ءساۋىردىڭ ورتاسىندا سۋ تاسقىنى سالدارىنان جالعىز ۇيلەرىنەن ايىرىلىپ قالعان ماحامبەتوۆ اۋىلىندا تۇراتىن وتباسىنىڭ جانايقايىن سالعان بولاتىنبىز. وسى جاعدايدى ەسكەرىپ، 10 جاستاعى ماحاببات بيلىككە ۇندەۋ ايتتى. جاپا شەككەندەرگە لايىقتى كومەك كورسەتپەگەن بيلىكتى ايىپتاپ، بار اشۋىن ايتىپ سالعان.
بۇل وقيعادان سوڭ جان-جاقتان كومەكتەسپەك بولىپ، قول ۇشىن سوزعاندار تابىلىپ جاتتى. سونىڭ ءبىرى ءانشى مەرۋەرت تۇسىپبايەۆا بولدى. «كىتاپتارىم سۋعا كەتتى» دەپ كوز جاسىن تيا الماعان كىشكەنتاي قىزعا ءانشى كىتاپتار جىبەردى، ال 1 مامىر كۇنى قىزدىڭ قۇرمەتىنە اقتوبەگە بارىپ تەگىن كونسەرت قويماقشى.
جۇرەگى مەيىرىمگە تولى ادادمداردىڭ ءالى دە كوپ ەكەنى كوڭىل قۋانتادى. الماتىلىق بەلگىلى كاسىپكەر قايرات قۇدايبەرگەن سۋ تاسقىنىنان زارداپ شەككەن اقتوبەلىك 10 جاستاعى قىزعا باسپانا سىيلاماقشى، دەپ حابارلايدى قامشى اقپاراتتىق اگەنتتىگى دياپازونعا سىلتەمە جاساپ.
«سۋ تاسقىنىنان زارداپ شەككەن قىزعا ءۇي سالىپ بەرۋدى جوسپارلادىق، ءبىراق كەيىننەن كوپ كۇتتىرمەي جاقسى ەكى قاباتتى ءۇي الىپ بەرۋدى شەشتىك، - دەدى باسىلىمعا بەرگەن سۇحباتىندا قايرات قۇدايبەرگەن - ءبىز ۇلكەن ءارى ادەمى، 159 شارشى مەتر اۋماقتى قامتيتىن ءۇيدى قاراستىردىق. ونى ساتىپ الىپ، ماحابباتتىڭ وتباسىنا سىيلاعىمىز كەلدى. ۇيگە جيھازداردى، كىر جۋعىش ماشينانى، تەلەديدار مەن باسقا دا تەحنيكانى اپاردىق. ءبىراق اقتوبە اكىمدىگىندەگىلەر سول اۋماقتاعى جەر ۋچاسكەسىندە تۇرۋعا بولمايتىنىن، ياعني، ءۇي وزەنگە تىم جاقىن ورنالاسقاندىقتان باس تارتىپ وتىر. الايدا ءۇي بيىك جانە ول وزەننەن الىس ورنالاسقان. ەندى باسقا ءۇي ىزدەپ جاتىرمىز. وسى ءىستى سوڭىنا دەيىن تىندىرىپ، قىزعا باسپانا سىيلاماقشىمىز».
بۇگىنگى تاڭدا ماحاببات ەشىموۆانىڭ وتباسى باسقا دا زارداپ شەككەن وتباسىلار سەكىلدى جالدامالى پاتەردە تۇرىپ جاتىر.