پاۆلودار قالاسىنداعى كوپقاباتتى ۇيلەردىڭ ءبىرىنىڭ بالكونىنان ءتورت اي بۇرىن قايتىس بولعان قارت ادامنىڭ دەنەسى تابىلدى، دەپ حابارلايدى قامشى اقپاراتتىق اگەنتتىگى baq.kz-كە سىلتەمە جاساي وتىرىپ.

بۇل تۋرالى كوپقاباتتى ءۇيدى جايلاعان جاعىمسىز يىسكە شاعىمدانعان تۇرعىندار حابارلاپ، قۇتقارۋشىلاردى شاقىرعان. ولاردىڭ ايتۋىنشا، كۇن جىلىنعالى بەرى ءۇيدىڭ دالىزىندە جاعىمسىز ءيىس شىعا باستاعان.

«باستاپقىدا يت نەمەسە مىسىق ءولىپ قالعان دەپ توپشىلادىق. جاعىمسىز ءيىستىڭ سەبەبىن انىقتاماق بولدىق. ۇلىمەن بىرگە تۇراتىن قارت ازاماتتىڭ پاتەرىنە كۇمانمەن قاراي باستادىق. سەبەبى، ەسىكتەرىن ەشكىم اشپادى. قۇتقارۋشىلاردىڭ كومەگىنە جۇگىنۋگە ءماجبۇر بولدىق»، - دەيدى كۋاگەرلەر.

قۇتقارۋشى توپ قارتتىڭ ۇيىنە كەلگەن ساتتە ونىڭ 52 جاستاعى ۇلى بولىپتى. زارەسى ۇشقان ول بەسىنشى قاباتتىڭ تەرەزەسىنەن سەكىرىپ كەتكەن. پاۆلودار وبلىستىق ىشكى ىستەر دەپارتامەنتى باسپا ءسوز قىزمەتىنىڭ حابارلاۋىنشا، مارقۇمنىڭ ۇلى ماس بولعان، ءوزىنىڭ ىس-ارەكەتىنە جاۋاپ بەرە الماعان.

«ەر ازامات تەرەزەدەن سەكىرىپ كەتىپ، ءبىرىنشى قاباتتا ورنالاسقان عيماراتتىڭ توبەسىنە قۇلاپ ءتۇستى. دەرەۋ اۋرۋحاناعا جەتكىزىلدى، جاراقات العان. كەيىن انىقتالعانداي، تۇرعىن دەنساۋلىق جاعدايى بويىنشا ارنايى مەديسينالىق ەسەپتە تۇرعان»، - دەيدى وبلىستىق ءىىد باسپا ءسوز قىزمەتىنىڭ حاتشىسى بايان ماعزۇموۆا.

پوليسەيلەردىڭ سوڭعى مالىمەتتەرىنە سۇيەنسەك، 52 جاستاعى ازامات ەش جەردە جۇمىس ىستەمەيدى. سوڭعى جىلدارى تۋعان-تۋىسقاندارىمەن بايلانىسىن ۇزگەن.

ءتارتىپ ساقشىلارىنىڭ مالىمەتىنشە، 77 جاستاعى زەينەتكەر ۇستىمىزدەگى جىلدىڭ قاڭتارىندا كوز جۇمعان. سول كەزدەن بەرى مارقۇمنىڭ دەنەسى بالكوندا جاتىپتى.

مامانداردىڭ بولجامىنشا، 52 جاستاعى ازاماتتىڭ اكەسىن جەرلەۋگە قاراجاتى بولماعان. وسىنداي قادامعا بارۋدىڭ سەبەبى وسى جايت بولۋى مۇمكىن.

ايتا كەتەيىك، وسى تەكتەس وقيعا وبلىس ورتالىعىندا 14 جىل بۇرىن بولعان. سول جىلى پاتەردىڭ ىشىنەن مۋمياعا اينالعان جاس ايەلدىڭ مۇردەسى تابىلعان.