«ويى بار نايزاعايداي جارقىلداعان،
جىگەر بار الىپ ۇشىپ قارقىنداعان.
ءومىرى وت سەكىلدى جانعان ورلەپ
جۇيرىكتەي ورگە شاپسا القىنباعان»
ءىلياس وماروۆ
قازاقستاننىڭ ماقتان تۇتار زيالى ازاماتتارىنىڭ ءبىرى، كورنەكتى قوعام قايراتكەرى، قازاقستان رەسپۋبليكاسىنىڭ ەڭبەك سىڭىرگەن ساۋلەتشىسى، قازاقستان مەملەكەتتىك سىيلىعىنىڭ لاۋرەاتى، قازاقستان الەۋمەتتىك عىلىمدار اكادەمياسىنىڭ اكادەميگى، «KAZGOR» جوبالاۋ اكادەمياسىنىڭ قۇرمەتتى اكادەميگى، حالىقارالىق شىعىس ەلدەرى ساۋلەت اكادەمياسىنىڭ اكادەميگى، قازاقستان رەسپۋبليكاسى كوركەمونەر اكادەمياسىنىڭ اكادەميگى، الەمدىك شىڭعىسحان اكادەمياسىنىڭ قۇرمەتتى پرەزيدەنتى، قازاق مەملەكەتتىك ساۋلەت-قۇرىلىس اكادەمياسىنىڭ اكادەميالىق پروفەسسورى، حالىقارالىق ساۋلەت اكادەمياسىنىڭ كوررەسپوندەنت مۇشەسى، پروفەسسورى، قازاقستاننىڭ قۇرمەتتى ساۋلەتشىسى، ماسكەۋ قالاسى حالىقارالىق ساۋلەت اكادەمياسىنىڭ (محسا) اكادەميگى، قازاقستان ساۋلەتشىلەر وداعىنىڭ، سۋرەتشىلەر وداعىنىڭ، ديزاينەرلەر وداعىنىڭ جانە جازۋشىلار وداعىنىڭ مۇشەسى، كوكشەتاۋ مەملەكەتتىك ۋنيۆەرسيتەتىنىڭ قۇرمەتتى پروفەسسورى شوت-امان ءۋاليحان 85 جاسقا تولىپ وتىر.
شوتا ىدىرىس ۇلى (ازان شاقىرىپ قويعان اتى شوت-امان) 1932 جىلعى 26 ساۋىردە قازاقتىڭ ۇلى حانى ابىلاي ۇرپاعىنىڭ وتباسىندا، ايگىلى سىرىمبەت تاۋىنىڭ ىرگەسىندە، ءبىر كەزدە سۇيىكتى نەمەرەسى شوقاندى تاربيەلەپ وسىرگەن ارداقتى اجە ايعانىم تۇرعان جەردە (قازىرگى سولتۇستىك قازاقستان وبلىسىنداعى ايىرتاۋ اۋدانىنىڭ سىرىمبەت اۋىلىندا) دۇنيەگە كەلگەن تەكتى اتانىڭ ۇرپاعى. بۇل تۋرالى ارقالى اقىن عافۋ قايىربەكوۆ شوتاعا ارناعان ولەڭىندە:
«سۇيىكتى شىن پەرزەنتى ءبىر قۇدايدىڭ،
قازاقتىڭ تىككەن تۋى – ۇلى ايبىن.
جۋرەمىز قولىندى الىپ قاسيەتتەپ،
قۇدىرەتتى جاقسى ۇرپاعى ابىلايدىڭ»، – دەپ جازدى.
