قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا «قازاقفيلم» كينوستۋدياسىندا وندىرىلگەن اسقار ۇزابايەۆتىڭ «جول» ءفيلمى 2017 جىلدىڭ 13-20 ءساۋىر ارالىعىندا رەسەيدە وتكەن  «كراسنوگورسكيي» حالىقارالىق سپورتتىق كينوفەستيۆالىنە قاتىسىپ، «ۇزدىك سيۋجەت» نوميناسياسى بويىنشا جەڭىسكە  جەتتى، دەپ حابارلايدى قامشى اقپاراتتىق اگەنتتىگى "ءقازاقفيلمنىڭ" باسپا ءسوز قىزمەتىنە سىلتەمە جاساپ.
 

اتالمىش فيلم قازاقستانداعى ەڭ ايگىلى سپورت ءتۇرى – بوكس تۋرالى باياندايدى. كارتينا ەرەجەسىز جەكپە-جەككە قاتىساتىن جاس جىگىت تۋرالى.

«جول» ءفيلمىنىڭ ءتۇسىرىلىمى الماتى قالاسىندا ءوتتى. ءتۇسىرىلىم جۇمىستارىنىڭ ءبىر بولىگى قالاداعى «باراحولكا» اتالىپ كەتكەن بازاردا تۇسىرىلسە، جاتتىعۋ جۇمىستارى بەينەلەنگەن كورىنىستەر قازاق ۇلتتىق اگرارلىق ۋنيۆەرسيتەتىنىڭ سپورت زالىندا ءوتتى. فيلمدەگى باستى ءرولدى «G.H.A.D» مۋزىكالىق توبىنىڭ ءانشىسى، جاس اكتەر نازار شارحان سومداعان. ال باس كەيىپكەردىڭ سۇيىكتىسىنىڭ رولىندە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ تۇلەگى دينارا جۇماعالييەۆا ويناعان. ال كارتينا بارىسىنداعى ەڭ جاعىمسىز كەيىپكەردىڭ بەينەسىنە ق ر ەڭبەك سىڭىرگەن ءارتيسى ديماش احيموۆ («سوڭعى اسۋ»، «پريميتە اداما!»).  سونىمەن قاتار فيلمدە جاتتىقتىرۋشىنىڭ ءرولىن - ق ر ەڭبەك سىڭىرگەن ءارتيسى ەرىك جولجاقسىنوۆ، تەمىرلاننىڭ اكەسىنىڭ ءرولىن – ەرجان ءتۇسىپوۆ («ءسىز كىمسىز كا مىرزا؟») وينايدى. 

2003ء-شى جىلى قۇرىلعان «كراسنوگورسكيي» حالىقارالىق فەستيۆال - شىعىس ەۋروپاداعى جانە تمد ەلدەرىندەگى ءىرى سپورتتىق كينوبايقاۋ. كينوفەستيۆال پرەزيدەنتى – الەمنىڭ ءۇش دۇركىن وليمپيادا چەمپيونى، الەمنىڭ ون دۇركىن چەمپيونى، ون ءبىر رەت ەۋروپا چەمپيونى – يرينا رودنينا.

بيىلعى جىلى فەستيۆال باعدارلاماسىنا 100-گە جۋىق سپورت تۋرالى كينوتۋىندىلار تۇسكەن. فەستيۆالگە قاتىسۋ ءۇشىن تاڭداپ الىنعان 70-كە جۋىق كوركەم جانە دەرەكتى كينوفيلمدەر  15 ەلدەن ۇسىنىلعان.  ولاردىڭ اراسىندا: رەسەي، اۆستريا، بەلارۋس، ۇلىبريتانيا، گەرمانيا، يسپانيا، يتاليا، قازاقستان، كانادا، مولدوۆا جانە ت.ب.