رەسەي پرەزيدەنتى ۆلاديمير پۋتين بالالاردىڭ ەسىمىن سيفرلار، تىنىس بەلگىلەر، سونداي-اق اتاق، دارەجە، تيتۋل سىندى دۇنيەلەرمەن بايلانىستىرىپ قويۋعا تىيىم سالاتىن زاڭعا قول قويدى، دەپ حابارلايدى قامشى اقپاراتتىق اگەنتتىگى life.ru باسىلىمىنا سىلتەمە جاساپ.

جاڭا قۇجاتقا سايكەس بالانىڭ تەگى اتا-اناسىنىڭ تەگىمەن جازىلاتىن بولادى. قۇجاتتا بالانى نە اكەسىنىڭ، نە اناسىنىڭ، نە بولماسا ەكى جاقتى تەكتى دەفيس ارقىلى جازۋعا رۇقسات ەتىلگەنى كورسەتىلگەن.

بالاعا ءجونسىز ەسىم قويا بەرمەۋدى سەناتور ۆالەنتينا پەترەنكو ۇسىنعان. كەيىنىرەك زاڭدى مەملەكەتتىك دۋما وكىلدەرى قابىلداپ، فەدەراسيا كەڭەسىنىڭ مۇشەلەرى بەكىتتى. ماسكەۋدە جاس انالار رەسمي تۇردە بالالارىنىڭ ەسىمىن كوبىنە بىلاي تىركەگەن: نيكولاي-نيكيتا-نيل، حريستامريرادوس، دەلفين، ياروسلاۆ-ليۋتوبور، لۋكا-سچاستە، ساممەرسەت وۋشەن، اپرەل، پولينا-پولينا، پرينسەسسا-دانيەللا، زاريا-زاريانيسا، الەشا-كاپرينا، سوفيا-سولنىشكو. وسى سىندى ەسىمدەردىڭ بارىن بىلگەن بيلىك وكىلدەرى ىسكە كوشۋدى ءجون كورىپتى.

ەلىمىزدە ءدال وسىنداي كەلەڭسىزدىكتەردىڭ ورىن الىپ كەلەتىنى جايىندا ايتا كەتكەن ءجون. كەي اتا-انا بالام اتاقتى بولسىن، سول ادامعا ۇقساسىن دەگەن نيەتپەن تانىمال تۇلعالاردىڭ ەسىمىن تەگىمەن قوسا قويىپ جاتادى. ماسەلەن، ءشامشى قالداياق، نۇرسۇلتان نازارباي، مادينا ەرالى ت.ب. سونداي-اق، ەلىمىزدە تاريحي جاعداي ورىن السا، سول كۇندەردىڭ ەستەلىگى دەيدى مە ەكەن، الدە بولىپ جاتقان وقيعا اسەر ەتتى مە، ايتەۋىر ازيادا، وليمپيادا، سامميت، ۋنيۆەرسيادا، داعدارىس، استانا دەپ ەسىم قويۋ دا جيىلەپ بارادى قوعامدا. دەرەكتەرگە سۇيەنسەك، ەسىم قويۋ – بالانىڭ بولاشاقتاعى تاعدىرىنا اسەر ەتەدى. ءتىپتى، بۇگىنگى تاڭدا ءمان-ماعىناسى جوق، بالاعا ءجون-جوسىقسىز ەسىم قوياتىن اتا-انالار قاتارى كوبەيگەن. ادامنىڭ ەسىمى سول ۇلتتىڭ قۇندىلىعىن كورسەتىپ تۇرۋى كەرەك. مۇنى تۇسىنگەن اتا-انا بالانىڭ ەسىمىمەن، ەڭ اۋەلى تاعدىرىمەن وينامايدى.

 رەسەي بيلىگى وسى جايتتاردى ءتۇسىنىپ، رەتتەۋگە كوشكەن. قازاقستان بيلىگى دە قاراپايىم دۇنيە بولىپ كورىنگەنىمەن، قوعام ماسەلەسىنە اينالعان وسى جايتتى قاراستىرىپ، ءبىر رەتىن كەلتىرەر دەگەن ۇمىتتەمىز.