اتالعان مەكەندەگى كازگورودوك (قازىرگى سىرىمبەت) ورتا مەكتەبىن كۇمىس مەدالمەن ءتامامداعان شوتا 1950 جىلى ماسكەۋ ساۋلەت ينستيتۋتىنا وقۋعا ءتۇسىپ، ونى 1956 جىلى ءبىتىرىپ شىعادى. ەڭبەك جولىن الماتى قالاسىنداعى «كازگورسترويپروەكت» مەملەكەتتىك جوبالاۋ ينستيتۋتىندا ساۋلەتشى بولىپ باستادى. ودان كەيىن كسرو ساۋلەت جانە قۇرىلىس اكادەمياسىنىڭ قازاق بولىمىندە كىشى عىلىمي قىزمەتكەر، الماتى قالاسىنىڭ باس ساۋلەتشىسىنىڭ ورىنباسارى، «كازپرومستروي نيي پروەكتىڭ» اعا عىلىمي قىزمەتكەرى، رەسپۋبليكالىق تاريح جانە مادەنيەت ەسكەرتكىشتەرىن قورعاۋ كەڭەسى ءتوراعاسىنىڭ ورىنباسارى، «كازگراجدانسەلپروەكت» جوبالاۋ باس ينستيتۋتىندا باس ساۋلەتشى بولدى. 1973 – 1982 جىلدارى ۇزبەستەن ون جىل بويى قازاقستان ساۋلەتشىلەر وداعىن باسقاردى، كسرو ساۋلەتشىلەر وداعى باسقارماسىنىڭ حاتشىسى بولدى.
قازاقستان ساۋلەتشىلەر وداعىن باسقارعان كەزدە شوتا ىدىرىس ۇلى رەسپۋبليكامىزدىڭ ۇلتتىق ساۋلەتشىلەر كادرلارىنىڭ وسۋىنە، ولاردىڭ شىعارماشىلىق ەڭبەك ەتۋىنە كوپ كۇش جۇمسادى. ول وسى وداققا كەلگەندە بەس-اق قازاق وداققا مۇشە بولسا، ول وداقتان اۋىسقان كەزدە 300-دەن استام قازاق وداققا مۇشە بولعان ەكەن.
1990-1995 جىلدارى ش.ى.ءۋاليحانوۆ قازاقستان رەسپۋبليكاسى ۇلتتىق عىلىم اكادەمياسى م.و.اۋەزوۆ اتىنداعى ادەبيەت جانە ونەر ينستيتۋتىنىڭ ونەر جانە ساۋلەت بولىمىندە مەڭگەرۋشى قىزمەتىن اتقاردى. 1995-2015 جىلدارى ول رەسپۋبليكالىق تاريح جانە مادەنيەت ەسكرتكىشتەرىن قورعاۋ قوعامى ورتالىق كەڭەسىنىڭ ءتوراعاسى بولدى. سونىمەن قاتار حالىقارالىق ابىلاي حان قورىنىڭ پرەزيدەنتى قىزمەتىن دە اتقاردى.
ش.ى.ءۋاليحانوۆ (باسقا ارىپتەستەرىمەن بىرگە) كوپتەگەن عيماراتتىڭ، مونۋمەنتتىڭ جانە جيىرمادان استام ەسكەرتكىشتىڭ اۆتورى. ولاردىڭ قاتارىندا الماتىداعى «ۋنيۆەرسام» دۇكەنى، قازاقستان كومپارتياسى ورتالىق كوميتەتىنىڭ عيماراتى، «كازگيپروزەم» ءۇيى، شوقان ءۋاليحانوۆ، توقاش بوكين، اباي، عاني مۇراتبايەۆ، ءالىبي جانگەلدين، احمەت بايتۇرسىنوۆ، كەنەسارى قاسىموۆ، ت.ب. ەسكەرتكىشتەر بار.
