اۆستريا سوتى فەيسبۋك الەۋمەتتىك جەلىسىندەگى قورلاۋ ماقساتىندا جازىلعان جازبالاردى ءوشىرۋدى تاپسىردى، دەپ حابارلايدى قامشى اقپاراتتىق اگەنتتىگى. مۇنداي شەشىمدى عالامتورداعى الەۋمەتتىك مەديامەن كۇرەسۋشى بەلسەندىلەردىڭ جەڭىسى دەپ تانيمىز.

جەرگىلىكتى باق-تىڭ مالىمەتىنە سۇيەنسەك، شاعىمدى اۆستريانىڭ جاسىلدار پارتياسى تۇسىرگەن بولاتىن، سەبەبى پارتيا باسشىسىنىڭ الەۋمەتتىك جەلىدەگى جازبانىڭ كەسىرىنەن ابىرويى تاپتالعان.

ۆەنانىڭ اپەللياسيالىق سوتى فەيسبۋك جەلىسىندەگى ەۆا گلاۆيشينگتى قورلاۋ ماقساتىندا جازىلعان جازبالاردى، توپتاردى وشىرۋگە بۇيىردى.

الەۋمەتتىك جەلى وكىلدەرى سوت شەشىمىنە قاتىستى ازىرگە ءۇن قاتپادى.

جاسىلدار پارتياسىنىڭ دەپۋتاتى ديتەر بروز فەيسبۋك اگرەسسياعا قارسى كۇرەس ءۇشىن جاۋاپكەرشىلىكتى ارقالاۋ كەرەكتىگىن ايتتى.

فەيسبۋكتەن بولەك، Twitter، Google سەكىلدى الىپ عالامتور جەلىلەرى اگرەسسيا تۋدىراتىن پىكىرلەردى ءوشىرىپ وتىرماعانى ءۇشىن كوپتەگەن مەملەكەتتەردە سىنعا الىنعان.

ايتا كەتەر بولساق، ساۋىردە نەمىس بيلىگى الەۋمەتتىك جەلىلەرگە 53 ملن دوللار كولەمىندە ايىپپۇل سالعان.

بۇگىندە كومپانيا ماسەلەلەرمەن كۇرەسۋدىڭ جولدارىن ىزدەستىرۋدە. فەيسبۋك وكىلى جەلىدەگى اگەرسسيالار مەن زورلىققا قاتىستى دۇنيەلەرمەن كۇرەسۋ ءۇشىن 3 مىڭ ادام جۇمىلدىرىلادى دەپ ۋادە ەتتى.

Google ىزدەۋ جۇيەسىن رەتكە كەلتىرۋگە ءسوز بەردى. ەندىگى جولى ادام وزىنە كەرەكتى اقپاراتتى ىزدەگەندە Google الەۋمەتتىك جەلىسى اگرەسسيا تۋدىراتىن، سونداي-اق جاساندى مالىمەتتەردىڭ شىقپاۋىن قاداعالايتىن بولادى.  

دايىنداعان: گۇلىم جاقان