاسىپ: «ءسىزدىڭ گازىڭىزدى قوسپايتىن بولدىق، «گازدى قايتا قوسۋ»-عا (زا پودكليۋچەنيە) قوسىمشا 10 مىڭ تەڭگە تولەمەسەڭىز، «گازدى قوسپايمىز» دەپ جاتىر باستىق. مۇمكىن احمەتوۆ ەرلان دەگەن تاعى ءبىر باستىق بار سوعان بارارسىز، ول كىسى كومەكتەسەر» – دەيدى...

ولاردىڭ وزدەرى ءبىر ءمينوتتىڭ ىشىندە جاۋ قۋعانداي اجىراتىپ كەتكەن گاز قۇبىرىن قايتا قوسۋ ءۇشىن مەن قوسىمشا 10 مىڭ تەڭگە اقشا تولەۋىم كەرەك ەكەن. بۇل قانداي زاڭ؟ نەندەي ءتارتىپ؟ كىمدى باسىنعاندىق؟

ءبىز زاڭدى، قۇقىقتىلىقتى، كەز كەلگەن قوعامنىڭ ەڭ قىمبات بايلىعى سانالاتىن ادامداردىڭ قۇقىقتارىن ساقتاۋعا ۇمتىلعان مەملەكەتتە تۇرىپ جاتىرمىز با، الدە، اركىم، ءار مەكەمە ويىنا كەلگەندى ىستەيتىن، ادامنىڭ قۇقىقتارىن تابانعا تاپتايتىن بەرەكەسىز كەڭىستىكتە تۇرىپ جاتىرمىز با؟

جارايدى، گاز قىزمەتىنە قارىز بولىپ قالىپپىز، ونىڭ تولەمدەرىن اي سايىن قاداعالايتىن ادامدار قايدا ءجۇر؟ ءار وتباسىنىڭ الەۋمەتتىك قاۋقارى دا ءارقالاي، ءقازىر ەكىنىڭ ءبىرى – جۇمىسسىز، تۋرام نانعا تيىن تاپپايتىندار دا جوق ەمەس، ەندەشە، بىزگە الدىن-الا كەلىپ، ءجاي سوزبەن نەگە ەسكەرتپەيدى؟ ءتىپتى، قارىز تولەمدى جابۋعا ۋاقىت پەن مۇرسات نەگە بەرىلمەيدى؟..

ادامشىلىق جاناشىرلىق، مەيىرىم مەن قايىرىم سەزىمدەرى قايدا كەتتى؟ «نارىق» ەكەن دەپ، ءبىر-بىرىمىزدى تاپتاۋىمىز كەرەك پە؟ «اقشا تابامىز» دەگەن ماقساتپەن ايۋانعا اينالۋىمىز كەرەك پە؟ زاڭنىڭ ادىلەتتى ورىندالۋىن قاداعالايتىن پروكۋرورلارىمىز قايدا ءجۇر؟

كەرەك دەسەڭىز، «قارىزىمدى قايتارمايمىن» دەپ، قاشىپ جۇرگەن ەشكىم جوق. ازداعان ۋاقىت پەن بولماشى مۇرسات سۇرايدى. ەلباسىمىز نۇرسۇلتان نازاربايەۆتىڭ ءوزى: «وتاندىق كاسىپورىنداردىڭ باسشىلارىن الەۋمەتتىك زاڭنامانى ورىنداماعاندارى ءۇشىن جاۋاپقا تارتۋدى كۇشەيتۋ كەرەك. جەكەمەنشىك بولعانىمەن، ءوز زاڭدارىن بەكىتىپ، ۋشىقتىرۋعا ەشكىمنىڭ قۇقى جوق» – دەگەن دەمەپ پە ەدى؟!.

ەلىمىزدىڭ پرەزيدەنتى ءتورت جىل بۇرىن ءوزىنىڭ جارلىعىمەن تۇتىنۋشىلار قۇقىقتارىن قورعاۋ اگەنتتىگىن قۇرىپ، ءۇش جىل بۇرىن بۇل ورگان ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتى بولىپ، قايتا قۇرىلدى. مەملەكەت باسشىسىنىڭ سونداعى باستى ماقساتى – ادامداردىڭ قۇقىقتارىن قورعاۋ ەدى عوي!

ەلىمىزدىڭ بۇگىنگى باس پروكۋرورى ج.ق.اسانوۆتىڭ تىڭ باستامالارى كوپ ازامات سەكىلدى، ماسەلەنى – ادامداردىڭ بەيبىت ءومىر ءسۇرۋىن ناقتى قامتاماسىز ەتۋدەن نەگە باستاماسقا؟!.