شوتا ىدىرىس ۇلى ەلىمىزدىڭ باس سيمۆولى قازاقستان رەسپۋبليكاسىنىڭ مەملەكەتتىك ەلتاڭباسىن جاساپ، مەملەكەت تاريحىنىڭ جىلناماسىنا وراسان زور ۇلەس قوستى. 1993 جىلى 18 قانتاردا رەسپۋبليكامىزدىڭ تۇڭعىش پرەزيدەنتى ن.ءا.نازاربايەۆ شوكەڭە مىناداي قۇتتىقتاۋ جولدادى: «قۇرمەتتى شوت-امان ىدىرىس ۇلى! تاۋەلسىز مەملەكەتتىڭ ەلتاڭباسىنىڭ اۆتورى رەتىندە ەسىمىڭىز حالقىمىزدىڭ جۇرەگىندە ماڭگى قالادى. سىزگە تابىس تىلەيمىن، ءارقاشان دەنىڭىز ساۋ بولسىن! ن.نازاربايەۆ، 18.01.1993 جىل».
اسىرەسە شوتا ىدىرىس ۇلىنىڭ باسقارۋىمەن ءبىر توپ مۇسىنشىلەر مەن ساۋلەتشىلەر، قۇرىلىسشىلار مەن ينجەنەرلەر جاساپ شىعارعان الماتىداعى تاۋەلسىزدىك مونۋمەنتى – شوعىر ەسكەرتكىشتەردىڭ ىشىندەگى شوقتىعى بيىگى بولدى. ول ساۋلەت، ءمۇسىن جانە ينجەنەرلىك ونەردى توعىستىرعان ساۋلەتتىك كەشەن. 1996 جىلى تۇرعىزىلعان بۇل مونۋمەنت پاريجدەگى ەيفەل مۇناراسى سياقتى بۇكىل الەمگە ايگىلى ەسكەرتكىشتىڭ بىرىنە اينالدى.
ش.ى.ءۋاليحانوۆ قازاقستان رەسپۋببليكاسى پرەزيدەنتىنىڭ بايراعىنىڭ، قازاق ۇلتتىق عىلىم اكادەمياسىنىڭ، تاريح جانە مادەنيەت ەسكەرتكىشتەرىن قورعاۋ قوعامىنىڭ ەمبلەمالارىنىڭ دا اۆتورى.
2001 جىلى ش.ى.ءۋاليحان سەمەي قالاسىندا اتوم سىناقتارىنىڭ قۇرباندارىنا ارنالعان «اجالدان دا كۇشتى» اتتى ەسكەرتكىش كەشەنىن جاسادى. ونى كورگەن ادامدار بەيجاي قالا المايدى.
مامانداردىڭ باعالاۋىنشا، ش.ى.ءۋاليحاننىڭ شىعارمالارىنا سالىنعان دۇنيەلەرگە ءوز ورتالىعىمەن ۇيلەسىمدىلىگى، ۇلتتىق ناقىشى جانە كاسىبي ساپاسىنىڭ بيىكتىگى تىڭ. «ءمۇسىنشىنىڭ جۇمىسى وتە كۇردەلى ونەر. ادامنىڭ ءبىر ساتتەگى قيمىلىنا ونىڭ بۇكىل وبرازىن سىيدىرۋ كەرەك. مىسالى، الماتىداعى شوقان مۇسىنىنە ونىڭ بۇكىل وبرازىن سىيدىرۋ كەرەك. مىسالى، الماتىداعى شوقان مۇسىنىنە ءبىز قازاقستاننىڭ حالىق سۋرەتشىسى حاكىمجان ناۋرىزبايەۆ ەكەۋمىز عالىمنىڭ ويلانىپ قالعان ءساتىن الدىق. ال كوكشەتاۋداعى مۇسىندە ەركىندىك، جاستىق جالىن بار»، - دەيدى ساۋلەتشى شوكەڭ.
شوتا ىدىرىس ۇلىنىڭ ساۋلەتشى رەتىندە ەرەكشە ءىز قالدىرعان سالاسىنىڭ ءبىرى – رەسپۋبليكامىزداعى اۋىل-سەلو قۇرىلىسى. سونىمەن قاتار ول قۇرىلىس تاجىريبەسىنە جەر سىلكىنۋ كەزىندە قۇلامايتىن ءمونوليتتى (مىزعىماس) ۇيلەر سالۋدى ەنگىزۋدىڭ العاشقى اۆتورلارىنىڭ ءبىرى.
