فرانسيانىڭ پرەزيدەنتتىك سايلاۋىندا جەڭىسكە جەتكەن 39 جاستاعى ەممانۋەل ماكروننىڭ 64 جاستاعى ايەلى بريدجيت ترونە الەم باق-تارى ەڭ كوپ تالقىلاعان تاقىرىپقا اينالدى. 

سۇحباتتارىنىڭ بىرىندە فرانسيانىڭ ءبىرىنشى حانىمى بيىلعى پرەزيدەنتتىك سايلاۋدا كۇيەۋى جەڭىسكە جەتكەنىن قاتتى قالايتىنىن، ايتپەسە كەلەسى پرەزيدەنتتىك مەرزىمگە دەيىن ءوزىنىڭ 70-كە كەلەتىنىن ايتىپ، ازىلدەگەن ەدى. 

فرانسيا پرەزيدەنتىنىڭ ايەلى جايلى ءبىرقاتار قىزىقتى دەرەكتى Hellomagazine جۋرنالى كەلتىرىپ وتىر، دەپ حابارلايدى Tengrinews.kz:

1. بريدجيت 1953 جىلدىڭ 13 ساۋىرىندە فرانسيانىڭ سولتۇستىگىندەگى امەن قالاشىعىندا بەلگىلى شوكولاتە جان ترونەنىڭ وتباسىندا دۇنيەگە كەلگەن. 1872 جىلى قۇرىلعان كونديتەرلىك فابريكا پەچەنەسىمەن تانىمال - بيزنەس وسى كۇنگە دەيىن جىلىنا 4 ميلليون ەۋرو تابىس اكەلەدى. وتباسى - كوپبالالى، بريدجيت كەنجەسى بولعان.

2. بريدجيت اكەسىنىڭ ءىسىن جالعاستىرعىسى كەلمەي، فرانسۋز جانە لاتىن تىلدەرىنەن ءمۇعالىم بولعان.

3. 21 جاسىندا بريدجيت بانكير اندرە لۋي وزەرگە تۇرمىسقا شىعىپ، ءۇش بالا تاۋىپ بەرگەن: بالاسى سەباستيان جانە ەكى قىزى لورەنس پەن تيففاني. 

4. 1993 جىلى 39 جاستاعى بريدجيت ءمۇعالىم بولىپ جۇمىس ىستەپ جۇرگەن جانە تۋعان قالاسى امەندەگى La providence جەكە مەكتەبىندە تەاتر ۇيىرمەسىن جۇرگىزگەن. سول كەزدە ول 15 جاستاعى وقۋشى ەممانۋەل ماكرونعا عاشىق بولعان. ول وقۋ جىلىنىڭ سوڭىندا مۇعالىمىنە ءسوز سالىپتى. كوپ جىل وتكەننەن كەيىن بريدجيت ەممانۋەلدىڭ سول كەزدە قاتارلاستارىنا قاراعاندا ۇلكەن كورىنەتىنىن ايتقان: "مەن ونى ەشقاشان وقۋشىم دەپ ەسەپتەمەگەنمىن، ول ەرەكشە ەدى".

5. فرانسۋز جازۋشىسى اننا فەلدتىڭ "ءمىنسىز جاس ەر ادام" ("Un jeune homme si parfait") كىتابىنا سۇيەنسەك، ەممانۋەلدىڭ اكەسى جان-ميشەل ماكرون بريدجيتكە ۇلىمەن سويلەسۋگە تىيىم سالىپتى. ەممانۋەل 17-گە تولعاندا، اتا-اناسى ونى پاريجگە IV گەنريح اتىنداعى گيمنازياعا وقۋعا جىبەرگەن. سودان بەرى ماكرون بريدجيتتەن ەكى ساعاتتىق قاشىقتىقتا بولعان. الايدا ەممانۋەل مەن بريدجيت حات الماسىپ وتىرعان. كۇندەردىڭ بىرىندە ول ۇيلەنەتىنىن مالىمدەگەن. 2007 جىلى بريدجيت اجىراسىپ، ماكرونعا پاريجگە كەلىپ، ەكەۋى ۇيلەنگەن. تويدا ءبريدجيتتىڭ ەكى قىزى بولعان. سويتسەك، قىزدارىنىڭ ءبىرى ەممانۋەلدىڭ سىنىپتاسى بولعان-مىس.

6. بريدجيت - باقىتتى اجە. بالالارى وعان جەتى نەمەرە سىيلاعان. ەممانۋەل ماكرون ولارعا اكەسىندەي قارايدى ەكەن. ءبريدجيتتىڭ 30 جاستاعى كەنجە قىزى تيففاني ماكروننىڭ شتابىندا زاڭگەر بولىپ قىزمەت ەتەدى. ءبىرىنشى حانىمنىڭ تۇڭعىش ۇلى سەباستەن ەممانۋەلدەن ەكى جاس ۇلكەن. ال ۇلكەن قىزى لورەنس ەممانۋاەلمەن ءبىر سىنىپتا وقىعان.

7. بريدجيت بار ۋاقىتىن كۇيەۋىنىڭ ساياسي قىزمەتىنە ارناعان، كەيدە ءتىپتى سويلەيتىن ءسوزىن دە جازىپ بەرەدى ەكەن. سوعان قاراماستان، بريدجيت ساياسي قايراتكەر بولعىسى كەلمەيتىنىن مالىمدەگەن. ايتۋىنشا، تەك "جانىندا بولعىسى كەلەدى" ەكەن.

سايلاۋالدى كامپانيا كەزىندە ەممانۋەل ماكروننىڭ قارسىلاستارى شەشەسىمەن جاستى ايەلمەن نەكەسى ارقىلى ول ءوزىنىڭ بەيداستۇرلى وريەنتاسياسىن جاسىرادى دەپ مالىمدەگەن. الايدا بۇعان جۋرناليستەر ەش دالەل تابا الماعان.

ەممانۋەل ماكرون فرانسيا پرەزيدەنتى قىزمەتىنە رەسمي تۇردە 14 مامىردان باستاپ كىرىسەدى. سول كۇنى ۇلىقتاۋ ءراسىمى وتەدى. 

شولۋشى: گۇلىم جاقان