الدە، «قازترانسگاز ايماق» اق باتىس قازاقتان وندىرىستىك بولىمشەسى (بالكىم، باسقا دا تولىپ جاتقان مەكەمەلەر) وزدەرى اجىراتقان گاز قۇبىرىن قايتا قوسۋعا ءار تۇتىنۋشىدان قوسىمشا 10 مىڭ تەڭگە الىپ، بايىپ وتىرا بەرە مە؟..

مىسالى، ءبىزدىڭ وبلىسىمىزدا 160 مىڭعا تارتا تۇتىنۋشى-نۇكتەلەرى بار ەكەن، سونىڭ اربىرىنە وتىرىك سىلتاۋ تاۋىپ، جىلىنا، كەم دەگەندە، ءبىر رەت ءسوندىرىپ، 10 مىڭ تەڭگە ايىپپۇل سالىپ ءوندىرىپ السا، بۇل مەكەمە 1 ملرد 600 ملن تەڭگە قوسىمشا تازا تابىس تابادى ەكەن! مىنە، قاناۋدىڭ – قىزىل قانى مەن قاساپ مايدانى! مىنەكي، جەمقورلىقتىڭ جايىنداي جەمساۋى!

قىسقاسى، مەن بۇگىندە مۇگەدەك بالالارىم مەن زەينەتكەر انامدى ەمدەتە الماي وتىرمىن، سوندىقتان، ارتىق باستى تيىن-تەبەنىم جوق!

ەندى ءبىر سىلكىنىپ، پرينسيپكە بارىپ، قولدانىستاعى زاڭدار مەن قۇقىعىمنىڭ ورىندالۋىن تالاپ ەتۋگە شەشىم قابىلدادىم. قاتەسىن ءتۇسىنىپ، جەتىم-جەسىردى دە اياماي ۇيگە باسا كوكتەپ كىرىپ، ەلدى جىلاتىپ، گازدى ايىرىپ كەتكەن «قازترانسگاز ايماق» اق باتىس قازاقتان وندىرىستىك بولىمشەسىنىڭ ەسكەنديروۆ دەگەن جۇمىسشىسى كەشىرىم سۇراپ، ءوزى اجىراتقان گاز قۇبىرىن ءوزى كەلىپ قوسىپ بەرمەسە، گازسىز وتىرا بەرەمىن!

مەنىڭ تالابىم مىناداي:

1. «قازترانسگاز ايماق» اق «باتىس قازاقستان وندىرىستىك بولىمشەسىنىڭ ەسكەنديروۆ دەگەن جۇمىسشىسى مەنىڭ انام مەن بالا-شاعامنان كەشىرىم سۇراپ، ءوزى اجىراتقان گاز قۇبىرىن (ەشقانداي «گازدى قايتا قوسۋ» دەگەن قوسىمشا 10000 تەڭگە تولەمسىز) ءوزى كەلىپ قوسىپ بەرسىن!

2. «قازترانسگاز ايماق» اق «باتىس قازاقستان وندىرىستىك بولىمشەسىنىڭ باسشىلىعى جۇمىسشى ەسكەنديروۆكە تۇتىنۋشىلارعا دورەكىلىك كورسەتىپ، زاڭسىز ارەكەتتەر جاساعىنى ءۇشىن جازبا تۇرىندە وعان قاتاڭ ەسكەرتۋ جاساسىن! (ەسكەرتۋ جاسالعان بۇيرىقتىڭ كوشىرمەسىن جابىرلەنۋشى – مەنىڭ اناما ارنايى تاپسىرسىن!).

مەنىڭ جۇرتقا ءوتىنىشىم:

1. ەل ىشىندە ماعان كومەكتەسە الاتىن قورعاۋشىلار بولسا، كومەكتەسىڭىزدەر!

2. ەل ىشىندە «قازترانسگاز ايماق» اق باتىس قازاقستان وندىرىستىك بولىمشەسى ادامي ءھام تۇتىنۋشى قۇقىقتارىن بۇزعان ادامدار بولسا، شۇعىل xابارلاسىڭىزدار!

ءبىز بىرىگىپ، بەلسەنە ارەكەت جاساساق قانا، ءوز ارىمىز بەن قۇقىمىزدى ەشكىمگە تاپتاتپايمىز! تەك سوندا عانا ءبىز كوكسەگەن بولاشاقتىڭ باعدارى ايقىندالىپ، ناقتى رۋحاني جاڭعىرۋ باستالادى.

قاجىمۇقان عابدوللانىڭ فەيسبۋك پاراقشاسىنان الىندى