ش.ى.ءۋاليحان ساۋلەت ءىسى بويىنشا وتكىزىلگەن بىرنەشە اشىق جانە جابىق بايقاۋلارعا قاتىسىپ، جۇلدەلى ورىندارعا يە بولدى. مىسالى، بۇكىلوداقتىق ساۋلەتشىلەر سايىسىندا ونىڭ جولداستارىمەن بىرگە جاساعان الماتى قالاسىنا ارنالعان «حالىقتار دوستىعى» مونۋمەنتى ءبىرىنشى ورىن الدى. قازاقستان رەسپۋبليكاسىنىڭ ەلتاڭباسىنا ارنالعان كونكۋرستا ول ءبىرىنشى ورىندى جەڭىپ الىپ، اۆتورلىق قۇقىققا يە بولدى.
ساۋلەتشىنىڭ حالىق الدىنداعى جاۋاپكەرشىلىگى تۋرالى شوت-امان ءۋاليحان بىلاي دەپ تەبىرەنەدى:
«اقىن جامان ولەڭ جازسا وقىماي قويۋعا، كومپوزيتور جامان مۋزىكا جازسا تىڭداماي قويۋعا بولار، ال جامان ساراي نەمەسە ۇسقىنسىز ەسكەرتكىش سالىنسا قاراماي قويۋىڭىز مۇمكىن ەمەس. كوزگە شىققان سۇيەلدەي كەمى 100 جىل تۇرۋى مۇمكىن. مۇنىڭ ءوزى ساناعا قانشاما اسەر ەتەدى دەسەڭىزشى. سوندىقتان دا ساۋلەتشىنىڭ حالىق الدىنداعى جاۋاپكەرشىلىگى وتە جوعارى دەپ ەسەپتەيمىن. ساۋلەتشى قيالشىل عانا ەمەس فيلوسوف بولۋى كەرەك».
ش.ءۋاليحان ءبىر ەڭبەگىندە ساۋلەتشىلەر جاساعان ەسكەرتكىشتەردىڭ ءرولى تۋرالى بىلاي دەپ جازىپتى: «عاسىرلار وتەر، سيۆيليزاسيا الماسار، ءبىراق ەسكەرتكىشتەر، ساۋلەت ونەرىنىڭ قولتاڭبالارى ساقتالىپ قالادى. كەيىنگىلەر ىلگەرىدەگىلەرگە سول ەسكەرتكىشتەرگە قاراپ باعا بەرەدى».
رەسپۋبليكالىق تاريح جانە مادەنيەت ەسكەرتكىشتەرىن قورعاۋ قوعامى ورتالىق كەڭەسىنىڭ ءتوراعاسى رەتىندە ول ەسكەرتكىشتەردى قورعاۋ جۇمىسىنا كوپ كوڭىل ءبولدى. حالىقارالىق ابىلاي حان قورىنىڭ پرەزيدەنتى رەتىندە ەلىمىزدە بولعان ءىرى تاريحي وقيعالار مەن ايگىلى تۇلعالاردى ماڭگىلىك ەستە قالدىرۋ جاسالاتىن جوبالارعا جەتەكشى بولىپ، باسقارىپ وتىردى.
