وڭتۇستىك كورەيادا وقيتىن قازاقستاندىق ستۋدەنت سەۋلدىڭ مادەني-تاريحي اۋدانى - Bukchon village-دە، اشەكەي بۇيىمدارىن ساتاتىن كىشىگىرىم دۇكەننىڭ كىرەبەرىسىنەن ىبىراي التىنسارين بەينەلەنگەن كىلەمشەنى كورگەن. بۇل تۋرالى ۆكونتاكتە الەۋمەتتىك جەلىسىندە جازىلدى.
«مەن سەۋلدە وقيمىن. جاقىندا كوڭىلىمدى تۇسىرگەن كورىنىستىڭ كۋاسى بودىم. Bukchon village-دە اشەكەي بۇيىمدارىن ساتاتىن كىشىگىرىم دۇكەننىڭ كىرەبەرىسىنەن ىبىراي التىنسارين بەينەلەنگەن توسەنىش توسەلگەن. بۇل مەنى ەسەڭگىرەتىپ جىبەردى. بىرىنشىدەن، ادام بەينەسى بەينەلەنگەن كىلەمشەنى توسەنىش ەتىپ، تاپتاۋدىڭ ءوزى ادامگەرشىلىككە جاتپايدى دەپ ەسەپتەيمىن. ەكىنشىدەن، قازاقتىڭ العاشقى پەداگوگىنىڭ بەينەسىن كورىپ، نە ىستەرىمدى بىلمەي ابدىراپ قالدىم»، - دەپ جازدى پوست اۆتورى.
قازاقستاندىق ستۋدەنت كىلەمشەنى كىرەبەرىستەن العىزۋعا بارىنشا تىرىسقانىن جازعان. «ساتۋشىلاردان كىلەمشەدەگى بەينەنىڭ كىم ەكەنىن سۇراعانىمدا «بىلمەيمىز. قىتايلىق بىرەۋ شىعار...»، دەپ جاۋاپ بەردى. ولاردىڭ بىرىنە جاعدايدى تۇسىندىرە باستاپ ەدىم، كەلۋشىلەردىڭ كوپ ەكەنىن ايتىپ، مازالاماۋىمدى ءوتىندى. ەكىنشى ساتۋشىعا باردىم، ول مەنىڭ سوزدەرىمە قۇلاق استى. مەنىڭ سوزدەرىمنىڭ راستىعىنا، التىنساريننىڭ ۇلكەن تۇلعا ەكەنىنە كوز جەتكىزۋ ءۇشىن ساتۋشى ءالتىنساريننىڭ سۋرەتتەرىن ينتەرنەتتەن كورسەتۋدى سۇرادى. ءمان-جايعا كوز جەتكىزگەن سوڭ مەنەن كەشىرىم سۇراپ، كىلەمشەنى الىپ تاستاۋعا ۋادە بەردى. وكىنىشكە وراي، ساتۋشى كىلەمشەنى مەنىڭ كوزىمشە العان جوق، دۇكەندە حالىق قاراسى كوپ ەدى. كەيىنىرەك دۇكەنگە تاعى دا بارامىن»، - دەپ ءسوزىن تۇيىندەدى ستۋدەنت.
