قىتايداعى I am a singer كونكۋرسىنان كەيىن تانىمال بولعان ديماش قۇدايبەرگەن پاريجدەگى Global Gift Gala گالا-كەشىنە قاتىسادى، دەپ حابارلايدى قامشى اقپاراتتىق اگەنتتىگى Tengrinews.kz پورتالىنا سىلتەمە جاساپ. 

Global Gift Gala - مۇقتاجدارعا قاراجات جيناۋ، بالالار، وتباسىلار جانە ايەلدەردىڭ قۇقىق اياسىن كەڭەيتۋ پروبلەماسىن تۇسىنۋگە ىقپال جاساۋعا ارنالعان حالىقارالىق باستاما. بۇل پلاتفورما بيزنەسمەندەردىڭ، تانىمال ادامداردىڭ جانە فيلانتروپتاردىڭ باسىن قوسادى. شارا Global Gift Foundation باستاماسىمەن وتەدى. شارانى امەريكالىق اكتريسا ەۆا لونگوريا ۇيىمداستىرادى. ول ءوزىنىڭ "The Eva Longoria Foundation" قايىرىمدىلىق قورىنىڭ اتىنان شىعادى. 

«16 مامىردا پاريجدە كەلەسى #globalgiftgala كەشىندە ونەر كورسەتۋ مەن ءۇشىن زور قۇرمەت. @globalgiftfoundation @evalongoriafoundation جانە @unicef_france قولداۋعا قۋانىشتىمىن! سەنىمىڭىز ءۇشىن راقمەت @thierry_martino»، - دەپ جازدى ديماش قۇدايبەرگەن Instagram جەلىسىندە.

ديماشتى شارادا ونەر كورسەتۋگە ايگىلى اكتريسا ەۆا لونگوريانىڭ ءوزى شاقىرعان.  Global Gift Gala جىل سايىن الەم بويىنشا ءوتىپ كەلەدى. وسىنداي گالا-كەشتەردە قاتىسۋشىلار قايىرىمدى ىستەرى ءۇشىن جۇلدە دە الادى.

 ەسكە سالايىق، مامىر ايىنىڭ باسىندا ديماش قۇدايبەرگەن فرانسۋزدىڭ France 2 مەملەكەتتىك تەلەارناسىنداعى ەڭ بەلگىلى «Les années bonheur» كابارە-شوۋىنا قوناق رەتىندە قاتىسىپ، ونەر كورسەتكەن. قازاقستاندىق انشىگە فرانسۋزدار تۇرىپ قۇرمەت كورسەتتى. ديماشتىڭ ونەر كورسەتكەن تولىق ۆيدەوسى 7 مامىردا عانا پايدا بولدى.

گۇلىم جاقان