ش.ى.ءۋاليحان سەگىز قىرلى، ءبىر سىرلى، جان-جاقتى تۇلعا. بۇل تۋرالى ونىڭ ارىپتەسى، اتاقتى عالىم، «KAZGOR» جوبالاۋ اكادەمياسىنىڭ پرەزيدەنتى، پروفەسسور ءا.ش.ءتاتىعۇلوۆ بىلاي دەپ جازدى:
«ارحيتەكتۋرا پروفەسسورى ش.ى.ءۋاليحانوۆ سان قىرلى ادام. ول تاماشا ايتىسكەر، دۇنيەتانىمى كەڭ. ارىپتەسىمىزدىڭ الەمنىڭ ساۋلەت ونەرى فورۋمدارىندا قازاقستاننىڭ ساۋلەت ونەرىنىڭ دامۋىنىڭ جاندى ماسەلەلەرىن كوتەرىپ سويلەگەن سوزدەرى رەسپۋبليكامىزدىڭ ارحيتەكتۋراسى مەن ونەرىنە، تاريحى مەن مادەنيەتىنە ارنالعان ساراپتامالىق ماقالالارى ءالى دە جادىمىزدا. ول بىرنەشە درامالىق تۋىندىنىڭ اۆتورى... وسىنىڭ ءبارى ش.ى.ءۋاليحانوۆتىڭ جارقىن، شىن مانىندە رەنەسسانستىق تۇلعاسىن سيپاتتايدى. ءتىپتى ءارقايسىمىز ونى ءار قىرىنان، بىرەۋمىز قازاقستان رەسپۋبليكاسىنىڭ مەملەكەتتىك ەلتاڭباسىنىڭ اۆتورى رەتىندە، ەندى بىرەۋىمىز تاۋەلسىزدىك مونۋمەنتىنىڭ نەمەسە اتوم سىناقتارى قۇرباندارىنا ارنالعان مونۋمەنتتىڭ اۆتورى، تاعى ءبىرىمىز اقىن، عالىم نەمەسە قوعام قايراتكەرى رەتىندە تانىساق تا، ءبارىبىر بارلىعىمىز ونىڭ ايرىقشا تۇلعاسىنىڭ، قازاقستاننىڭ قازىرگى زامانعى ارحيتەكتۋراسى مەن ونەرىندەگى حالىق داستۇرلەرىن ساقتاۋشى تۇلعاسىنىڭ ىقپالىندامىز دەپ ويلايمىن».
ش.ى.ءۋاليحان ساۋلەتشىلەر وداعىنىڭ، سۋرەتشىلەر وداعىنىڭ، ديزاينەرلەر وداعىنىڭ جانە جازۋشىلار وداعىنىڭ مۇشەسى. قازاقستان تاريحىن زەرتتەۋشى عالىم، كورنەكتى جازۋشى، اقىن، دراماتۋرگ، سۋرەتشى. ول قازاقستان تاريحىنىڭ اشىلماعان اقتاڭداق بەتتەرىن، قالىڭ جۇرتقا بەيمالىم سىرلارى كوپ ۇلى تۇلعالاردىڭ تاريحىن زەرتتەۋگە دە قوماقتى ۇلەس قوسقان عالىم.
شوت-امان ءۋاليحان قازاقتىڭ ايگىلى حانى ابىلايدىڭ تاريحي تۇلعاسىنا ارنالعان، قازاق حالقىنىڭ عۇلاما عالىمى شوقان ءۋاليحانوۆتىڭ ءومىرى مەن شىعارماشىلىعىنا ارنالعان عىلىمي ەڭبەكتەرى ءبىر توبە. سونىمەن بىرگە ونىڭ شوقان تۋرالى پەسالارى ساحناعا شىقتى. عالىمنىڭ جاستىق شاعىنا ارنالعان العاشقى پەساسى «جاس شوقان» 1962 جىلى شىمكەنت وبلىستىق دراما تەاترىندا قويىلدى. پەسانىڭ ورىسشا نۇسقاسى 1982 جىلدان بەرى كوكشەتاۋ وبلىستىق دراما تەاترىندا بىرنەشە رەت كورسەتىلدى. «كادەت شوقان»، «شوقاننىڭ اق ءتۇنى» پەسالارى دا ءساتتى شىققان تۋىندىلار. اۆتور شوقان تۋرالى «ايتىلماعان اڭگىمە»، «شوقان تۋرالى بىرەر ءسوز»، «دوستىق جىرشىسى»، «تاعىلىم»، «ابزال اعا، ونەگەلى ىنىلەر»، «جانى سۇلۋ جارقىن بەينە»، «حالقىنىڭ ارمان مۇنىڭ ارقالاعان»، تاعى باسقا زەرتتەۋ ەڭبەكتەرىن جاريالادى. ول شورمانوۆتار اۋلەتى تۋرالى دا ءبىرقاتار زەرتتەۋ ماقالالار جازدى.
