ءتۇرلى تاعدىرلار سۋرەتتەلگەن «ماحاببات اللەياسى» سپەكتاكلى كورەرمەنىن ءتانتى ەتتى

    Gulim Zhaqan
    ءتۇرلى تاعدىرلار سۋرەتتەلگەن «ماحاببات اللەياسى» سپەكتاكلى كورەرمەنىن ءتانتى ەتتى

    2017 جىلى 21 ساۋىردە قازاقكونسەرت زالىندا تۇڭعىش رەت تابىلدى دوسىموۆتىڭ اندەرىنىڭ جەلىسى بويىنشا «ماحاببات اللەياسى» اتتى سپەكتاكلىنىڭ پرەمەراسى ءوتتى، دەپ حابارلايدى قامشى اقپاراتتىق اگەنتتىگى.

    قويىلىم بارىسىندا تابىلدى دوسىموۆتىڭ 14-تەن استام اندەرى جاندى داۋىستا ورىندالدى. ءارتۇرلى تاعدىرلاردىڭ باستان كەشكەن ماحاببات حيكايالارى سۋرەتتەلدى.

    سونىڭ بىرىنە توقتالىپ كەتسەك. اقتوبەلىك اينۇر سۇلەيمەنوۆا مەن تارازدىق بولات كارەنتايەۆ «بولاشاق» باعدارلاماسىمەن ۇلىبريتانيانىڭ كارديف ۋنيۆەرسيتەتىندە بىرگە وقىعان. 2005 جىلدىڭ 23 جەلتوقسانىندا ەلگە بەت العان قوس عاشىق اقتوبەگە باكۋ ارقىلى ۇشاتىن اۋە كەمەسىنە وتىرادى. ونداعى ماقساتتارى جاڭا جىل قارساڭىندا اتا-انالارىنىڭ رۇقساتىن الىپ، شاڭىراق قۇرۋ ەدى، الايدا اسپانعا كوتەرىلگەن ۇشاق بىرەر ساتتەن سوڭ وتقا ورانىپ، كاسپيي تەڭىزىنىڭ ارعى جاعالاۋىندا اپاتقا ۇشىرايدى. سۇڭگۋىرلەر تەڭىزدەن مارقۇمداردىڭ دەنەلەرىن الىپ شىققاندا تاڭدانىستارىن جاسىرا المادى، سەبەبى ومىرلەرىنىڭ سوڭعى ءساتىن سەزگەن بولات پەن اينۇر و دۇنيەگە اتتانسا دا بىر-بىرىنەن اجىراپ قالماس ءۇشىن قۇشاقتاسىپ، وزدەرىن ورىندىق بەلبەۋىمەن بايلاپ تاستاعان ەكەن. قۇتقارۋشىلار قوس مۇڭلىقتىڭ مۇردەلەرىن تاپقان ساتتە دە ولاردىڭ قۇشاقتاسقان بويى كوز جۇمعاندارى بەلگىلى بولدى.

    اينۇر مەن بولاتتىڭ قازاسىنا بۇكىل ەل قايعىردى. تالاپتى، قاجىرلى ەكى جاس بۇكىل قازاق قاۋىمى ءۇشىن ۇلكەن ءۇمىت سيمۆولىنا اينالدى. پاك سەزىمنىڭ سيمۆولىنا اينالعان قوس مۇڭلىق اينۇر مەن بولاتتىڭ ەسىمدەرىن ەستە قالدىرۋ جولىندا كوپ ىستەر قولعا الىندى. سولاردىڭ ءبىرى، 2007 جىلى تارازدا ولاردىڭ اتىمەن «عاشىقتار اللەياسى» اشىلىپ، وسى اللەيادا «ماحاببات سيمۆولى» مونۋمەنتى بوي كوتەردى. ءمۇسىنشى – ك.كاكىموۆ.

    مىنە، جاستارعا ءۇمىت وتىن سىيلاعان اينۇر مەن بولاتتىڭ جۇرەكتەردە ماڭگى ساقتالىپ قالعان حيكاياسى سپەكتاكل قويۋشىلاردىڭ باستى تاقىرىپتارىنا اينالدى. ماحاببات – ماڭگىلىك تاقىرىپ ادامنىڭ تۇلا بويىن ءاپ ساتتە جاۋلاپ الاتىن ۇلى سەزىم.  ماحاببات ءدامىن سەزگەن ادام – جۇرەگى شىنايى سوعىپ تۇرعان ادام. تابىلدى دوسىموۆتىڭ اندەرى سونداي ۇلى سەزىمنىڭ قۇدىرەتىن ءاربىر جانعا سەزدىرە الادى، كوڭىلدى باۋراپ الادى.

    بۇدان بولەك، قوعامدا پروبلەماعا اينالعان وقيعالاردى ارقاۋ ەتىپ، انمەن بايلانىستىرعان جاستار كورەرمەننىڭ زور قوشەمەتىنە بولەندى.

    كەشكە تابىلدى دوسىموۆتىڭ جانۇياسى، ۇلى ابىل تابىلدى ۇلى كەلىپ، اكەسىنىڭ ونەرى ءالى دە دارىپتەلىپ جاتقانىنا قۋانىپ، جاستارعا العىسىن ءبىلدىردى. سونداي-اق، كوز كورگەن دوس-جاراندارى مەن ءانشى اعايىندار كەلىپ، تەاتر جاستارىنىڭ ونەرلەرى ورگە ءجۇزسىن دەپ اق جارما تىلەكتەرىن ايتتى.

    سپەكتاكلدى قوبشى «الماتى-Music» تەاترى. تەاتر جەتەكشىسى، رەجيسسەرى ت. وماروۆ. مۋزىكالىق جەتەكشى – ا. ايدىن ۇلى.
     

    قاتىستى ماقالالار