يسرافيل بەگەي  ءبىراز ۋاقىت بۇرىن يراننان قازاقستانعا كوشىپ كەلگەن، ايەلى مەن 3 بالاسى بار ەكەن. ول ماڭعىستاۋ وبلىسىنىڭ جاڭاوزەن قالاسىنداعى مەشىتتەردىڭ بىرىندە يمام بولىپ قىزمەت اتقارعان.ۇندەۋ جاريالاعانداردىڭ ايتۋى بويىنشا، ول جات اعىم وكىلدەرىمەن اشىق سۇحبات جۇرگىزىپ، جات اعىمدا جۇرگەن جاستاردىڭ تۋرا جولدى تابۋىنا كومەكتەسكەن ەكەن. ونىڭ ۋاعىزدارى Youtube جەلىسىندە كەڭ تاراپ، كوپ كورەرمەن جيناعان. ازداعان ۋاقىت ىشىندە كوپتەگەن شاكىرت تاربيەلەپ تە ۇلگەرگەن. يسرافيل بەگەي قازاقستاندا 3 – 4 جىل بۇرىن كوشىپ كەلسە دە وسىعان دەيىن ازاماتتىعىن الا الماي كەلگەن. ازاماتتىق الا الماۋىنىڭ دا ءوز سەبەبى بار. وعان جاڭاوزەن تۇرعىندارىنىڭ ايتۋى بويىنشا ەكسترەميست دەپ جالا جابىلعان.  وعان ەكسترەميست دەپ جالا جابىلدى ما، الدە شىندىق پا بەلگىسىز بولىپ وتىر. 

يسرافيل بەگەيگە بايلانىستى وسىنداي ماسەلەدەن كەيىن جاڭاوزەن تۇرعىندارى ەلباسىعا ۆيدەو ۇندەۋ جاريالاي باستادى. ولار مەشىت يمامىنىڭ ازاماتتىق الۋ كەزىندەگى ماسەلەنى شەشىپ بەرۋىن ءوتىندى.

 «مەن داۋىل شالقارىڭ اناسى ساتقانبايەۆا جازيرا بالامدى مەشىتكە جىبەرۋگە قورقاتىن ەدىم. يسرافيل ۇستاز كەلگەلى بالامدى الاڭسىز مەشىتكە جىبەرەتىن بولدىم. مەن ونىڭ جات اعىمدى ۋاعىزداپ ءجۇر دەگەن جالاعا سەنبەيمىن. قۇرمەتتى ەلباسى يسرافيل ۇستازعا كومەكتەسۋىڭىزدى سۇرايمىن»،- دەپتى جاڭاوزەن قالاسىنىڭ تۇرعىنى.

ونىڭ  شاكىرتتەرىنىڭ اتا-اناسى وسىعان ۇقساس ۆيدەو ۇندەۋدى كوپتەپ جاريالاۋدا. بارلىعى دا بۇرىنعى يمامىنىڭ اقتالۋىن قالاپ،ەلباسىدان  كومەك كورسەتۋىن سۇرايدى. سونىمەن بىرگە ورتالىق مەشىتتىڭ جاماعاتى دا ەلباسىعا ارنايى ۆيدەو ۇندەۋ جاساعان.

وسىعان وقيعاعا بايلانىستى قمدب-عا حابارلاستىق.

«يسرافيل بەگەي 1 جىل كولەمىندە، ناقتىراق ايتقاندا، 2015-2016 جىلدار ارالىعىندا جاڭاوزەن قالاسىنداعى مەشىتتە تاعىلىمدامادان (ستاجيروۆكا) ءوتتى. سىناق مەرزىمى بارىسىندا وعان قاتىستى قۇزىرلى مەكەمە وكىلدەرى تاراپىنان سۇراقتار تۋىندادى. وسىعان بايلانىستى يسرافيل بەگەيدىڭ قىزمەتى ۋاقىتشا توقتاتىلدى»، دەدى قمدب-نىڭ باسپا ءسوز مەڭگەرۋشىسى اعابەك قونارباي ۇلى.

