ماسساگەت قازاق جاستار پورتالى ءبىر اي بۇرىن «اينا» جاڭا جوباسىن قولعا الدى. ماقساتى – ونەر-عىلىم الەمىندە جۇرگەن تۇلعالار جونىندە قۇنسىز اقپاراتقا قۇنىعاتىن وقىرماننىڭ تالعامىن جوعارىلاتۋ.
بۇگىنگى شىعارىلىم 24 جاسىندا «قازاق كسر ەڭبەك سىڭىرگەن ونەر قايراتكەرى» قۇرمەتتى اتاعىنا يە بولعان، قازاق كسر-نىڭ حالىق ءارتيسى، ونەرتانۋ عىلىمىنىڭ پروفەسسورى، «پاراسات» وردەنىنىڭ يەگەرى، م.اۋەزوۆ اتىنداعى قازاق مەملەكەتتىك اكادەميالىق دراما تەاترى ديرەكتورىنىڭ كەڭەسشىسى ەسمۇحان وبايەۆتىڭ ىشكى الەمىنە ۇڭىلۋگە ارنالادى.
بالالىق شاق دەگەندە ەسمۇحان وبايەۆ ەرىكسىز كۇرسىنەدى. ازاپپەن، اشتىقپەن، جوقتىقپەن وتكەن كەزەڭ وبايەۆتىڭ زامانداستارى ءۇشىن اۋىر بولدى.
«اۋىلدا تەرەزەدەن قاراپ تۇرىپ: «شىركىن-اي، ەتىگى بار ادامداردىڭ ءومىرى قانداي راحات! مەكتەپكە اياقتارى اۋىرماي باراتىن...» دەپ ويلايتىنبىز. زاماننىڭ سول كەزدەگى اسەرى، ادامنىڭ ۋاقىتپەن كۇرەسۋى، زاماندى ادامنىڭ تاربيەلەۋى، وسىنداي كەزەڭدەردەن وتكەنبىز» دەيدى ونەر قايراتكەرى.
سونداي-اق، تاۋعا قاراۋدى جاقسى كورەتىنىن ايتتى.
«تاۋعا قاراسام، جاستىق شاعىمدى، اكە-شەشەمدى، جاقسى ۋاقىتتار مەن وكىنىشتەردى ويلايمىن. تاۋدىڭ الدىندا ەسەپ بەرىپ تۇرعان دۇرىس، سەبەبى تاۋ ەشنارسەنى جاسىرمايدى، تاۋ ادامدى سىلكىنتەدى، تاۋ ادامدى كوتەرەدى، تاۋ كورگەن سايىن راحات سەزىمگە بولەنەمىن».
پاراساتتى ونەر يەسى العاش ونەر جولىنا قالاي كەلگەنىن دە ايتتى. قازاقتىڭ تۇڭعىش كاسىبي رەجيسسەرى، قازاق كسر-نىڭ حالىق ءارتىسى اسقار توقپانوۆ ەسمۇحان وبايەۆتى ونەرگە اكەلگەن ەدى. سول كىسىمەن كەزدەسۋ – ءارتىستىڭ ونەر جولىنىڭ كىلتى بولى تابىلادى.
اتاق جايلى دا ءسوز قوزعادى. ونىڭ ويىنشا، اتاق ادامدى بۇزبايدى، اتاق دەنساۋلىق بەرمەيدى، اسىپ تۇرعان مارتەبە بەرمەيدى. العاش اتاق قازاق تەاترىندا ىستەپ جۇرگەندە ويلاماعان جەردەن بەرىلگەن ەكەن، «قازاقستاننىڭ ەڭبەك سىڭىرگەن قوعام قايراتكەرى» اتاعىن يەمدەندى.
حالىق ءارتىسىنىڭ «ۇلى» دەگەن ءسوز تۋراسىندا ويى: «مەن كورگەن ۇلىلار پايعامبار تيپتەس كورىنەتىن. تازا، مەيىرىمدى، ءمىنسىز، قاراپايىم، كىشىپەيىل، بىلگىر، ءتۇزۋ ادامدار ەدى. شىندىققا، ەڭبەكقورلىققا، تۋرالىققا ۇيرەتتى.
ەسمۇحان وبايەۆ ءۇشىن باقىت كىلتى – ءتىرى جۇرۋدە. «قۋانعان ادامدى كورۋ – باقىت، جىلاعان ادامدى جۇباتۋ – باقىت، اۋىرعان ادامنىڭ كوڭىلىن سۇراۋ – باقىت» دەپ ويىمەن ءبولىستى.
