ءبىر كۇنى ءىرى تابيعين عالىمى حاسان باسريگە ءبىر ادام كەلىپ، قىزىنىڭ سوقىر بولىپ قالعانىن ايتادى دەپ جازادى قامشى اقپاراتتىق اگەنتتىگى muslim.kz-كە  سىلتەمە جاساي وتىرىپ.

–  ءاي، يمام، مەنىڭ قىزىم كۇنى-تۇنى قۇدايدى ويلاپ كوپ جىلايدى. ءتىپتى، قوس جانارى سۋالىپ كەتتى. باسپاعان جەرىم، بارماعان تاۋىم جوق. ەشكىم ەمدەي المادى، – دەيدى.

–  مەنى ەرتىپ بار، – دەدى حاسان باسري، – جولىعىپ كورەيىن.

ەكەۋى ۇيگە جەتەدى. شىنىمەن دە قىزى سۋ قاراڭعى سوقىر ەكەن، ءوزى جىلاپ وتىر. حاسان باسري مۇنى كورگەندە:

–  قىزىم، نەگە جىلاي بەرەسىڭ؟ ءتىپتى ەكى كوزىڭنەن دە ايىرىلىپسىڭ عوي، – دەيدى.

–  ەكى سەبەپتەن سوقىر بولدىم، – دەپتى قىز، – ءبىرىنشىسى، ەگەر بۇل كوزبەن اقىرەتتە اللانىڭ جامالىن كورە السام، قازىرگى كورگەن دۇنيە سونىڭ جولىندا ساداقا بولسىن. ەكىنشىدەن، اقىرەتتە بۇل كوزبەن اللانىڭ نۇر ديدارىن كورە الماسام، وندا مۇنىڭ ماعان نە كەرەگى بار؟ ونداي كوزدىڭ بارىنان دا جوعى جاقسى، – دەيدى. 

بۇنى ەستىگەندە، حاسان باسري قىزدىڭ اكەسىنە قاراپ:

–  سەن مەنى بۇل جەرگە اقىل ايت دەپ اكەلگەنىمەن، اقىلگوي قىزىڭنان ناعىز دانالىق ءسوز ەستىتكىزدىڭ. مۇنداي كوكىرەك كوزى اشىق ادامدارعا جاي كوزدىڭ كەرەگى دە بولا قويماس، – دەگەن ەكەن.