ءبىزدىڭ ەلدە شەتەلدەن كەلگەن قازاق ازاماتتارىنا جۇمىس تابۋ ايتارلىقتاي وڭايعا سوقپايدى. ال يران ەلىنەن كەلگەن قازاقتىڭ قالايشا مەشىتتە يمام بولىپ جۇمىس ىستەدى دەگەن سۇراققا اعابەك قونارباي ۇلى بىلاي جاۋاپ بەردى: «قۇزىرلى مەكەمە وكىلدەرى تاراپىنان تەكسەرىس جۇرگىزىلىپتى. ءقازىر انىقتاۋ جۇمىستارى جالعاسىپ جاتقان كورىنەدى». 

ونىڭ ايتۋى بويىنشا، يسرافيل بەگەيدىڭ ازاماتتىق الۋ تۋرالى جازعان ءوتىنىشى ءتيىستى مەكەمەلەر تاراپىنان قاناعاتتاندىرىلماعانى تۋرالى انىقتاما بار ەكەن. الايدا ونىڭ قازاقستانعا قاشان كەلگەنى تۋرالى ەشقانداي دەرەكتىڭ جوقتىعىن، سونىمەن بىرگە 2015 جىلدىڭ باسىنان باستاپ  ماڭعىستاۋ وبلىسى جاڭاوزەن قالاسىنداعى مەشىتتەن تاعىلىمدامادان ءوتۋ تۋرالى ءوتىنىشى ماقۇلدانعانىن ايتتى.

سونىمەن قاتار اعابەك مىرزا يسرافيل بەگەيدىڭ ازاماتتىعى جوق بولا تۇرا قالايشا يمامدىق قىزمەتكە ارالاسقانى جونىندەگى سۇراققا بىلاي جاۋاپ بەردى: «قازاقستاندا ازاماتتىعى جوق يمامدار يمامدىق قىزمەتكە تاعايىندالمايدى. قۇزىرلى مەكەمە وكىلدەرى تاراپىنان تەكسەرىس جۇرگىزىلگەنى. ءقازىر انىقتاۋ جۇمىستارى جالعاسىپ جاتقان كورىنەدى.يسرافيل بەگەيدىڭ قازاقستان مۇسىلماندارى ءدىني باسقارماسى تاراپىنان رەسمي بۇيرىعى بولعان جوق.  قازاقستان مۇسىلماندارى ءدىني باسقارماسى شەتتەن كەلگەن باۋىرلارىمىزدىڭ ازاماتتىق العاننان كەيىن ءدىني قىزمەتكە تاعايىنداۋ تۋرالى وتىنىشتەرىن قاناعاتتاندىرىپ، بارىنشا قولداۋ كورسەتىپ، قامقورلىق جاساۋدا. اتاپ ايتقاندا، الماتىداعى «نۇر مۇباراك» ۋنيۆەرسيتەتى مەن يمامداردىڭ ءبىلىمىن جەتىلدىرۋ يسلام ينستيتۋتىندا موڭعوليادان، قىتايدان، وزبەكستاننان، رەسەيدىڭ التاي رەسپۋبليكاسى مەن ومبى ايماعىنان، ت.ب. كەلگەن قازاق جىگىتتەرىنە ارنايى گرانتتار ءبولىپ، ءتيىستى ءدىني قىزمەتتەرگە تاعايىنداۋدا. سونىمەن قاتار، مەملەكەتتىك باعدارلامامەن سولتۇستىك ايماققا كوشىپ جاتقان قانداستارىمىزعا دا مەشىت تاراپىنان الەۋمەتتىك قولداۋ جاسالىپ، قايىرىمدىلىق كومەك كورسەتىلۋدە».  

اتالعان ماسەلەنىڭ قاشانعا دەيىن سوزىلاتىنى ازىرگە بەلگىسىز. ءبىراق جاڭاوزەنە تۇرعىندارى ماسەلە شەشىلگەنگە دەيىن قولدارىنان كەلگەننىڭ ءبارىن جاسايتىن سىڭايلى. ولاردىڭ ۆيدەو ۇندەۋلەرىنىڭ سانى كۇننەن-كۇنگە كوبەيىپ كەلەدى.

قامشىگەر: اسەل وتەشوۆا