رەندي دجانزەن اتتى كانادالىق ەر ادام ءوزىنىڭ تۋعان قىزىن، ايەلىن جانە اپكەسىن ولتىرگەنىن مويىندادى دەپ حابارلايدى قامشى اقپاراتتىق اگەنتتىگى. بۇل وقيعا تۋرالى ول ءوزىنىڭ فەيسبۋك پاراقشاسىنا جازعان.

ونىڭ 19 جاستاعى قىزى ەميلي دارىندى اكتريسا بولاتىن. ءبىراق ول ميگرەني اۋرۋىنا شالدىققان. بۇل اۋرۋمەن ەميلي 2 جىل بويى كۇرەسكەن. وسى اۋرۋىنىڭ كەسىرىنەن وقۋ ورنىن دا تاستاپ كەتۋگە ءماجبۇر بولىپتى. ەميلي مەكتەپ كەزدەن باستاپ بۇل اۋرۋعا شالدىققان ەكەن.

ونىڭ اكەسى قىزىنىڭ اۋرۋدان قينالعانىنا شىداماعاندىعىن جازىپتى. قىزىنىڭ قينالعانىن كورىپ بۇل ازاپتى توقتاتۋ كەرەك دەپ شەشىم قابىلداعان. ەميلي بۇل اۋرۋمەن ءبىراز جىلدار بويى كۇرەسكەنىمەن ەشقانداي ناتيجە بولماعان.

«مەن قولىما تاپانشانى الىپ ونىڭ باسىنان اتىپ جىبەردىم، ول ەندى ەشتەڭەدەن قينالمايتىن پەرىشتەگە اينالدى»، - دەپ جازعان ول ءوز پاراقشاسىنا.

كەيىننەن ول ءوز ايەلى مەن اپكەسىن ولتىرەدى.

«سوسىن مەن لورەلدى ءولتىردىم، سەبەبى ونىڭ قىزىمىزدىڭ ءولىمى تۋرالى ەستىگەنىن قالامادىم»،- دەپ ءوز قىلمىسىن مويىندادى.

«بىرنەشە كۇننەن كەيىن ۇيگە تۋعان اپكەم كەلدى. مەن ونى دا ءولتىردىم، سەبەبى ونىڭ بۇل ماسقارامەن ءومىر سۇرگەنىن قالامادىم»،- دەيدى رەندي.

بۇل جازبانى وقىعان ادامدار پوليسيا قىزمەتكەرلەرىنە قوڭىراۋ شالادى. ولار قىلمىس بولعان ۇيدە تەرگەۋ جۇمىستارىن جاساپ، قىلمىسكەردى تۇتقىندادى. تەرگەۋ جۇمىستارى ءالى جالعاسىپ جاتىر.

رەندي ءوزىنىڭ وسىنداي قادامعا بارعانىنا وكىنەدى. ءبىراق ونىڭ باسقا امالى بولماعاندىعىن ايتىپ اقتالادى. بۇل ىستەرىنە قاراعاندا ول بەلگىلى ءبىر پسيحيكالىق اۋرۋعا شالدىققان بولۋى مۇمكىن. قانشا دەگەنمەن ءوز قىزىنىڭ قينالعانىن كورۋ كەز-كەلگەن ادامعا وڭاي بولماسى انىق.

اۋدارعان: اسەل وتەشوۆا