الماتىداعى قازاقستان رەسپۋبليكاسىنىڭ ۇلتتىق كىتاپحاناسىندا عۇلامالار كەڭەسىنىڭ بەكىتۋىمەن جارىق كورگەن «جانازا جانە جەرلەۋ راسىمدەرى» كىتابىنىڭ تۇساۋكەسەر ءراسىمى ءوتتى دەپ حابارلايدى قامشى اقپاراتتىق اگەنتتىگى muftyat.kz-كە سىلتەمە جاساي وتىرىپ.

باس ءمۇفتي ەرجان قاجى مالعاجى ۇلى قاتىسقان دوڭگەلەك ۇستەلدە اس بەرۋدە ىسىراپقا جول بەرمەۋ، جەرلەۋ راسىمدەرىنە قاتىستى داستۇرلەردى ءبىر ىزدىلەندىرۋ ماسەلەلەرى تالقىلاندى. دوڭگەلەك ۇستەلدى مودەراتور – قمدب عۇلامالار كەڭەسىنىڭ حاتشىسى، يسلامتانۋشى، تەولوگ ەرشات وڭعاروۆ جۇرگىزدى.

جازۋشى-قالامگەر سماعۇل ەلۋباي، ۇلتتىق كىتاپحانا ديرەكتورى جانات سەيدۋمانوۆ، فيلولوگيا عىلىمدارىنىڭ دوكتورى، پروفەسسور سارسەنبى ءداۋىت ۇلى، تاريح عىلىمدارىنىڭ دوكتورى، پروفەسسور ابدەش تولەۋبايەۆ، «قازاق ەنسيكلوپەدياسىنىڭ» باس ديرەكتورى، پروفەسسور باۋىرجان جاقىپ، فيلوسوفيا عىلىمدارىنىڭ دوكتورى جازۋشى، عالىم نۇرداۋلەت اقىش ت.ب. اقىن-جازۋشىلار ۋاقىتتىڭ سۇرانىسىنا ساي شىققان «جانازا جانە جەرلەۋ راسىمدەرى» كىتابى جايلى ويلارىن ورتاعا سالدى. باسقوسۋعا قاتىسقاندار قازىرگى قوعامدا تالقىلانىپ جۇرگەن ماسەلەلەردىڭ ءبىرى ءقابىر باسىنا كەسەنە تۇرعىزىپ، بەلگى قويۋ، مۇسىلمان زيراتىنىڭ تالاپتارى مەن قاعيدالارى، ءدىني جورالعىلاردى ءبىر جۇيەگە كەلتىرۋ ماسەلەلەرىن تالقىلادى.

 «بۇل كىتاپ عۇلامالار كەڭەسىندە 2 جىل قارالىپ، دايىندالدى. كىتاپتا جانازاعا قاتىستى ۇكىمدەر توپتاستىرىلدى. قايتىس بولعان كىسىنى جەرلەۋ، قۇدايى اس پەن ساداقا بەرۋدىڭ ادەبى جان-جاقتى قامتىلدى. «جانازا جانە جەرلەۋ راسىمدەرى» كىتابىن شىعارۋداعى نەگىزگى ماقسات – ەلىمىز بويىنشا ءدىني راسىمدەردى ءبىر ىزگە كەلتىرۋ، ىسىراپقا، شاريعاتقا قايشى ادەتتەرگە جول بەرمەۋ. ءقازىر اقتوبە، پاۆلودار وبلىستارىندا قۇدايى استىڭ ورتاق ءمازىرى بەكىتىلدى. زيالى قاۋىم وكىلدەرىن، جۋرناليستەردى ەلىمىزدە ءدىني راسىمدەردى ءبىر ىزگە ءتۇسىرۋ ماقساتىندا شىعارىلعان كىتاپتى حالىققا جان-جاقتى ناسيحاتتاۋعا، بىرلەسە وتىرىپ تۇسىندىرۋگە شاقىرامىن»، – دەدى باس ءمۇفتي.

ەرجان قاجى مالعاجى ۇلى ۇلتتىق كىتاپحانا قورىنا «جانازا جانە جەرلەۋ راسىمدەرى» كىتابىنىڭ بىرنەشە داناسىن سىيعا تارتتى.  كىتاپ 11 مىڭ دانامەن جارىق كورگەن.            

دوڭگەلەك ۇستەل بارىسىندا جۋرناليستەر مەن زيالى قاۋىم وكىلدەرى ءوز ۇسىنىستارىن ايتىپ، وڭ پىكىرلەرىن ءبىلدىردى.

«مەن وسى رەتتە ءبىر ۇسىنىس ايتقىم كەلەدى. «جانازا جانە جەرلەۋ راسىمدەرى» كىتابىنىڭ تيراجىن كوبەيتىپ، ەلىمىزدەگى بارلىق كىتاپحانالارعا تەگىن تاراتساق. سونىمەن قاتار، تەلەارنالاردا ارنايى باعدارلامالار اشىلىپ، كىتاپتا ايتىلعان ماسەلە كەڭىنەن ناسيحاتتالسا نۇر ۇستىنە نۇر بولار ەدى. سوندا عانا ءبىز ۇرپاعىمىزدى جامان ادەتتەر مەن تەرىس قىلىقتاردان امان الىپ قالار ەدىك»، – دەدى «تۇركىستان» گازەتىنىڭ ءجۋرناليسى كولباي ادىربەك ۇلى.