شىمكەنتتە “ادەبيەت اۆتوبۋسى” جولعا شىقتى. قالا تۇرعىندارى وسى اكسياعا قاتىسىپ، ەرەكشە قوعامدىق كولىكتە جۇرۋگە مۇمكىندىك الدى. بۇل اكسيانى وبلىستىق جاسوسپىرىمدەر كىتاپحاناسى 23 ءساۋىر – حالىقارالىق كىتاپ كۇنىنە وراي ۇيىمداستىرىپ وتىر، دەپ حابارلايدى قامشى اقپاراتتىق اگەنتتىگى وتىرار جاڭالىقتار قىزمەتىنە سىلتەمە جاساپ.
№74 باعىتتاعى اۆتوبۋسقا مىنگەن جولاۋشىلارىنىڭ كوبى بەزەندىرىلگەن كولىكتى، ۇلتتىق كيىم كيگەن قىزداردى كورگەندە تۇسىنبەي قالعانى راس. كەيىننەن كىتاپحانا قىزمەتشىلەرى جانە تۇراقتى وقىرماندارى ەرەكشە اكسيا تۋرالى ءتۇسىندىرىپ، جولاۋشىلاردى مەرەكەمەن قۇتتىقتادى. ەكسپو كورمەسى، قازاقستان رەسپۋبليكاسىنىڭ رامىزدەرى، وبلىستىڭ 85 جىلدىعى تۋراسىندا، سونداي-اق، قازاقستاندىق جانە شەتەل ادەبيەتى تۋرالى سۇراقتار قويىلدى. ويىندار ۇيىمداستىرىلدى. دۇرىس جاۋاپ بەرگەن ازاماتتار سىيلىقسىز قالمادى.

بۇل اكسيا بيىل «جان-دۇنيەڭە جارتى ساعات ءبول» دەگەن تاقىرىپپەن وتۋدە. وسىمەن التىنشى رەت جولاۋشىلاردى قۋانتقان كىتاپحانا ۇجىمى «ادەبي اۆتوبۋس» اكسياسى الداعى ۋاقىتتا دا ۇيىمداستىرىلادى دەيدى.