«قازاق ادەبيەتى» گازەتىنىڭ 1981 جىلى 28 تامىزداعى سانىندا شىققان «ەسكىنىڭ كوزى – تاريحتىڭ ءوزى» اتتى ماقالاسىندا ش.ى.ءۋاليحان وتكەن تاريحتى زەرتتەۋدىڭ قاجەتتىلىگى تۋرالى بىلاي دەپ جازدى: «تاريحتىڭ تالاي بەلگىسىز بەتتەرى ءار جەردە جاتىر. ءبارىن ەرىنبەي جالىقپاي جيناستىرىپ، زەردەلى زەرتتەۋىمىز قاجەت. ازىرگە قازاقستاننىڭ الىپ تۇلعاسىنا لايىقتى، ارىدەن كەلە جاتقان جان-جاقتى، ءبىرتۇتاس مادەني كەلبەتىن دۇنيە جۇزىنە تولىق كورسەتە الماي كەلەمىز. وتكەننەن بىزگە جەتكەن ءاربىر ۇلى ەڭبەك - بابالارىمىزدىڭ ماڭداي تەرى، وي-سەزىمى، تالابى مەن تالانتىنان تۋعان اسىل مۇراسى. وعان يە بولىپ، ءارى بايىستىپ، كەلەر ۇرپاقتاردىڭ يگىلىگىنە اسىرۋ مۇراگەرلىك بورىشىمىز».
تاريحي مۇراعا قاتىستى ويلارىن ول مىناداي ولەڭ جولدارىمەن دە بىلدىرەدى:
«دۇنيەگە نە عۇلاما دانا وتكەن
ساف التىنداي ويلارى بىزگە جەتكەن.
سولاردىڭ مۇراگەرى بولا الساق قوي
ءىس-قيمىلىن بابانىڭ عيبرات ەتكەن».
وسى شاعارمالاردى وقىپ وتىرىپ ءبىز شوتانى اتا-بابالار مۇراگەرى بولا الدى دەپ ايتا الامىز. ول ءوزى دە وتكەن اتا-بابالار مۇراگەرى عانا ەمەس، ءوز شىعارمالارىمەن كەيىنگى ۇرپاققا ۇلگى بولارلىق مول مۇرا جاسادى. وعان دالەل ونىڭ مىنا ولەڭ جولدارى:
«ادامدىق مەنىڭ قۇرانىم،
اقىنمىن ءارى باتىرمىن.
ۇرپاققا قالار مۇرانىڭ
ىرگەسىن قالاپ جاتىرمىن».
ساۋلەتشى ش.ى.ءۋاليحان ماسكەۋدە، مادريدتە، بەرليندە، پاريجدە، باكۋدە، ەريەۆاندا، تبيليسيدە، پەكيندە، مەحيكودا، تاعى باسقا قالالاردا وتكەن ساۋلەتشىلەردىڭ حالىقارالىق كاسىبي كونگرەستەرىنە جاساعان باياندامالارىندا ۇنەمى ساۋلەت، قالا قۇرىلىسى، اۋىلدى جەرلەردەگى قۇرىلىستىڭ وزەكتى ماسەلەرىن كوتەردى. سول كونگرەستەردە سويلەگەن رەسپۋبليكامىزدىڭ ساۋلەت جانە ونەر سالاسىنداعى جەتىستىكتەرىن كورسەتىپ، الدا تۇرعان پروبلەمالاردى دا ايتىپ وتىردى.
ش.ى.ءۋاليحان ساۋلەت پەن ونەر تۋرالى بىرنەشە عىلىمي ەڭبەكتەردىڭ، ساۋلەت ونەرى تاريحى مەن مادەنيەتى تۋرالى جازىلعان كوپتەگەن قىزىقتى ماقالالاردىڭ اۆتور. ونىڭ 1965 جىلى باسپادان شىققان «تاسپەن جازىلعان سيمفونيا» اتتى پوۆەسىن وقىرمان قاۋىم جىلى قابىلدادى.
