2016 جىلى الەمدە 259 جۋرناليست تۇرمەگە قامالدى دەپ مالىمدەدى حالىقارالىق "جۋرناليستەردى قورعاۋ كوميتەتى" (Committee to Protect Journalists CPJ) ۇيىمى "باسپاسوزگە شابۋىل 2017" دەپ اتالاتىن ەسەبىندە. نيۋ-يوركتە ورنالاسقان ۇيىم بۇل سان ب ا ق وكىلدەرىنە جاسالعان شابۋىلدى تىركەۋمەن اينالىسا باستاعان 1990 جىلدان بەرگى ەڭ جوعارى كورسەتكىش دەيدى.
CPJ جاڭا مەديا تەحنولوگيالار سەنزۋرا ورناتۋدى بۇرىنعىدان دا قيىنداتا تۇسكەنىن، ءبىراق رەپرەسسيۆتى مەملەكەتتەر ولاردى ءجيى قولدانادى، سەبەبى تۇرمەگە قامالعان جانە قازا تاپقان جيۋرناليستەر سانى ارتىپ كەلە جاتقانىن ايتادى دەپ حابارلايدى قامشى اقپاراتتىق اگەنتتىگى centralasian.org-كە سىلتەمە جاساي وتىرىپ.
"بۇل، شىن مانىندە، جۋرناليستەر ءۇشىن بۇرىن-سوڭدى بولماعان ەڭ ءقاۋىپتى جانە ەڭ قانقۇيلى ۋاقىت" دەدى ۇيىمنىڭ اتقارۋشى ديرەكتورى دجوەل سيمون. سيمون ۇيىمنىڭ 25 ساۋىردە جاريالاعان ەسەبىندە الەۋمەتتىك مەديانىڭ بارلىق جەردە بارىنا جانە سمارتفون كامەرالارىنىڭ جاپپاي پايدالانىلاتىنىنا قاراماستان، دەموكراتيالىق ەمەس ۇكىمەتتەر باق-تى جانە جۋرناليستەردى باسىپ-جانىشتاۋ ارەكەتتەرىن كۇشەيتكەنىن ايتادى.
CPJ سونىمەن قاتار سوڭعى بەس جىلدا الەمدە 332 جۋرناليست قازا تاپقانىن، مۇنىڭ دا مونيتورينگ جۇرگىزىلە باستاعاننان بەرگى بەس جىلدىق كەزەڭدەر ىشىندەگى ەڭ كوبى ەكەنىن ايتادى. سيمون الەمدە رەپرەسسيۆتى مەملەكەتتەر باق-تىڭ ءۇنىن ءوشىرىپ، وزىنە باعىندىرۋ ءۇشىن ۋاقىتى مەن قارجىسىن كوپتەپ جۇمساي باستادى دەيدى. ول سونىمەن قاتار ۇكىمەتتەر اقپاراتتىڭ "قيراتۋشى كۇشىن" سەزىنە باستاعان سايىن اككى بولا ءتۇسىپ، "ءسوز بوستاندىعىنا تىكە شابۋىلداي باستاعانىن" ايتادى. ونىڭ سوزىنشە، رەپرەسسيۆتى ۇكىمەتتەر اقپاراتتى باسقارۋعا، باقىلاۋعا جانە ونىمەن مانيپۋلياسيا جاساۋعا مۇمكىندىك بەرەتىن كۇردەلى ستراتەگيالاردى جەتىلدىرىپ جاتىر.