يبراھيم پايعامباردىڭ (ع.س.) قۇلشىلىق جاسايتىن وزىنە ءتان جەكە بولمەسى بار دەپ جازادى قامشى اقپاراتتىق اگەنتتىگى muslim.kz-كە سىلتەمە جاساي وتىرىپ. بۇل ءمىناجات ەتىپ، جاراتۋشىنىڭ قۇدىرەتىنە مىڭ مارتە شۇكىر ەتەر جايلى دا تىنىشتىق سالتانات قۇرعان ورىن بولاتىن. الدەبىر شارۋا ۋاقىتىندا كىلتتەپ كەتەتىن.

ءبىر كۇنى ىشكە كىرگەندە، بولمە ورتاسىندا تۇرعان بوتەن بىرەۋدى كورەدى. بوساعاسى بەكىتۋلى شاڭىراققا قالاي كىردى دەگەن ويمەن تاڭىرقاپ: «سەنى كىم كىرگىزدى؟!» – دەپ سۇرايدى. بەيتانىس ادام: «مەنى وسى ءۇيدىڭ يەسى كىرگىزدى»، – دەيدى. يبراھيم (ع.س.): «بۇل ءۇيدىڭ يەسى مەنمىن»، – دەيدى. الگى كىسى: «سەنەن دە، مەنەن دە بۇرىنعى وسى مەكەننىڭ يەسى كىرگىزدى»، – دەپ، جاراتۋشىنى مەڭزەدى.

حازىرەت يبراھيم (ع.س.) ونىڭ ازىرەيىل پەرىشتە ەكەنىن ءبىلىپ: «ءاي، ازىرەيىل، ماعان ءمۇمين قۇلداردىڭ جانىن الارداعى بەينەڭدى كورسەتشى؟» – دەپ ءوتىندى. ازىرەيىل: «وندا ارتىڭا بۇرىل»، – دەيدى. يبراھيم (ع.س.) ارتىنا بۇرىلىپ، از ۋاقىتتان كەيىن قايتا قاراعاندا، تىم كەلبەتتى، تارتىمدى، كيىمى ءساندى، حوش ءيىستى، جاپ-جاس جىگىتتىڭ تۇرعانىن كورەدى. سول كەزدە حازىرەت يبراھيم (ع.س.): «ءمۇمين كىسىگە ولەر الدىندا سەنى وسىنداي كەلبەتتە كورۋدىڭ ءوزى جەتكىلىكتى ماراپات قوي»، – دەگەن ەكەن.