2014 جىلدىڭ جازىندا يراكتىڭ سينجار قالاسى «يسلام مەملەكەتى» اسكەرگلەرە تولدى. 5 مىڭنان استام ايەل تۇتقىندا بولىپ، قۇلدىققا ساتىلدى. تەك بىرەن-سارانى قاشىپ قۇتىلا العان.

بۇل ايەلدەردىڭ ادام جانىن تۇرشىكتىرەر وقيعالارى جايىندا جەرگىلىكتى ب ا ق ءتىلشىسى دايش تۇتقىنىنان تەك ءبىر عاجاپتىڭ كۇشىمەن قۇتىلعانداردان ءبىلىپ قايتتى.

نازيما اتتى 22 جاستاعى ارۋدىڭ ايتۋىنشا، اسكەرلەر نازيمانى ساتىپ جىبەرگەن. ساتىپ الۋشى ادام ونى باسقا قالاعا الىپ كەتەدى. ءوز ەركىنەن تىس سول ەركەكتىڭ ايەلى اتانادى. ەر ادام ءبىر ورىندا تۇراقتامايتىن، ءبىر جىلدا بىرنەشە رەت ورىن اۋسىتىرىپ جۇرگەن ەكەن. نازيمانى دا جانىنان ءبىر ەلى تاستاماعان. ال قىز ەركەكتىڭ ىعىنا باعىنباي، قاشىپ كەتۋگە تىرىسقان سوڭ تالاي تاياق تا جەگەن. ءتىپتى، اپتالاپ جابىق ءارى قاراڭعى بولمەدە اش وتىرعان.

موسۋلعا كەلگەندە نازيما تاعى قاشۋعا تىرىسقان. بۇل ويى جۇزەگە استى دا. جولدا كەزدەسكەن تاكسيگە وتىرا سالا، ءوزىن قۇلدىقتا ۇستاپ وتىرعانىن تاكسيسكە بىردەن جەتكىزەدى. نازيمانىڭ ءوتىنىشى بويىنشا، تاكسيشى قىزدىڭ اعاسىنا حابارلاسىپ، نازيمانى كۇردتەر پانالايتىن لاگەرگە جەتكىزىپ سالادى. ءسويتىپ، نازيما بوستاندىققا قول جەتكىزەدى.

28 جاستاعى رۋبا ەسىمدى قىزدىڭ وقيعاسى دا ادامنىڭ جۇرەگىن الماي قويمايدى. قىز ساۋد ارابياسىنان شىعا بەرە قۇلدىققا تاپ بولادى. بەلگىسىز ەر ادام قىزدى كۇشتەپ ايەلدىككە الماق بولعان، الايدا قىز قاسارىسقان. سول ساتتە ول رۋبانى سوققىعا جىعىپ، قارۋمەن سەس كورسەتەدى. رۋبانىڭ كىشكەنتاي جيەنى دە وسى ادامنىڭ قۇلدىعىندا بولعان كورىنەدى. اپكەسىمەن قوسا قۇلدىقتاعى ءومىردىڭ اششى ءدامىن كىشكەنتاي ءبۇلدىرشىن دە تاتتى.

بۇدان كەيىن، رۋبا جيەنىمەن باسقا ەركەككە ساتىلدى. ول دا قىزداردى كۇن سايىن ساباۋمەن بولدى. ءتىپتى زورلاماق بولعان، ءبىراق قىز زورلىقتان قۇتىلعان. نە كەرەك، ءۇشىنشى رەت ساتىلىپتى. ول جەردە ءبىر ءۇيدىڭ قىزمەتشىسى بولىپ جۇمىس اتقاردى. قوجايىنىنىڭ ايەلى قىزدىڭ 3 جاسار جيەنىن ابدەن قورلاعان: ۇرىپ-سوققان، قاراڭعى بولمەگە قاماپ قويىپ، تاماقسىز قالدىرعان. قىزداردىڭ دەنەسىندە سول كۇندەردىڭ ەستەلىگى رەتىندە تىرتىق قالىپ قويعان.

22 جاستاعى شيرين الباندىققا ساتىلىپ، 5 وتباسى تۇراتىن ۇيگە تاپ بولدى. ول جەردە ءۇي شارۋاسىمەن عانا اينالىسىپ قويماي، ۇيدە تۇراتىن ءار ەركەكتىڭ كوڭىلىن تابۋ دا جاس قىزدىڭ موينىنا جۇكتەلدى. بىرنەشە ايدان سوڭ شيريندى سيريالىق وتباسىنا ساتىپ، ول جەردە بالا كۇتۋشى بولىپ قىزمەت اتقاردى.

كۇندەردىڭ بىرىندە قىزدا قاشىپ قۇتىلاتىن مۇمكىندىك تۋدى. دالادا قالعان شيرين ادامداردان كومەك سۇراپ، اعاسىنا حابارلاسادى. ءسويتىپ، ۇيىنە قايتىپ، قۇلدىقتان ءبىر جولا قۇتىلادى.