يسلامدى جەتە تۇسىنە قويماعان كىسىلەر كاليما شاھاداتتى ايتساق بولدى، جۇماققا كىرەمىز دەپ ويلايدى. ال، سول كاليمانىڭ قالاي ايتىلۋىنا، ول سوزدەردى ايتقان سوڭ، سوعان ساي امال ەتۋگە كوپتەپ كوڭىل بولە بەرمەيدى. اللانى تانۋ، يسلامدى قابىلداپ قانا قويۋدا ەمەس، ونى سەزىنە بىلۋدە، جۇرەكپەن، اقىلمەن، سانامەن ۇعىنا بىلۋدە بولسا كەرەك. قيامەتتە ەسەپ الدىنا كەلگەندە ءبىر پەندىنىڭ امال داپتەرى قارا پاراقتارعا تولىپ كەتكەن ەكەن. ءتىپتى كوزىنىڭ تۇسىنا دەيىن جەتىپتى الگى پاراقتار. ونىڭ قولىندا ءبىر عانا اق پاراق بار ەكەن. وندا «ءلا ءيلاھا يللاللا» كاليماسى عانا جازىلىپتى. الگى پەندە قورقىپ، شوشىپ تارازىعا كەلگەندە تارازىنىڭ ءبىر جاق بەتى، الگى قارا قاعازدارعا تولىپ، اۋىر سالماقپەن باسىپ تاستاعانىن كورەدى. تارازىنىڭ ەكىنشى جاعىنا جۇرەكسىنە الگى ءبىر قاتار جازۋى بار ءبىر عانا اق قاعازدى قويعاندا، پاراقتا جازىلعان «ءلا ءيلاھا يللاللا» ءسوزىنىڭ كۇشتىلىگى اسپانمەن تەڭدەي تۇرعان قارا پاراقشالاردى پارشا-پارشا ەتىپ شاشىپ جىبەرىپتى. تارازىنى اۋىر تارتقان پاراقتا جازىلعان «ءلا ءيلاھا يللاللا» ءسوزى بولاتىن. «ءلا ءيلاھا يللاللا» جۇرەكتەن شىقسا، وندا ول ءوز ورنىن تابادى. جۇماققا الىپ بارادى، اللانىڭ راقىمىنا بولەتەدى! يمام ان-ناۋاۋي «ال-ازكار» كىتابىندا: «ليا يلياحا يلليا-للاح» ءسوزى ەڭ جاقسى زىكىر بولىپ تابىلادى، مىنە سوندىقتان مۇسىلمانداردىڭ ۇلكەن عۇلامالارى بۇل ءسوزدى ىزگىلەردىڭ ءىسىن جالعاستىرۋشىلار ءۇشىن (ساليحتەر)، اقيقاتتى ىزدەنۋشىلەر (مۋريدتەر) جانە جالعىز وتىرىپ ەسكە الۋشىلار (حالۋات) ءۇشىن تاڭدادى. ولار بۇلارعا بۇل سوزدەردى ءاردايىم ايتىپ ءجۇرۋدى بۇيىرعان جانە بىلاي دەگەن: «شايتاننىڭ ءۋاس-ۋاسىنان ەڭ جاقسى قورعان اللانى كوپ ەسكە الۋ بولىپ تابىلادى».
بىردە ۋاھب يبن مۋناببيحتەن ءبىر ساحابا: «ءلا ءيلاھا يللاللا» دەگەن ءسوز جانناتتىڭ كىلتى ەمەس پە؟» - دەپ سۇرايدى. ول: «ءيا، ءبىراق ءار كىلتتىڭ تىستەرى بولادى. تىستەرى بار كىلت قانا ەسىكتى اشادى. تىستەرى بولماسا، اشىلمايدى»، - دەپ، اللانىڭ بىرلىگىنە يمان كەلتىرگەننەن كەيىن قۇلشىلىق جاساۋدىڭ قاجەتتى ەكەنىن ءبىلدىردى.
وسى كەلتىرىلگەن مىسالدارعا سۇيەنە وتىرىپ، بارشا دىنسۇيەر قاۋىمدى، ەڭسەسىن ەندى عانا كوتەرىپ كەلە جاتقان جاس بۋىندى اللاعا قۇلشىلىق ەتۋگە شاقىرامىز. قۇلشىلىق اۋىزدا ەمەس، جۇرەكتە بولۋى ءتيىس. اللانى تانۋداعى امالدار ادەتكە اينالۋى قاجەت. ادەت قانعا ءسىڭىپ، قان جۇرەككە بارادى. ال، امالدار قانعا ءسىڭىپ كەتسە عانا ول جۇرەككە قونادى. قانعا سىڭەتىن امالدارىمىز يگى بولۋى ءۇشىن، ءىلىم قاجەت. تارازىنى اۋىر تارتقىزىپ، جانناتتىڭ ەسىگىن اشقىزاتىن كىلتتەرىڭىزت – «ءلا ءيلاھا يللاللا» كاليمالارىڭىز «ءتىستى» بولسىن!
اۆتورى: تولتايەۆ ەربول
شولۋشى: اسەل وتەشوۆا
پىكىر قالدىرۋ