شوكەڭ شابىتى كەلگەندە «تىلگە جەڭىل، جۇرەككە جىلى تيەتىن» (اباي) ولەڭ جولدارىن دا مولدىرەتىپ اق قاعاز بەتىنە جازىپ قويادى. ول «كوگىلدىر كوكشە» (ءانى ە.حاسانعالييەۆتىكى)، «جارىق جۇلدىز» (ءانى س.مۇحامەدجانوۆتىكى)، «اينالدىم، اينالدىم ەلىمنەن» (ءانى ن.تىلەندييەۆتىكى) سياقتى اسەم اۋەزدى ولەڭدەردىڭ اۆتورى. اقىن شوتا ازىرلەگەن «جۇرەگىم بوپ سوعادى جەردىڭ ءوزى» اتتى جيناعىنا ەنگەن «بەتاشار» دەگەن ولەڭىندە ءوزىنىڭ جىرداعى قولتاڭباسى تۋرالى:
«ولەڭىم مەنىڭ قىرىق قۇراۋ،
قالىپقا سىيا بەرمەيدى.
عالامات سۋرەت سالام دەپ
مىڭ ءبىر بوياۋ ىزدەيدى» - دەپ ءوزىنىڭ ىزدەنىمپاز سىرىمەن، ارمانمەن بولىسەدى.
ساۋلەتشى ش.ى.ءۋاليحاننىڭ جان-جاقتى شىعارماشىلىعى جوعارى باعالاندى. ول «قۇرمەت»، «پاراسات» وردەندەرىنىڭ، كوپتەگەن مەدالدارمەن قۇرمەت گراموتالارىنىڭ، تاۋەلسى «تارلان» سىيلىعىنىڭ يەگەرى.
شوكەڭ باقىتتى ادام. ول ءوزىنىڭ سەرىگى، سۇيگەن جارى زينايدا كارىم قىزى ەكەۋى گۇلنات، بايان اتتى قىزدارىن تاربيەلەپ ءوسىردى. ولاردىڭ ەكەۋى دە جوعارى ءبىلىمدى بىلىكتى ماماندار. ولاردان التى نەمەرە، بىرنەشە شوبەرە ءسۇيىپ قۋانىشقا بولەنۋدە.
ش.ى.ءۋاليحان ءومىرىمنىڭ ءار ساعاتىن ءتيىمدى پايدالانىپ حالقىنا قىزمەت ەتۋدى، شىعارماشىلىعىن بيىككە كوتەرۋدى ارمانداعان. ول ارمانى مىنا ولەڭىنەن دە كورىنەدى:
«قىيىنداتىپ، سەلدەتىپ، نوسەرلەتىپ،
كۇنىم ءوتىپ بارادى، كۇنىم ءوتىپ.
ەتەگىنە بوگەلمەي ارمان تاۋدىڭ
شىڭ باسىنا، شىركىن-اي، قونسام جەتىپ».
ءبىز بۇگىن ايگىلى ساۋلەتشى جەرلەسىمىز، دوسىمىز شوت-امان ىدىرىسۇلىن 85 جاسقا كەلگەن مەرەيتويىمەن شىن جۇرەكتەن قۇتتىقتاپ، وعان مىقتى دەنساۋلىق، وتباسىنىڭ اماندىعىن، زور باقىت، شىعارماشىلىق تابىس تىلەيمىز. زينايدا كارىمقىزىمەن بىرگە بالالار مەن نەمەرە شوبەرەلەردىڭ قىزىعىن كورە بەرىڭىزدەر دەمەكپىز.
قايروللا مۇقانوۆ، زەينەتكەر،
ءبىلىم بەرۋ سالاسىنىڭ ارداگەرى