رەسەيدە حالال ءتۋريزمى قارقىندى دامۋ پروسەسىن باستان كەشىرۋدە. جىل سايىن رەسەي مۇسىلمان تۋريستەردى كوپتەپ قابىلداپ جاتىر دەپ جازادى قامشى اقپاراتتىق اگەنتتىگى تاسس-قا سىلتەمە بەرىپ. الايدا  KazanSummit 2017 فورۋمىندا ساراپشىلار ەلدىڭ ءالى دە مۇنداي تۋريستىك تاۋارلاردى ءوندىرۋدىڭ العاشقى ساتىسىن باستان وتكەرىپ جاتقاندىعىن ايتقان.

«جىل سايىن رەسەيگە كەلەتىن مۇسىلمان تۋرسيتەردىڭ سانى ءوسىپ جاتىر. نەگىزىنەن العاندا مۇنداي تۋريستەردىڭ تالاپتارى وتە كوپ. ونىمەن قوسا ولار تاۋاردىڭ حالال ەكەنىن دالەلدەۋدى تالاپ ەتەدى. قازىرگى تاڭدا، وكىنىشكە وراي تاۋارلاردىڭ قايدا وندىرىلگەنى، قالاي وندىرىلگەنى تۋرالى مالىمەتتەردى تۋريستەرگە ۇسىنۋ ماسەلەسى پروبلەماتيكالىق بولىپ وتىر. وسىعان قاراماستان حالال تۋريزمگە دەگەن سۇرانىم كۇننەن-كۇنگە وسۋدە»-دەيدى روستۋريزم جەتەكشىسىنىڭ ورىنباسارى نيكولاي كوروليەۆ.

الەمدە يسلام ءدىنىن 142 ەلدە 2 ملرد ادام ۇستانادى. رەسەيگە جىل سايىن قانشا مۇسىلمان تۋريستەرى كەلەتىنى تۋرالى ناقتى مالىمەت جوق. دەسەك تە، رەسەيگە ءقازىردىڭ وزىندە قىتايلىق مۇسىلماندار دا كوپتەپ كەلۋدە.

ماسكەۋ مەن پەتەربوردان باسقا مۇسىلمان تۋريستەرى تاتارستانعا دا بارۋعا اسىعادى ەكەن. ماسكەۋ مەن قازاندا مۇسىلمان تۋريستەرگە ارنالعان تولىق قامتاماسىز ەتىلگەن ينفراسترۋكتۋرالار بار. ال پەتەربوردا مۇلدەم جوق ەكەن.

حالال تۋريستەرگە قوناق ءۇي ماسلەسىنە بايلانىستى قويىلاتىن ءبىراز تالاپتار بار. ونىڭ ىشىنە ناماز وقۋعا ارنالعان ارنايى بولمە كىرەدى. بولمەدە قۇران كىتابىنىڭ بولۋى دا مىندەتتى. ناماز كەستەسى، ەگەر ورازا كەزى بولسا اۋىز اشاردا قىزمەت كورسەتەتىن قىزمەتكەرلەر بولۋى دا شارت. وسىعان بايلانىستى مۇنداي تالاپتارعا جاۋاپ بەرەتىن قوناقۇيلەر تەك قازاندا عانا بار ەكەن.

ساراپشىلاردىڭ ايتۋى بويىنشا اۋەجايعا قويىلاتىن دا ارنايى تالاپتار بار. مۇسىلمان تۋريستەرىنە ارنالعان تۋر ۇيىمداستىرۋ ءۇشىن ستاندارتتارعا ساي بولۋ ۇلكەن جۇمىستى قاجەت ەتەدى. دەسە دە، رەسەي ءقازىردىڭ وزىندە وسى تالاپتارعا سايكەس مۇسىلمان تۋريستەرىن قابىلداۋىن ءتۋريزمنىڭ جاڭا دامۋ باعىتى رەتىندە قابىلداپ، ونىڭ دامۋىنا بارىن سالىپ وتىرعانىن انىق بايقاۋعا بولادى.

اۋدارعان: نازەركە مۇسا